Read Garhwali रोमियों 2 Bible Online

रोमियों 2 - Garhwali bible

रोमियों 2

¹इलै तुम इन सुचदा कि तुम इन लुखुं पर भंगार लगै सकदा छा, पर तु जु दूसरों पर भंगार लगौंदी, तू बगैर जवाब को छै, किलैकि जीं बात पर तु दूसरों पर भंगार लगौंदी, वीं बात मा अपड़ा आप तैं भि भंगारी ठैरांदी छै, इलै कि तु जु भंगार लगौंदी, खुद भि ऊं ही कामों तैं करदी।

²अर हम जंणदा छा, कि पिता परमेश्वर सै च जब भि उ ऊं लुखुं कु न्याय करदो, जु इन काम करदींनि।

³हे मनिख, तु जु इन बुरा-बुरा काम कन वलो पर भंगार लगौंदी, अर खुद भि ऊं कामों तैं करदी; क्य तु इन समझदी कि तू पिता परमेश्वर का दण्ड कि आज्ञा बट्टी बचि जैलि?

⁴क्य तु परमेश्वर कि भलै, अर सहनशीलता, धीरजरूपी धन तैं तुच्छ समझणी छै? अर क्य तू इन नि समझणी छै कि पिता परमेश्वर कि भलै त्वे तैं पाप बट्टी मन फिराण तैं सिखांदी?

⁵पर तू ढीट छै अर अपड़ा पापों बट्टी पश्चाताप कन से मना करदी वे दिन जब पिता परमेश्वर अपड़ो गुस्सा दिखालो, ज्यां मा परमेश्वर कु सचो न्याय प्रगट होलो, परमेश्वर और जादा गम्भीर हवे के तुम्हरो न्याय करलो।

⁶पिता परमेश्वर हरेक मनिख तैं वेका कामों का अनुसार प्रतिफल दयालो।

⁷जु अच्छा काम मा स्थिर रै के बड़ै, अर आदर, अमरता कि खोज मा छिनी, ऊं तैं पिता परमेश्वर अनन्त जीवन दयालो;

⁸पर जु कुई भि स्वार्थी छिनी अर सच तैं नि मणदींनि, बल्कि कुकर्म कु पालन करदींनि, ऊं पर पिता परमेश्वर अपड़ो गुस्सा अर प्रकोप दिखालो।

⁹क्लेश अर संकट हरेक मनिख पर जु बुरै करदो वे पर आलो, पिता परमेश्वर पैली यहूदी लुखुं कु न्याय करलो अर फिर यूनानी अन्यजाति अर अब ऊंको जु यहूदी नि छिनी;

¹⁰पर बड़ै अर आदर अर शान्ति कु आत्मा सभियूं तैं मिललो, जु भलै करदो, पिता परमेश्वर सबसे पैली यहूदी लुखुं तैं दयालो अर फिर वे तैं जु यूनानी अन्यजाति छिनी अर फिर जु अन्यजाति छिनी।

¹¹किलैकि “पिता परमेश्वर सभि लुखुं कु न्याय एक समान बरतौ से करदो।”

¹²इलै कि जौं ल बगैर मूसा कि व्यवस्था पयां पाप कैरी, उ बगैर व्यवस्था का पिता परमेश्वर का द्वारा दंड पाला, यहूदी जौं ब्वे मूसा कि व्यवस्था च ऊंल व्यवस्था तैं पै कै भि पाप ही कैरी, ऊंको दंड व्यवस्था का अनुसार होलो।

¹³किलैकि पिता परमेश्वर का इख व्यवस्था कु सुनण वला धर्मी न, पर व्यवस्था पर चलणवला धर्मी ठैरे जाला।

¹⁴फिर जब अन्यजाति लोग जौं मा मूसा कि व्यवस्था नि च, उ अपड़ा ही आप वेका आज्ञाओं कु पालन करदींनि, त मूसा की व्यवस्था ऊंमा नि हूंण पर भि उ यु साबित करदींनि कि ऊंका मन मा व्यवस्था च।

¹⁵उ दिखोंदा छिनी कि परमेश्वर का द्वारा दिये गै मूसा कि व्यवस्था ऊंका मनों मा लिखीं छिनी, किलैकि ऊंको विवेक दिखांद, कि यु सच्चा छिनी, किलैकि ऊंका विचार ऊं तैं भंगारी ठैरौंदींनि अर ऊं तैं निर्दोष ठैरौंदींनि।

¹⁶जै दिन पिता परमेश्वर वे शुभ सन्देश जै कु मि प्रचार करदु छों, का अनुसार यीशु मसीह का द्वारा मनिख्युं कि गुप्त बातों कु न्याय करलो।

¹⁷जु तू खुद तैं यहूदी बुल्दी, अर पिता परमेश्वर की व्यवस्था मा भरोसो रखदि छै अर परमेश्वर का खास हूंणो कु घमण्ड करदी,

¹⁸तुम तैं पिता परमेश्वर कि मनसा पता च, अर तुम भलि-भलि चीजों का भागिदार छा, किलैकि तुम तैं यांका बारा मा मूसा की व्यवस्था बट्टी सिखै गै;

¹⁹जु तू अफ पर भरोसो रखदि छै, कि तु इन ही छै जु अंधा लुखुं तैं परमेश्वर कु बट्टो दिखांण चयणु च, कि तुम ऊं लुखुं कु उज्यला का जन च जु अंधेरा मा छिनी।

²⁰अर बुद्धिहीनों तैं सिखौंण वलो, अर बालकों को उपदेशक च, तू निश्चित हो कि पिता परमेश्वर की व्यवस्था तुम तैं पूरो ज्ञान अर सचै प्रदान कैरो।

²¹इलै तु, जु दुसरों तैं शिक्षा दींदी, खुद तैं शिक्षा किलै नि दींदी? क्य तू जु चोरी नि कने कि शिक्षा दींदी, अर खुद ही चोरी करदी छै?

²²तु जु बुल्दी छै, “व्यभिचार नि करयां” क्य तू खुद ही व्यभिचार करदी? तू जु मूर्तियों बट्टी घीणांदी छै, क्य तु खुद ही यरूशलेम शहर का मन्दिर तैं लुटदी छै?

²³तुम तैं अफ मा पिता परमेश्वर की व्यवस्था को हूंणो को घमण्ड च, क्य पिता परमेश्वर कु वचन नि मांणी के, तुम वेको अनादर करदां?

²⁴“तुम यहूदियों का कारण, अन्यजातियों लोग पिता परमेश्वर का बारा मा बुरी-बुरी बात बुल्णा छिनी” जन कि पिता परमेश्वर का वचन मा भि लिख्युं च।

²⁵तेरु खतना किये जांणु कु फैदा भस तभि च जब तु मूसा कि व्यवस्था मंणदी छै। पर जु तू मूसा कि व्यवस्था कु पालन नि कैर, त तुम खतना करयां यहूदी लोग ऊं लुखुं का जन ही छा जु यहूदी नि छिनी अर जौं को खतना नि हुयुं च।

²⁶त जु खतनारहित मनिख मूसा कि व्यवस्था को पालन कैरा, त पिता परमेश्वर इन मनिख तैं वे मनिख का जन दिखद जै को खतना हुयुं च।

²⁷अर जु मनिख देह का रूप मा बगैर खतना कु रै हो उ मूसा कि व्यवस्था कु पालन कैरो, त क्य त्वे मा मूसा कि व्यवस्था च? अर खतना करे जांण पर भि मूसा कि व्यवस्था को पालन नि कैरी त क्य तु भंगारी नि ठैरिलि?

²⁸किलैकि यु इन नि च की तू यहूदी पैदा हवे अर किलैकि तुम्हरो खतना हुयुं च उ तुम तैं सच्चों यहूदी बणांद।

²⁹एक सचो यहूदी उ च, जैको मन पिता परमेश्वर का दगड़ी जुड़यूं च, अर सचो खतना भस मूसा कि व्यवस्था कु पालन कन ही नि च; बल्कि यु मन कु बदलाव च, जु परमेश्वर कि आत्मा का द्वारा ही पैदा हूंद। इन मनिख लुखुं बट्टी न, बल्कि परमेश्वर बट्टी बड़ै पांदो।