Read Garhwali रोमियों 3 Bible Online

रोमियों 3 - Garhwali bible

रोमियों 3

¹जु कुई पूछो, क्य यहूदियों तैं अन्यजातियों बट्टी जादा फैदा च या खतना कु क्य फैदा?

²एक यहूदी हूंणो कु भौत फैदा च। सबसे खास यु कि परमेश्वर कु वचन ऊं तैं सौंप्ये गै।

³जु कुछ यहूदी पिता परमेश्वर का प्रति विश्वासयोग्य नि छा त क्य हवे? त क्य यांको मतलब यु च कि पिता परमेश्वर ऊंका दगड़ी अपड़ा वादों तैं पूरो कन मा अविश्वासयोग्य होलो?

⁴न! बिल्कुल न! बल्कि पिता परमेश्वर हमेशा सच बुल्द, अर हरेक मनिख झूठो ठैरलो, जन परमेश्वर का वचन मा लिख्युं च, “ज्यांसे कि तु अपड़ी बातों मा धर्मी ठैरा अर न्याय कन बगत तु जय पै।”

⁵पर जु हमारा दुष्ट काम पिता परमेश्वर की धार्मिकता ठैरे दींदीनी, त हम क्य बोला? त क्य पिता परमेश्वर कु गुस्सा हूंण अर हम तैं दंड दींण गलत च (यु त मि मनिख्युं की रीति पर बुल्णु छो)

⁶न! बिल्कुल न! जु पिता परमेश्वर यहूदियों को न्याय कन मा ठिक नि च, त उ निश्चित रूप बट्टी सैरी दुनिया का लुखुं कु न्याय नि कैरी सकद।

⁷कुछ लोग बोलि सकदींनि, “पर जु मेरी बेमानी पिता परमेश्वर कि सचै तैं प्रगट करदी और वे तैं और जादा बड़ै मिलदी, त उ कन कै मेरू न्याय कैरी सकद अर मि तैं एक पापी का रूप मा भंगारी ठैराये सकदो च?”

⁸कुछ लोग इन बोलि के हम पर भंगार लगौंदींनि कि हम ल बोलि, “आवा हम बुरै कैरा, बल्कि यां बट्टी भलै निकली” जन हम पर यु भंगार लगाये भि जांद, अर कुछ बुल्दींनि कि यूंको यु ही बुल्ण च। जु लोग मेरा बारा मा इन बात बुल्दा छिनी, उ भंगारी ठैराये जांण का लैक छिनी।

⁹त क्य हम यहूदी लोग, यूनानी अन्यजाति लुखुं बट्टी बड़िया छा? क्य हम यहूदी अन्यजातियों बट्टी भि मजबूत छा? लगदु त नि च; किलैकि हम यहूदियों अर अन्यजातियों दुयूं पर भंगार लगै येलि कि उ सब लोग पाप का अधीन छिनी।

¹⁰जन परमेश्वर का वचन मा लिख्युं च; परमेश्वर कि नजरों मा कुई भि धर्मी नि च, एक भि न।

¹¹इन एक भि मनिख नि च जु सच मा समझदु हो कि क्य सै च; कुई भि परमेश्वर तैं जनणु कु खुजणवलो नि च।

¹²सभियूं ल पिता परमेश्वर तैं छोडे़ले, सब का सब पिता परमेश्वर कु निकम्मा बंणि गैनी; भलै कन वलो कुई नि च, एक भि नि च।

¹³ऊंको गिच्चो खुल्यां बाश मरण वली कब्रों का जन च, किलैकि जु बात उ बुल्दा छिनी उ बुरै की ही हूंदींनि उ अपड़ा शब्दों कु इस्तेमाल लुखुं तैं धोखा दींणु कु करदींनि; जु कुछ उ बुल्दींनि उ गुरो का विष का जन विनाशकारी हूंद।

¹⁴अर ऊंकी बातचित श्राप अर कड़वाहट ल भुरीं छिनी।

¹⁵उ नुकसान ल्वे बुगांण अर हत्या कनु कु जल्दीबाजी करदींनि।

¹⁶उ जख भि जंदींनि उख लुखुं तैं नाश कैरी दींदिनि अर अपड़ा पिछनै दुःख छोड़ी जंदींनि।

¹⁷उ शान्ति का दगड़ा मा रौंण नि जणदींनि।

¹⁸“ऊंमा पिता परमेश्वर की डौर ही नि च।”

¹⁹हम जंणदा छा, कि परमेश्वर की व्यवस्था जु कुछ बुल्दी, ऊंमा ही बुल्दी, जु परमेश्वर का वचन का अधीन छिनी, कि लुखुं तैं बहाना बनांण बट्टी रोक साका, अर दुनिया का सभि लोग पिता परमेश्वर का संमणी भंगारी छिनी।

²⁰मूसा की व्यवस्था कु पालन कैरी के लोग पिता परमेश्वर का दगड़ी धर्मी साबित नि होलो, इलै कि मूसा की व्यवस्था का द्वारा हम स्पष्ट रूप से जंणदा कि हम ल पाप कैरी।

²¹पर अब सभि मूसा द्वारा लिखीं परमेश्वर की व्यवस्था कु पालन करयां बगैर पिता परमेश्वर ल हम तैं धर्मी ठैरे, जैका बारा मा मूसा की व्यवस्था अर पिता परमेश्वर का तरपां बट्टी बुल्ण वलो की किताबों मा भौत पैली बट्टी लिख्युं च कि हम पिता परमेश्वर का दगड़ी धर्मी कन कै बंणि सकदियां

²²मतलब हम परमेश्वर का द्वारा धर्मी बंणये जंदींयां जब हम यीशु मसीह पर विश्वास करद्यां। किलैकि सभि लोग एक जन छिनी, अर कुछ भेद नि च;

²³इलै की सभियूं ल पाप कैरी अर वे बड़ै तक नि पौंछि सकिनि जु पिता परमेश्वर दींद,

²⁴पर पिता परमेश्वर की दया बट्टी वेल हम तैं यीशु मसीह का द्वारा हम तैं पापों का दंड बट्टी छुड़ै, अर हमारा कुछ करयां बगैर ही पिता परमेश्वर घोषित करद कि हम धर्मी छा।

²⁵वे तैं पिता परमेश्वर ल यीशु मसीह का ल्वे का कारण एक इन प्रायश्चित बलिदान ठैरे, जु विश्वास कन से पूरी हूंद, कि जु पाप पैली बगत मा किये गैनी, अर जौं पर पिता परमेश्वर ल अपड़ी सहनशील हूंणा का कारण ध्यान नि दींनि अर माफ कैर दींनि; ऊंका बारा मा उ अपड़ी धार्मिकता प्रगट कैरो।

²⁶बल्कि यु ही बगत वेकी धार्मिकता प्रगट हो कि ज्यांसे उ अफी धर्मी ठैरु, अर जु यीशु पर विश्वास कैरो, वेको भि धर्मी ठैरांण वलो हो।

²⁷त क्य इन कुछ च, जैका बारा मा हम घमण्ड कैर सकदा? वेकी त कुई जगह ही नि च। कै नियम का कारण बट्टी? यु क्य कारण च कि हम परमेश्वर की व्यवस्था कु पालन करदां? न, पर यु यीशु मसीह मा हमारा विश्वास का कारण बट्टी च।

²⁸इलै हम जंणदा छा कि हम यीशु मसीह मा भस विश्वास ही बट्टी पिता परमेश्वर का दगड़ी धर्मी ठैरदा, न कि मूसा कि व्यवस्था का पालन कना का द्वारा।

²⁹किलैकि पिता परमेश्वर भस यहूदियों कु ही परमेश्वर नि च, बल्कि उ अन्यजातियों कु भि परमेश्वर च।

³⁰किलैकि एक ही पिता परमेश्वर च, जु खतनावला तैं विश्वास बट्टी अर खतनाराहितों तैं भि विश्वास का द्वारा धर्मी ठैरांद।

³¹त क्य हम मूसा की व्यवस्था पर विश्वास का द्वारा अंत कैरी दींदयां? न! बिल्कुल न! पर हम त व्यवस्था तैं वेको सही महत्व दींणा छा जु पिता परमेश्वर ल मूसा का द्वारा द्ये।