Read Garhwali 1 कुरिन्थियों 11 Bible Online

1 कुरिन्थियों 11 - Garhwali bible

1 कुरिन्थियों 11

¹जन मि मसीह जन अपड़ो जीवन तैं ज्यून्दों, तुम भि मि जन जीवन तैं जियां।

²मि तुम बट्टी खुश छों, किलैकि तुम मि तैं हर बगत याद करदां; अर जु शिक्षा मिल तुम तैं द्ये, ऊं तैं चौकसी ल पालन करदां।

³पर मि चांदु, कि तुम यु जणिल्यो, कि हर आदिम कु मुंड मसीह च, अर एक जनन कु मुंड वेको आदिम च, अर मसीह कु मुंड पिता परमेश्वर च।

⁴इलै जु कुई आदिम मण्डलि मा प्रार्थना करद बगत या पिता परमेश्वर का संदेश तैं सुणांद बगत अपड़ा मुंड तैं ढकांद, त उ मसीह कु अपमान करद जु वेको मुंड च।

⁵पर जु जनन मण्डलि मा बगैर मुंड ढकै के प्रार्थना या पिता परमेश्वर का सन्देश तैं सुणांद, यांको मतलब यु च कि व अपड़ा आदिम को जु वींको मुंड च अपमान करदी। व वीं जनन का जन च जीं तैं शर्मिंदा कनु कु मुंडन किये गै।

⁶जु जनन दुपट्टा नि ओढ़ो, त अपड़ा लटुलों तैं भि कटे द्यो; जु जनन बालों तैं कटांण या मुंडन कन मा शर्म समझदी, त दुपट्टा ओढ़ो।

⁷हाँ आदिमों तैं अपड़ो मुंड ढाकांणै की जरूरत नि च, किलैकि आदिम तैं पिता परमेश्वर की स्वरूप मा बणै गै, अर यु पिता परमेश्वर की महिमा तैं बतांद; पर जनन आदिम की महिमा तैं दिखांद।[28]

⁸किलैकि शुरू मा जब पिता परमेश्वर ल पैली आदिम आदम अर फिर जनन हव्वा की रचना कैरी, तब जनन का देह बट्टी आदिम की रचना नि हवे, पर आदिम का देह बट्टी ही जनन की रचना हवे छै।[29]

⁹अर आदिम तैं जनन की मदद कु नि बणये गै, पर जनन तैं आदिम की मदद कु बणये गै छों।[30]

¹⁰ईं वजह से, कि एक जनन तैं अपड़ा मुंड तैं ढ़कण जरूरी च कि स्वर्ग मा ईश्वर का स्वर्गदूतों तैं भि पता चलि साका कि जनन अपड़ा आदिम कु बुल्युं मनणी च।

¹¹हम विश्वासियों का जीवन मा हलांकि न त जनन आदिम बट्टी आजाद च अर न ही आदिम जनन बट्टी आजाद च।

¹²किलैकि, पिता परमेश्वर ल पैला आदिम बट्टी पैली जनन बणै, पर अब आदिम तैं जन्म दींण वली जनन ही छिनी, उन ही आदिम, जनन का द्वारा; पर सभि कुछ पिता परमेश्वर बट्टी ही छिनी।

¹³मि चांदु कि तुम अफी ही तय कैरा; जु एक जनन मण्डलि मा वीं का मुंड ढ़कण का बगैर ही पिता परमेश्वर बट्टी प्रार्थना करदी, त क्य व एक शर्म कु बरतौ नि करदी?

¹⁴क्य स्वभाविक रीति ल भि तुम नि जणदां, कि जु आदिम लम्बा बाल रखदो, त वेको यु अपमान च।

¹⁵पर जु जनन लम्बा बाल रखो; त वीं कु शोभा च, जन की जननों तैं स्वभाविक रूप मा लंबा बाल दिए गैनी, उन ही सभियूं का संमणी पिता परमेश्वर की आराधना मा ऊं तैं अपड़ो मुंड ढकयूं रौंण चयणु च।

¹⁶पर जु कुई सुचद कि जु कुछ मि बुल्णु छों उ गलत च, त यु जांणो कि न हमारी अर न पिता परमेश्वर की मण्डलि मा कुई रिवाज नि च।

¹⁷पर यूं आदेशों का बारा मा जु मि बुल्णु छों, मि तुम्हरी बड़ै नि कैरी सकदु, इलै कि तुम्हरा कठ्ठा हूंण ल भलै न, पर बुरै ही हूंदी।

¹⁸किलैकि पैली मि यु सुणदु छो, कि जब तुम मण्डलि मा पिता परमेश्वर की आराधना कनु कु कठ्ठा हुन्दा, त तुम मा मतभेद हुन्दींनि अर मि तैं विश्वास च की ऊं की कुछ बुलीं बात सच छिनी।

¹⁹हाँ, यु सच च कि तुम्हरा बीच बंटवरो हूंण जरूरी च कि उ, जु पिता परमेश्वर द्वारा चुणयां छिनी, उज्यला मा ऐ जां।

²⁰जब तुम एक जगह मा कठ्ठा हून्दियां, तुम तैं ईं बात कि कुई चिंता नि हूंद कि हमारा प्रभु यीशु मसीह की मौत तैं याद कनु कु तुम तैं प्रभु भोज कन के खांण चयणु च।

²¹किलैकि मि तैं पता चलि, कि तुम मा बट्टी कुछ दूसरों का दगड़ी खांणु तैं बगैर बटयां अपड़ो खांणु खांणै की जल्दी करद्यां। इलै ही, कुछ भूखा चलि जंदींनि अर कुछ लोग नशा मा हवे जंदींनि।

²²जु तुम तैं लगद, कि पिता परमेश्वर की मण्डलि जरूरी नि च त तुम अपड़ा घौर मा ही खै, पी सकदियां, अर तुम ऊं लुखुं तैं शर्मिंदा करदां जु गरीब छिनी; मि तैं तुम तैं क्य बतांण चयणु च? क्य मि तैं तुम्हरी बढ़ै कन चयणी च? मि इन कामों कु तुम्हरी बढ़ै नि कैरी सकदु।

²³किलैकि जु शिक्षा मिल तुम तैं द्ये छै, उ ही शिक्षा च जु मि तैं प्रभु बट्टी मिली; कि प्रभु यीशु जीं राती पकड़वै गै, त वेल रुठी लींनि,

²⁴अर पिता परमेश्वर कु धन्यवाद कैरी के रुठी तोड़ी, अर बोलि, “य मेरी देह च, ज्वा तुम्हरा उद्धार कु बलिदान किये जांद; मेरी मौत तैं याद कनु कु इन ही कैरा करा।”

²⁵इन ही खांणु का बाद वेला प्याला ले के बोलि, त यीशु ल एक अंगूरों कु रस बट्टी भुर्युं कटोरा भि ले, अर बोलि, “यु कटोरा मेरा ल्वे मा एक नई प्रतिज्ञा च; कि जब कभी तुम पिया, त मेरी याद मा इन कैरा करा।”[31]

²⁶किलैकि हर बगत जब तुम ईं रुठी तैं खंदियां, अर यु कटोरा बट्टी अंगूरों कु रस तैं पिन्दयां, त प्रभु का आंण तक वेकी मौत कु प्रचार करदी रावा।

²⁷इलै जु कुई भि यु ढंग से जु मसीह तैं निरादर करद प्रभु की रुठी खौ, या वेका कटोरा मा बट्टी प्यो, उ प्रभु की देह अर ल्वे का विरुद्ध पापी ठैरद।

²⁸इलै मनिख अपड़ा आप तैं जाँची ल्यो कि क्य वेको अपड़ो विचार ठिक च, अर फिर उ ही रुठी बट्टी खाै, अर यु कटोरा मा बट्टी अंगूर कु रस प्यो।

²⁹किलैकि, जु कुई प्रभु का देह का दगड़ी अपड़ा रिश्तों तैं पहचनण का बगैर कटोरा मा बट्टी प्यो अर रुठी तैं खाै, उ यु खांण अर पींण से अपड़ा मथि दण्ड लांद।

³⁰यु ही कारण च, कि तुम मा बट्टी कई लोग बिमार छिनी, अर कई कमजोर अर कई लोग त मोरि भि गैनी, किलैकि य पिता परमेश्वर की सजा च।

³¹इलै, जु हम पैली अपड़ा बरतौ की जांच कैरा, त प्रभु हम तैं दंड नि दयालो।

³²पर जु प्रभु हम तैं इन कै दंड दींद, त उ हम तैं सुधरणु च, कि न्याय का दिन हम दुनिया का दुसरा लुखुं का दगड़ी जांच मा दंड नि पां।

³³इलै, हे मेरा विश्वासी भयों, जब तुम प्रभु भोज खांणु कु कठ्ठा हूंदां, त एक-दुसरा कु ठैरा कैरा, कि तुम सभि कठ्ठा खै साका।

³⁴जु कुई भुखी हो, त अपड़ा घौर मा खाै, कि जब तुम कठ्ठा हूंदियां, तुम ठिक ढंग ल बरतौ करीला अर पिता परमेश्वर तुम्हरो न्याय नि करलो। अर दुसरी बातों तैं जब मि तुम मा औलु, तभि सुलझाैलु।