Read Garhwali रोमियों 8 Bible Online

रोमियों 8 - Garhwali bible

रोमियों 8

¹यु कारण अब जु मसीह यीशु मा च, ऊं पर दंड की आज्ञा नि च।

²पवित्र आत्मा जु मसीह यीशु का तरपां बट्टी आंदो उ तुम तैं जीवन दयालो अर तुम तैं पाप अर मृत्यु की व्यवस्था बट्टी आजाद करलो।

³किलैकि जु काम मूसा कि व्यवस्था हमारा पापमय स्वभाव बट्टी कमजोर हवे कै नि कैर साकी, वे तैं पिता परमेश्वर ल कैरी, मतलब अपड़ा ही नौंना मसीह यीशु तैं हमारा पापी देह का समान बणै के, अर हमारा पापों कु बलिदान हूंणु कु भेजि द्ये अर अपड़ा नौंना का देह का बदला मा पिता परमेश्वर ल पाप सामर्थ तैं तोड़ी द्ये।

⁴इलै व्यवस्था कि मांग हम मा बट्टी जु पापमय स्वभाव का अनुसार नि च बल्कि पवित्र आत्मा का अनुसार चलदींनि, पूरी कैरे जाली।

⁵उ लोग जु पापमय स्वभाव का अनुसार काबू मा हूंदींनि उ पापमय बातों का बारा मा सुचदींनि, पर उ जु पवित्र आत्मा का द्वारा नियंत्रित हूंदींनि ऊं बातों का बारा मा सुचदींनि जु पवित्र आत्मा तैं खुश करदी।

⁶अपड़ा पापमय स्वभाव तैं अर अपड़ा मन तैं काबू कन दींण मौत कि तरपां लिजांद; पर पवित्र आत्मा तैं अपड़ा मन तैं काबू कन बट्टी जीवन अर शान्ति मिलदी।

⁷किलैकि पापी स्वभाव का अनुसार जीवन जींण पिता परमेश्वर बट्टी बैर रखण च, किलैकि न त पापी स्वभाव पिता परमेश्वर की व्यवस्था का अधीन च, अर न व्यवस्था कु पालन कैर सकद।

⁸अर जु पापमय स्वभाव का काबू मा च, उ पिता परमेश्वर तैं खुश नि कैर सकदींनि।

⁹पर जबकि परमेश्वर कु पवित्र आत्मा तुम मा वास करदो, त तुम पापमय स्वभाव का काबू मा नि छा, पर पवित्र आत्मा का काबू मा छा। जु कै मा मसीह कु आत्मा नि च त उ मसीह बट्टी सम्बन्धित नि च।

¹⁰जु मसीह तुम मा च, त पाप का कारण देह का मुरयां हूंण पर भि धार्मिकता का कारण तुम्हरी आत्मा ज्यूंदी च।

¹¹अर जु पिता परमेश्वर कु पवित्र आत्मा जैल यीशु तैं मुर्दों मा बट्टी ज्यूँदो कैरी तुम मा बस्युं च; त जैल मसीह तैं मुर्दों मा बट्टी ज्यूँदो कैरी, जु तुम मा बसयूं च उ तुम्हरा नाशवान देह तैं भि अपड़ा आत्मा का द्वारा ज्यूँदो करलो।

¹²त हे विश्वासी भयों, हम तैं आज्ञा मनणु चयणी च पर वे तैं न जु हमारो पापी स्वभाव चांद की हम कैरा।

¹³किलैकि जु तुम अपड़ा पापमय स्वभाव का अनुसार ज्यून्दा, त आत्मिक मृत्यु का अनुसार मुरला, पर जु आत्मा की सामर्थ का द्वारा तुम उ कन बंद कैरी दींद जु तुम्हरो पापमय स्वभाव चांद, त ज्यूंदा रैल्या।

¹⁴इलै कि जथग लोग परमेश्वर की आत्मा का अनुसार चलये चलदींनि, उ ही पिता परमेश्वर की सन्तान छिनी।

¹⁵किलैकि तुम तैं गुलामी की आत्मा नि मिली, गुलाम जु पिता परमेश्वर बट्टी डरदा छिनी, पर जब पिता परमेश्वर ल तुम तैं अपड़ी सन्तान का रूप मा स्वीकार कैरी त तुम तैं परमेश्वर कि आत्मा मिली, ज्यां बट्टी हम हे बुबा, हे पिता बोलि के बुलौंदियां।

¹⁶पवित्र आत्मा अफी हमारी आत्मा का दगड़ी गव्है दींद, कि हम परमेश्वर कि सन्तान छा।

¹⁷अर जु सन्तान छा, त वारिस भि छा, बल्कि परमेश्वर का वारिस अर मसीह का संगी वारिस छा। जु हम यीशु का जन दुःख सौला, त हम वेकी बड़ै मा भि हकदार हूला।

¹⁸मि तैं पता च, कि मि कु या बात साफ च कि जु बडै पिता परमेश्वर हम तैं बाद मा दयालु, उ दुःख वे बट्टी बड़ो च जु हम अब सौणा छा।

¹⁹किलैकि सैरी सृष्टि बड़ा आशा का दगड़ी वे बगत कु इन्तेजार कनी च, जब पिता परमेश्वर अपड़ी सच्ची सन्तानों तैं प्रगट करलो।

²⁰किलैकि जु कुछ भि पिता परमेश्वर ल बंणै वेल अपड़ी कीमत खोयले, इलै कि उ खुद इन नि चांदा छा, पर इलै कि पिता परमेश्वर ल इन कैरी अर हम तैं आस भि च।

²¹सृष्टि वे दिनों कु जग्वाल कनि च जब उ मृत्यु अर विनाश बट्टी छुटी के पिता परमेश्वर की सन्तानोंं का दगड़ी महिमामय आजादी मा शामिल हवे जाली।

²²किलैकि हम जंणदा छा, कि सबसे पैली आदम ल पाप कैरी, तब बट्टी ले के अब तक पिता परमेश्वर द्वारा किये गै सैरी सृष्टि एक जनन का जन पिड़ा सौणी च जन पिड़ा वीं तैं बच्चा तैं जन्म दींण पर हूंदी।

²³अर उ भस दुनिया ही न जु कि कणांणी च, न पर हम भि, जै मा हूंण वली बडै का पैली बट्टी स्वाद चखण का रूप मा पवित्र आत्मा कु निवास च, अफी अपड़ा मा कणांणी च; हम भि वे दिन कु उत्सुकता का दगड़ी जग्वाल कना छा जब परमेश्वर हम तैं अपड़ा गोद लियां बच्चों का रूप मा हम तैं पूरो हक दयालो, मतलब की अपड़ा देह का छुटकारा की जग्वाल कना छा।

²⁴अब जब पिता परमेश्वर ल हम तैं बचै, त हम मा य आस च। पर जब तुम कुछ पांणै की इच्छा कना छा जु तुम मा पैली बट्टी च, त उ आस नि च। कुई भि वीं चीज तैं पांणै की इच्छा नि करद जु पैली बट्टी ही वेमा ही छिनी।

²⁵पर हम तैं कुछ इन मिलणै की आस च जु हम मा अभि तक नि च, इलै हम धीरज का दगड़ी तब तक इन्तेजार करद्यां जब तक ही हम वे तैं नि पै ल्या।

²⁶ईं रीति ल पवित्र आत्मा भि हमारी मदद करद; जब परमेश्वर मा हमारो भरोसो कमजोर हूंद, किलैकि हम नि जंणदा, कि प्रार्थना कन कै कन चयणी च; पर पवित्र आत्मा अफी इन्दरी आह भौरि-भौरि के जु कि बतांण से भैर च, हम कु बिनती करद।

²⁷अर पिता परमेश्वर जु मनों तैं जंणदु च, कि पवित्र आत्मा कि क्य मनसा च? किलैकि उ पवित्र लुखुं कु पिता परमेश्वर कि मनसा का अनुसार बिनती करदो।

²⁸हम जंणदा छा, कि जु लोग परमेश्वर बट्टी प्रेम रखदींनि, मतलब ऊंकु ही जु वेकी ही इच्छा का अनुसार चलदींनि जूं तैं वेको चुणयूं च, ऊं लुखुं कु पिता परमेश्वर सभि बातों कु भलै कु ही करद,

²⁹किलैकि जौं तैं वेल पैली बट्टी ही चुणयली ऊं तैं पैली बट्टी ही ठैराये गै कि वेका नौंना का स्वरूप मा हो कि उ सभि विश्वासी भयों मा पैलो नौंना का जन हवे जौं।

³⁰फिर जौं तैं वेल पैली बट्टी ठैराये, ऊं तैं चुणि भि च, अर जौं तैं चुणयूं च, ऊं तैं धर्मी भि ठैराये, अर जौं तैं धर्मी ठैराये, ऊं तैं अपड़ी बडै मा भि हकदार बंणै।

³¹त हम यूं बातों का बारा मा क्य बोला? जु पिता परमेश्वर हमारी तरपां च, त कुई भि हम तैं हरै नि सकद।

³²पिता परमेश्वर ल अपड़ा एकलौता नौंना यीशु मसीह तैं भि नि रख छोड़ी, पर वे तैं हम पर कृपा कैरी के अपड़ा दुश्मनों तैं सौंपी दींनि, उ हम तैं उ सब कुछ भि दयालो जु वेल हम बट्टी करार कैरी छै।

³³कुई भि हम पर पिता परमेश्वर का संमणी भंगार नि लगै सकदो किलैकि उ ऊई च जु हम तैं अफ दगड़ी धर्मी ठैरांण वलो च।

³⁴कुई भि हमारी निंदा नि कैर सकद किलैकि उ यीशु मसीह च, जु हम कु मोरि गै अर मुर्दों मा बट्टी ज्यूँदो भि किये गै, अर पिता परमेश्वर की दैंणी तरपां च, अर जु हमारी तरपां बट्टी पिता परमेश्वर बट्टी बिनती करदो।

³⁵कुई भि हम तैं मसीह का प्रेम बट्टी अलग नि कैर सकद। क्य क्लेश, या संकट, या घपरौल, या अकाल, या नंगुपन, या खतरा, यूं मा बट्टी एक भि हम तैं मसीह का प्रेम बट्टी अलग नि कैर सकलो।

³⁶जन परमेश्वर का वचन मा लिख्युं च, “पिता परमेश्वर का वचन कु लोग हम तैं हर दिन जान से मरणै की धमकी दींदिनि; हम बलि हूंण वला ढिबरों का जन गिणै ग्यां।”

³⁷पर यूं सभि बुरी बातों मा हम वेका द्वारा जैल हम बट्टी प्रेम कैरी, इलै जीत पूरा ढंग से हमारी च।

³⁸किलैकि मि निश्चित छौं, कि कुछ भि अर कुई भि हम तैं मसीह का प्रेम बट्टी कनु दूर ली जांण मा सक्षम नि च; इलै कुछ फर्क नि पुड़दो कि हम मुरणा छा या हम ज्यूंदा छा; स्वर्गदूत, शासक अर सामर्थ जु स्वर्ग मा च हम तैं वेका प्रेम बट्टी अलग नि कैर सकद, अर वे बट्टी भि जु अब हूंणु च अर भविष्य मा जु होलो, सैरी सृष्टि मा सब कुछ हम तैं वेका प्रेम बट्टी अलग नि कैर सकदो।

³⁹न गहराई, न सृष्टि, न कुई, हम तैं पिता परमेश्वर का प्रेम बट्टी, जु हमारा प्रभु यीशु मसीह मा च, अलग नि कैर सकली।