Read Garhwali रोमियों 14 Bible Online

रोमियों 14 - Garhwali bible

रोमियों 14

¹जु विश्वासी भैय विश्वास मा कमजोर च, वेकी मान्यताओं का बारा मा कै भि शक अर बगैर जांच के वे तैं अपणैयला, वेका दगड़ी बहस नि कैरा की क्य कन चयणु च या क्य नि कन चयणु च।

²किलैकि एक तैं विश्वास च, कि सब कुछ खांण ठिक च, पर जु विश्वास मा कमजोर च, उ भस सागपात ही खांद।

³अर जु मांस खांद, ऊं मांस नि खांण वला तैं तुच्छ नि समझो अर मांस नि खांण वला पर भंगार नि लगौ; किलैकि परमेश्वर दुयूं तैं स्वीकार करदो।

⁴इलै तुम तैं कैका दास कु न्याय नि कन चयणु च; चाहे उ भलो कैरो या बुरो कैरो, यु वेका मालिक की जिम्मेदारी च। पर उ भलो ही करलो, किलैकि प्रभु भलो कन मा वेकी मदद करदो।

⁵वे ढंग से ही एक दिन तैं दुसरा बट्टी बड़ी के मंणदु अर कुई सब दिनों तैं एक समान मंणदु च हरेक अपड़ा ही मन मा निश्चय कैरी ल्यो।

⁶जु कै दिन तैं मंणदु, उ यु इलै ही करदो किलैकि उ प्रभु कु समान कन चांणु च, जु मांस भि खंदींनि, उ प्रभु कु खंदींनि, किलैकि उ पिता परमेश्वर कु धन्यवाद करदींनि, जु मांस नि खंदींनि, उ प्रभु कु नि खंदींनि अर पिता परमेश्वर कु धन्यवाद करदींनि।

⁷हम सभि प्रभु का छा इलै, की हमारा जीवन मा अर हमारी मौत मा, हम तैं पिता परमेश्वर तैं खुश कन चयणु च पर खुद तैं न।

⁸किलैकि हम ज्यूंदा छा, त प्रभु कु ज्यूंदा छा; अर जु मोरि भि जां, त प्रभु कु मुर्दा; फिर हम ज्यूंदा रां या मोरि भि जां, हम प्रभु का ही छा।

⁹किलैकि मसीह इलै मोरि अर ज्यूंदों हवे गै, कि उ ऊई च जै तैं ज्यूंदों अर मुरयां लुखुं द्वी प्रभु का रूप मा स्वीकार करदींनि।

¹⁰त तुम किलै अपड़ा दगड़िया विश्वासी भैय पर भंगार लगांणु छै? या तु फिर अपड़ा दगड़िया विश्वासी भैय तैं तुच्छ किलै समझंणि छै? हम सभियूं कु न्याय आसण मा बैठयां पिता परमेश्वर बट्टी होलो।

¹¹किलैकि परमेश्वर का वचन मा लिख्युं च, “प्रभु बुल्द, मि अपड़ा जीवन की सौं खांदु, कि हरेक मेरा संमणी घुंडा टिकलो, अर हरेक मनिख पिता परमेश्वर तैं स्वीकार करलो।”

¹²त फिर, हम मा हरेक तैं अपड़ो-अपड़ो कामों कु लेखा पिता परमेश्वर तैं दींण होलो।

¹³इलै अगनैं कु हम एक हैंका पर भंगार नि लगयां पर तुम यु ही ठांणी ल्यावा की कुई भि अपड़ा भैय का संमणी पाप कन या ठोकर खांणु कु कारण नि रख्यां।

¹⁴मि जंणदु छौं अर प्रभु यीशु बट्टी मि तैं निश्चय हवे, कि सभि खांणु खांण कु ठिक च, पर जु सभि खांणु तैं अशुद्ध समझद, वेको अशुद्ध च।

¹⁵जु तेरु भैय तेरु खांणु का कारण उदास हूंद, त फिर तु प्रेम की रीति बट्टी नि चलदी; त त्वे तैं सावधान रौंण चयणु च कि हम खांणु का वजह बट्टी हमारा दगड़िया विश्वासी कु विश्वास नष्ट नि कैरा, किलैकि मसीह वेको भि मोरि छों।

¹⁶इलै भले ही तुम जु कना छा उ भलो च, पर जु कुई अर वे तैं बुरो मणदींनि, त वे तैं नि कैरा।

¹⁷किलैकि पिता परमेश्वर का राज्य मा, खांण-पींण जरुरी नि च। जरुरी बात य च कि पिता परमेश्वर का दगड़ी सै जीवन जियां, अर पवित्र आत्मा मा शान्ति अर आनन्द च।

¹⁸जु कुई यु ढंग से मसीह की सेवा करद, उ पिता परमेश्वर तैं खुश करद अर लोग भि वेका बारा मा अच्छो बुल्दींनि।

¹⁹इलै हम ऊं बातों की कोशिश नि कैरा, जु लुखुं तैं शान्ति का दगड़ी रौंणो कु कारण बंणौंदींनि अर एक दुसरो कु विश्वास मजबूत कन मा मदद कैरा।

²⁰तुम तैं कुछ खांणै की चीज कु पिता परमेश्वर का कामों तैं नि बिगड़ण चयणु च; सभि खांणु खांण कु ठिक च, पर कुछ इन चीज खांण गलत च जु दुसरा आदिम तैं पाप मा पुड़णों को कारण बणद।

²¹भलो त यु च, की तु न मांस खा अर न दाखमधु पी अर न कुछ इन कैर ज्यां बट्टी तेरु विश्वासी भैय पाप कैरो।

²²तेरु जु विश्वास च, उ तेरु अर तेरु परमेश्वर का बिचै की बात च; धन्य च उ, जु वीं बात मा, जै तैं उ ठिक समझदु हो, अपड़ा आप तैं भंगारी नि ठैरौंद।

²³जु तु ईं बात तैं लै के शक करदी छै कि त्वे तैं कुछ खांण चयणु च या न, त तु यु तैं खै के पाप कनि छै, किलैकि तु अपड़ा विश्वास कु पालन नि कनि छै, किलैकि उ विश्वास बट्टी नि खांदो, अर हम जु भि करद्यां, जु यु प्रभु मा विश्वास का दगड़ी नि च, त उ हम कु पाप च।