Read Garhwali रोमियों 16 Bible Online

रोमियों 16 - Garhwali bible

रोमियों 16

¹मि तुम बट्टी फीबे कु, जु हमारी दगड़िया विश्वासी बैंण अर किंख्रिया शहर का मण्डलि की सेविका च, मि चांदु छों कि तुम वींको समान कैरा।

²कि जन तुम पवित्र लुखुं तैं चयणु च, जु प्रभु कु च, वेको स्वागत कैरा; अर जु कै बात मा वे तैं जु मदद तुम लुखुं बट्टी चयणु च, वेकी मदद कैरा; किलैकि उ भि भौतों की बल्कि मेरी भि उपकार कन वली हवे।

³प्रिस्किल्ला भुल्ली अर वीं का आदिम अक्विला तैं जु यीशु मा मेरू दगड़िया च, मेरू प्रणाम।

⁴जौनु मेरा प्राण बचांणु कु अपड़ा प्राण खतरा मा डालेल छा, अर भस मि ही न, बल्कि अन्यजातियों की सैरी मण्डलि भि ऊंको धन्यवाद करदींनि।

⁵मेरा प्रिय इपैनितुस तैं मेरू प्रणाम, जु एशिया का प्रान्त बट्टी मसीह पर विश्वास कन वला पैलो आदिम च अर वीं मण्डलि तैं भि प्रणाम ज्वा ऊंका घौर मा कठ्ठा हूंद।

⁶मरियम तैं जींल तुम कु भौत मेहनत कैरी, प्रणाम।

⁷अन्द्रुनीकुस अर यूनियास तैं जु मेरा दगड़िया यहूदी छिनी, अर मि दगड़ी जेलखना मा कैद हवे छा, अर प्रेरित ऊं तैं अच्छा ढंग से जणदींनि, अर मि बट्टी पैली मसीह का चेला बंणि गै छा, मेरू प्रणाम।

⁸अम्पलियातुस तैं, जु प्रभु मा मेरू प्रिय च, प्रणाम।

⁹उरबानुस तैं, जु मसीह मा हमारो सहकर्मी च, अर मेरू प्रिय इस्तखुस तैं, प्रणाम।

¹⁰अपिल्लेस तैं, परखे जांण का बाद भि जैको विश्वास मसीह मा सचो निकली, प्रणाम। अरिस्तुबुलुस का परिवार तैं, प्रणाम।

¹¹मेरा कुटुम्बी हेरोदियोन तैं प्रणाम। नरकिस्सुस का परिवार तैं जु लोग मसीह पर विश्वास करदींनि, ऊं तैं प्रणाम।

¹²त्रूफेना अर त्रूफोसा बैणयूं तैं जु प्रभु मा मेहनत करदींनि, प्रणाम। प्रिय पिरसिस बैंण तैं जींल प्रभु मा भौत मेहनत कैरी, प्रणाम।

¹³रुफुस तैं प्रभु की सेवा मा ऊंका खास काम कु चुणयूं च, अर वेकी ब्वे मि कु भि ब्वे का जन च, द्वीयूँ तैं प्रणाम।

¹⁴असुंक्रितुस अर फिलगोन अर हिर्मेस, पत्रुबास, हिर्मास अर ऊं दगड़िया विश्वासी भयों तैं मेरू प्रणाम।

¹⁵फिलुलुगुस अर यूलिया अर नेर्युस अर वेकी बैंण अर उलुम्पास अर ऊं दगड़ा का सभि पवित्र लुखुं तैं, प्रणाम।

¹⁶आपस मा मसीह प्रेम बट्टी प्रणाम कैरा; तुम तैं मसीह की सैरी मण्डलियों की तरपां बट्टी प्रणाम।

¹⁷अब हे विश्वासी भयों, मि तुम बट्टी बिनती कनु छौं, कि जु लोग वीं शिक्षा का विपरीत बट्टी जु तुम ल पै, फूट डलण अर ठोकर खिलांण कु कारण हूंदींनि, ऊं बट्टी बचि के रावा; अर ऊं बट्टी दूर रावा।

¹⁸किलैकि इन्देरा लोग हमारा प्रभु मसीह का नि छिनी, पर अपड़ा देह की इच्छाओं की सेवा करदींनि; अर चिकनी चुपड़ी बातों बट्टी भोला-भाला मन का लुखुं तैं धोखा दींदिनि।

¹⁹तुम्हरा आज्ञा मंनणै की चर्चा सभि लुखुं मा फैली गै; इलै मि तुम्हरा बारा मा खुश हूंदु; पर मि इन चांदु छों, कि तुम भलै कु बुद्धिमान, पर बुरै कु भोला बंणयां रावा।

²⁰शान्ति कु पिता परमेश्वर शैतान की शक्तियों तैं नाश कैरी कै वे तैं तुम्हरा अधीन कैरी दयालो। हमारा प्रभु यीशु मसीह की कृपा तुम पर हूंणी रौ।

²¹तीमुथियुस मेरा सहकर्मी अर लूकियुस अर यासोन अर सोसिपत्रुस मेरा दगड़िया यहूदी लुखुं, तुम तैं प्रणाम।

²²मि तिरतियुस जु पौलुस कु ईं चिट्ठी तैं लिखणु छौं तुम सभियूं तैं प्रणाम लिखणु छौं।

²³गयुस जै दगड़ी मि रौंणु छो, उ भि तुम कु प्रणाम बुल्णु च। सैरी मण्डलि ऊंका घौर मा इख मिलदी। इरास्तुस जु यु शहर को खजांचि च अर क्वारतुस हमारो भैय भि तुम कु प्रणाम बुल्णु च।

²⁴मि प्रार्थना करदु, कि हमारा प्रभु यीशु मसीह की दया तुम दगड़ी रौ।

²⁵अब जै शुभ सन्देश कु मि प्रचार करदु, मतलब यीशु मसीह का बारा मा प्रचार का अनुसार जु तुम तैं विश्वास मा मजबूत बणांद, वे भेद का प्रकाश का अनुसार जु हमेशा बट्टी छिप्युं रै।

²⁶पर अब प्रगट हवे कै सनातन पिता परमेश्वर की आज्ञा बट्टी अर परमेश्वर की तरपां बट्टी बुल्ण वला की किताबों का द्वारा सभि अन्य-जातियों तैं प्रचार किये गै, कि उ विश्वास बट्टी परमेश्वर का वचन तैं मनणवला हवे जौं।

²⁷वीं एकमात्र अद्वैत बुद्धिमान परमेश्वर की यीशु मसीह का द्वारा जुग-जुग बढ़ै हूंणी रौ। आमीन।