Read Garhwali रोमियों 5 Bible Online

रोमियों 5 - Garhwali bible

रोमियों 5

¹इलै हम विश्वास ल धर्मी ठैरा, किलैकि जु प्रभु यीशु मसीह ल हम कु कैरी, वेका द्वारा हम पिता परमेश्वर का दगड़ी शान्ति मा रां,

²हमारा विश्वास का कारण, मसीह ल हम तैं इन दया मा लये जख हम अब खड़ा छा, अर हम विश्वास अर आनन्द का दगड़ी पिता परमेश्वर कि बड़ै तैं साझा कनु कु आस दिखणां छा।

³भस यु ही न, बल्कि जब हम क्लेश मा हुंदा, तब भि आनन्दित हवे सकदा, किलैकि हम जंणदा छा कि हम दुःख उठौदयां त अच्छा ढंग से सब्र रखण सिखदा भि छा,

⁴अर परमेश्वर हम तैं अपणौद किलैकि हम ल धीरज रखण सिख्यूं च, इलै हम तैं आस च;

⁵अर आस बट्टी निराशा नि हूंदी, किलैकि पवित्र आत्मा जु पिता परमेश्वर ल हम तैं दीं च, वेका द्वारा परमेश्वर कु प्रेम हमारा मनों तैं अपड़ा प्रेम बट्टी भुरद।

⁶किलैकि जब हम कमजोर ही छा त मसीह ठिक बगत मा पापियों कु मोरि।

⁷कै धर्मी जन कु कुई मोरो, यु त असम्भव च; पर कि जांण कै भला मनिख कु कुई मुरणो कु हिम्मत दिखौ।

⁸पर पिता परमेश्वर हम पर अपड़ा प्रेम कि भलै की ईं रीति तैं प्रगट करदो, कि जब हम पापी ही छा तभि मसीह हम कु मोरि।

⁹किलैकि हम परमेश्वर का दगड़ी धर्मी ठैरला किलैकि मसीह हम कु मोरि अर हमारा पापों कु अपड़ो ल्वे बुगै। त मसीह हम तैं निश्चित रूप बट्टी पिता परमेश्वर का गुस्सा बट्टी बचालो।

¹⁰किलैकि जब हम पिता परमेश्वर का दुश्मन छा त वेका नौंना मसीह यीशु कि मौत का द्वारा हमारो मेल मिलाप परमेश्वर का दगड़ी हवे, इलै हम निश्चित रूप बट्टी यु जांणि सकदा छा कि अब जबकि हमारो वे दगड़ी मेल मिलाप च त उ हम तैं बचालो किलैकि मसीह ज्यूंदों च।

¹¹अर भस इथग ही न, अब त हमारा प्रभु यीशु मसीह का द्वारा पिता परमेश्वर बट्टी हमारो मेल हवे गै; इलै हम पिता परमेश्वर मा आनन्दित छा।

¹²इलै कि जन एक मनिख का द्वारा पाप दुनिया मा ऐ मतलब आदम का द्वारा, उ पैलो मनिख जै तैं पिता परमेश्वर ल बंणै, किलैकि आदम ल पाप कैरी, अर उ मोरि गै, अर इन ही बट्टी मृत्यु सब लुखुं मा फैली गै, किलैकि सभि लोग आदम कि सन्तान छिनी, इलै जब आदम ल पाप कैरी त सभियूं ल पाप कैरी अर पापमय स्वभाव कु संचार हूंदी गै।

¹³मूसा की व्यवस्था दिये जांण से पैली भि लुखुं ल पाप कैरी, पर यु तैं पाप का रूप मा नि गिणै गै किलैकि अब तक उल्लंघन कनु कु कुई व्यवस्था नि छै।

¹⁴तब भि आदम बट्टी लै के मूसा तक लुखुं ल व्यवस्था का विरुद्ध पाप कैरी अर उ सब मोरि गैनी, आदम का पापों ल सब लुखुं तैं प्रभावित कैरी, ठिक उन ही जन मसीह ल कैरी, जु बाद मा ऐ, उ भि सभि लुखुं तैं प्रभावित करद।

¹⁵पर आदम कु पाप वे वरदान का जन नि च जु पिता परमेश्वर हम तैं अपड़ा दया ल दींद। किलैकि एक मनिख कु पाप भौत लुखुं कु मृत्यु ले के ऐ पर परमेश्वर कि दया अर धार्मिकता कु वरदान जु वेल हम तैं द्ये, वेको दाम भौत लुखुं कु वे बट्टी कई जादा च। अर यीशु मसीह ल एक मनिख का रूप मा अपड़ी दया बट्टी जु कैरी, वेल यु तैं सम्भव कैरी।

¹⁶पिता परमेश्वर ल जु वरदान हम तैं दियुं च उ आदम का पाप का जन नि च, किलैकि एक मनिख कु पाप भंगार लै, पर चै हम ल भौत पाप कैरी, फिर भि पिता परमेश्वर ल हम तैं अपड़ी दया से इन वरदान दींनि जैल हम तैं वे नजरों मा धर्मी बणै दींनि।

¹⁷किलैकि जब एक मनिख का पाप का कारण सभि लुखुं कु मृत्यु ऐ, त जु लोग दया अर धर्मी हूंण कु वरदान बिज्यां पौदींनि, उ एक मनिख का यानि यीशु मसीह का द्वारा पाप अर मृत्यु पर जीत पाला।

¹⁸इलै जन एक पाप सभि मनिख्युं कु दण्ड कि आज्ञा का कारण हवे, उन ही एक धार्मिकता कु काम भि सभि मनिख्युं कु धर्मी बनण का अर अनन्त जीवन पांण कु कारण बंणि।

¹⁹किलैकि जन एक मनिख का आज्ञा नि मनणा का कारण भौत लोग पापी ठैरिनि, उन ही एक मनिख की आज्ञा मणनं से भौत लोग धर्मी ठैराये जाला।

²⁰परमेश्वर ल व्यवस्था इलै दींनि कि लोग अर जादा पाप कैरा, जब लुखुं ल जादा से जादा पाप कैरी, पिता परमेश्वर ल जु दया दिखै उ जादा से जादा हवे,

²¹कि जन सभि लुखुं ल पाप कैरी अर उ सभि मोरि गैनी, उन ही हमारा प्रभु यीशु मसीह का द्वारा पिता परमेश्वर की दया ऊं तैं धर्मी अर ऊं तैं अनन्त जीवन द्याली।