Read Garhwali रोमियों 9 Bible Online

रोमियों 9 - Garhwali bible

रोमियों 9

¹मि मसीह तैं गव्हा मांणी कै सच बुल्णु छौं। जैको पवित्र आत्मा अर मेरू विवेक गव्है दींणु च की यु झूठ नि च।

²कि मि तैं ऊंकु भौत दुःख च, अर हमेशा मेरा दिल मा मेरा लुखुं कु हर बगत मि तैं पिड़ा महसूस हूंदी।

³किलैकि मि इख तक चांदु छो, कि अपड़ा यहूदी विश्वासी भयों उद्धार पांण कु जु मेरा अपड़ा कुटुंब का भाव बट्टी मेरा कुटुंब छिनी, अफी ही मसीह बट्टी परमेश्वर मि तैं श्राप द्ये अर अलग हवे जांदु।

⁴उ इस्राएली ही छिनी, ऊं तैं पिता परमेश्वर ल गोद लियुं च अर ऊं तैं सन्तानोंं का रूप मा चुणै गै अर महिमा, वाचा, मूसा द्वारा लिखीं परमेश्वर की व्यवस्था, उ सचै बट्टी पिता परमेश्वर कि आराधना करदींनि, अर प्रतिज्ञा ऊंकी ही छिनी।

⁵अब्राहम, इसहाक अर याकूब ऊंका पूर्वज छिनी, अर जख तक मनिख स्वभाव कु संबंध च, मसीह खुद एक इस्राएली छों, पिता परमेश्वर जु सब पर राज्य करदो, वेकी हमेशा कु बडै हूंदी रौ। आमीन।

⁶पर इन न, कि पिता परमेश्वर कु वादा पूरो नि हवे साकी, किलैकि सभि इस्राएल का वंशज सच मा पिता परमेश्वर का लोग नि छिनी;

⁷अर अब्राहम का वंश मा जन्म लींण से ही सभि ऊंकी सच सन्तान नि हवे जंदींनि, किलैकि पिता परमेश्वर ल अब्राहम बट्टी बोलि, जु इसहाक का वंश मा जन्म लींदींनि उ ही तेरु वंशज मंणै जाला।

⁸इलै जु वंश देह का अनुसार जन्म लींदींनि उ पिता परमेश्वर की संतान नि छिनी, पर भस करार की संतान ही अब्राहम की संतान मंणै जयदींनि।

⁹किलैकि करार कु वचन यु च, “मि हैंका साल यु बगत ही दुबरा औलु अर तब सारा कु एक नौंनो होलो।”

¹⁰अर भस यु ही न, पर रिबका का गर्भ मा एक ही पुरुष, मतलब हमारा पूर्वज इसहाक बट्टी जवांलयां नौंना हवेनि।

¹¹पैदा हूंण बट्टी पैली पिता परमेश्वर ल रिबका बट्टी बोलि छों, कि ऊंको बड़ो नौंनो छुटा की सेवा करलो। प्रभु अपड़ी पसंद खुद बंणौदु यु दिखांणु कु वेल यु बोलि, कि जु ऊंल कैरी यु कै भि काम का कारण नि छों पर परमेश्वर कु उद्देश्य ऊंकी ही इच्छा का अनुसार बुलांण वलो पर बंणि रौ।

¹²वेल बोलि, “जेठो नौंनो कंणसा नौंनो कु दास होलो।”

¹³जन परमेश्वर का वचन मा लिख्युं च, “मिल याकूब बट्टी प्रेम कैरी, पर एसाव तैं अप्रिय जांणि।”

¹⁴त हम ल यूं बातों का बारा मा क्य बुल्ण? क्य पिता परमेश्वर अन्यायी च जब उ जै तैं चौ चुणदो? न! बिल्कुल न।

¹⁵किलैकि पिता परमेश्वर मूसा बट्टी बुल्द, “मि जै कै पर दया कन चौलु, वे पर दया करुलु, अर जै कै पर कृपा कन चौं वे पर ही कृपा करुलु।”

¹⁶त पिता परमेश्वर वे मनिख तैं चुणलो जै पर उ दया दिखांणु कु फैसला लींद; वेकी पसंद ईं बात पर निर्भर नि करदी कि लोग की चंदींनि या क्य कने की कोशिश करदींनि।

¹⁷किलैकि पिता परमेश्वर का वचन मा मिस्र देश का राजा फिरौन बट्टी बुलै गै, “मिल त्वे तैं इलै राजा नियुक्त कैरी, कि त्वे तैं अपड़ी सामर्थ दिखौं अर मेरा नौं कु प्रचार ईं दुनिया का सैरा लुखुं का बीच मा हो।”

¹⁸त फिर, उ जै पर चांदो, वे पर दया करदो; अर जै तैं चांदो वे तैं जिद्दी बंणै दींद।

¹⁹तब कुछ लोग मि बट्टी बुलला; “जु इन च त पिता परमेश्वर कन बोलि सकदो कि हम गलत छा? किलैकि उ जु चांदो वे तैं कनु कु कुई नि रोक सकदो।”

²⁰हे दगड़िया, तु कु छै? जु पिता परमेश्वर बट्टी सवाल कनी छै, क्य बंणई चीज बनांण वला बट्टी पूछि सकदी, “तिल मि तैं इन किलै बंणै?”

²¹क्य कुमार तैं माटा पर अधिकार नि च, कि एक ही चाक मा बट्टी, एक भांडों अच्छा काम कु, अर दूसरो अनादर का काम कु?

²²कि पिता परमेश्वर ल अपड़ो गुस्सा दिखांणु अर अपड़ी सामर्थ प्रगट कने की इच्छा बट्टी गुस्सा का मनिख्युं तैं जु भांडों का जन छिनी, जौं तैं नाश कन तय कैरे गै।

²³वेल इन इलै कैरी, किलैकि उ दिखण चांदु छो, कि उ कथग महान च जब वेल ऊं लुखुं पर दया कैरी जौं तैं वेल अपड़ी महिमा मा भागिदार हूंणु कु पैली चुणि।

²⁴यानि हम पर जौं तैं वेल न भस यहूदियों मा बट्टी बल्कि अन्यजातियों मा बट्टी भि चुणि।

²⁵अन्यजातियों का बारा मा, पिता परमेश्वर कि तरपां बट्टी बुल्ण वला होशे की किताब मा लिख्युं च, “ज्वा मेरी प्रजा नि छै, ऊं वीं तैं मि अपड़ी प्रजा बुललु, अर ज्वा प्यारी नि छै, वीं तैं प्यारी बुललु;

²⁶अर जैं जगह मा पिता परमेश्वर ल बोलि, तुम मेरा लोग नि छा, उखि मा ज्यूँदो परमेश्वर ऊं तैं अपड़ी सन्तान बुललो।”

²⁷इस्राएल का लुखुं का बारा मा परमेश्वर कि तरपां बट्टी बुल्ण वलो यशायाह चिल्लै कै बुल्णु च, “चै इस्राएल का लुखुं की गिणती समुद्र का किनारा बल्ला का जन हो, तब भि ऊंमा जरा ही बचला।

²⁸किलैकि प्रभु जल्द ही, अर एक ही बार मा हमेशा कु, धरती पर का सभि लुखुं कु न्याय करलो।”

²⁹जन परमेश्वर कि तरपां बट्टी बुल्ण वला यशायाह ल पैली भि बोलि छो, “जु प्रभु सर्वशक्तिमान ल हम तैं वंशज हूंणै कि अनुमति नि दीं हूंदी, त हम सदोम अर अमोरा शहरों का लुखुं का जन बंणि जांदा, जौं तैं परमेश्वर ल पूरा ढंग से नष्ट कैरी द्ये।”

³⁰त हम ल यांका बारा मा क्य बुल्ण? अन्यजाति अफ तैं पिता परमेश्वर का दगड़ी धर्मी रखणै कि कोशिश नि कना छा, पर पिता परमेश्वर ल ऊं तैं खुद का दगड़ी धर्मी रखि किलैकि ऊंल वे पर भरोसो कैरी छों;

³¹पर इस्राएल का लोग, उ मूसा की व्यवस्था तैं मांणी कै पिता परमेश्वर का अनुसार धर्मी घोषित हूंण चंदींनि, ऊंल वीं धार्मिकता तैं नि पै।

³²यु कन कै हवे सकद? इलै कि उ विश्वास बट्टी न, पर भला कर्मों बट्टी वेकी खोज करदां छा; ऊंल मसीह तैं ठुकरै दे जु वे ढुंगा का जन च जु लुखुं तैं ठोकर दिलांद।

³³जन परमेश्वर का वचन मा लिख्युं च, “देखा मि सिय्योन मा ठोकर लगण वला ढुंगो, अर लुखुं तैं लमडांण वली चट्टान रखणु छो, अर जु वे पर विश्वास करलो, उ शर्मिंदा नि होलो।”