Read Garhwali रोमियों 4 Bible Online

रोमियों 4 - Garhwali bible

रोमियों 4

¹अब हम ल यहूदी हूंणा का खातिर अपड़ा पूर्वज अब्राहम का बारा मा क्य बुल्ण? कि उ कै कारण से धर्मी गिणे गै?

²किलैकि जु अब्राहम अच्छा कामों बट्टी धर्मी ठैरे गै, त वे तैं घमण्ड कनु कु कारण हूंद, उ अपड़ा अच्छा कामों का बारा मा पिता परमेश्वर का संमणी घमण्ड नि कैर सकद।

³परमेश्वर कु वचन क्य बुल्द? परमेश्वर ल जु वादो कैरी छो वे पर अब्राहम ल विश्वास कैरी अर यां पर परमेश्वर ल वे तैं धर्मी ठैरे।

⁴काम कन वलो कि मजदूरी दींण दान न, बल्कि हक समझे जांद।

⁵पर जु पिता परमेश्वर का दगड़ी लायक ठैरे जांण कु काम नि करदो बल्कि बुरा लुखुं कु धर्मी ठैरांण वला पिता परमेश्वर पर विश्वास करदो, वे मनिख कु विश्वास वेको धार्मिकता गिणे जांद।

⁶इन कै ही राजा दाऊद कु लिख्युं च, कि परमेश्वर कन वे मनिख तैं आशीष दींद, जै बट्टी पिता परमेश्वर कामों का बगैर धर्मी ठैैरांदो।

⁷“धन्य छिन उ, जौं का अधर्म परमेश्वर ल माफ कैरेनी, अर जौं का पाप माफ किये गैनी।

⁸धन्य च उ मनिख जै को पापों कु लैख पिता परमेश्वर नि ल्यो।”

⁹त यु धन्य वचन, क्य खतना वलो कु ही च, या खतनारहित वलो कु भि? हम उ ही बुल्ण छा जु परमेश्वर कु वचन बुल्दो, “अब्राहम ल विश्वास कैरी, अर इलै परमेश्वर ल वे तैं धर्मी ठैरे।”

¹⁰त यु कब हवे? उ अब्राहम को खतना किये जांण से पैली हवे, न कि वेको खतना हूंणा का बाद; खतना की दशा मा न पर खतना हूंण से पैली हवे छो।

¹¹पिता परमेश्वर ल वे तैं पैली ही अपणैयले छो अर वे तैं धर्मी मांणी येलि छों, जबकि उ अभि भि खतनारहित ही छो। खतना कु चिन्ह स्वीकार कनु कु मुहर च। इलै उ ऊंको आत्मिक बुबा च, जु विश्वास करदींनि। पर ऊंको खतना नि हवे उ अपड़ा विश्वास का कारण धर्मी गिणै जयदींनि।

¹²अर अब्राहम खतना करयां लुखुं कु पूर्वज च, जु न भस खतना पर आस रखदा हो, पर जौं मा उन ही विश्वास हो, जन हमारा पूर्वज अब्राहम कु छो, जु वेल खतना कन से पैली कैरी छो।

¹³पिता परमेश्वर ल अब्राहम अर वेका वंशजों बट्टी करार कैरी छै कि उ ऊं तैं या दुनिया दयालो। यु वादा इलै नि कैरी किलैकि अब्राहम व्यवस्था कु पालन कैरी, पर पिता परमेश्वर ल वेका विश्वास का कारण वे तैं धर्मी मंणै गै छो।

¹⁴जु अब्राहम अर वेका वंशजों तैं यु करार यु कारण दिये गै किलैकि ऊंल भि व्यवस्था कु पालन कैरी, त विश्वास बेकार अर करार बेकार ही रै।

¹⁵परमेश्वर वे पर गुस्सा हूंद जु यु तैं पूरी ढंग से नि मंणदु; अर जख व्यवस्था नि च उख व्यवस्था कु उल्लंघन भि नि हूंद।

¹⁶इलै लुखुं तैं विश्वास का द्वारा पिता परमेश्वर की करार मिली। इन इलै हूंद कि करार दया बट्टी मिलो। तब अब्राहम की सभि सन्तानोंं तैं व करार प्राप्त हवे सकद। यु भस ऊं कु नि च जु मूसा कि व्यवस्था का अधीन रौंदो, बल्कि हर वे मनिख कु च जु अब्राहम का जन विश्वास बट्टी ज्यूंदींनि, जु हम सभियूं कु पूर्वज च।

¹⁷जन पिता परमेश्वर का वचन मा लिख्युं च, “मिल त्वे तैं भौत सी अन्य-जाति कु पूर्वज ठैरे” परमेश्वर कि नजरों मा अब्राहम हमारो पिता च। वेल वे परमेश्वर पर भरोसो कैरी, जु मुर्दों तैं ज्यून्दों करदो अर ऊं चीजों तैं भि अस्तित्व मा लांदो जै को कुई अस्तित्व ही नि च।

¹⁸पिता परमेश्वर ल अब्राहम मा बोलि कि वेका भौत वंशज होला अर उ भौत सी अन्य-जातियों कु बुबा होलो, बल्कि सब कुछ यु दिखांणु च कि उ भौत लुखुं कु बुबा नि बंणि सकदो, पर वेल विश्वास कन नि छोड़ी अर आस नि ख्वै।

¹⁹अब्राहम ल देखि कि उ सन्तान पैदा कनु कु भौत बुढया च किलैकि उ लगभग सौ बरस कु हवे गै छो। सारा भि अब सन्तान तैं जन्म नि दे सकदी छै, पर अब्राहम अपड़ा विश्वास मा कमजोर नि पोड़ी।

²⁰अर न अविश्वासी हवे के पिता परमेश्वर की करार पर शक कैरी बल्कि विश्वास मा मजबूत हवे के पिता परमेश्वर कि बड़ै कैरी।

²¹पर निश्चित जांणि की जैं बात कि पिता परमेश्वर ल करार कैरी छै, उ वे तैं पूरो कन मा भि सामर्थी च।

²²वेका विश्वास का कारण, यु वेकु धार्मिकता गिणै गै।

²³अर यु वचन, “विश्वास वेकु धार्मिकता गिणै गै” न बल्कि वे कु लिखै गै,

²⁴बल्कि हम कु भि जूं कु विश्वास धार्मिकता गिणै जौं, मतलब हम कि जु परमेश्वर पर विश्वास करुला, जैल हमारा प्रभु यीशु तैं मुर्दों मा बट्टी ज्यूँदो कैरी, त हम भि विश्वास का कारण धर्मी मंणै जौला।

²⁵मसीह यीशु हमारा पापों कु मरै जांणु कु पकड़वै गै अर परमेश्वर ल हम तैं अफ दगड़ी धर्मी बनांणु कु वे तैं फिर से ज्यूँदो कैरी।