Read Garhwali 1 कुरिन्थियों 13 Bible Online

1 कुरिन्थियों 13 - Garhwali bible

1 कुरिन्थियों 13

¹मि भले ही मनिख्युं अर स्वर्गदूतों की भाषाओं मा बोलु; पर जु मिल लुखुं बट्टी प्रेम नि कैरी, त ऊं भाषाओं तैं बुल्ण मि कु ठनठनांदु पीतल, अर झंझनांद ढपली जन च।

²अर जु मि भविष्यवाणी कैर साको, अर सभि भेदों अर सभि प्रकार का ज्ञान तैं समझु, अर मि तैं यख तक पिता परमेश्वर पर पूरो विश्वास च, कि मि पौड़ तैं इनां बट्टी ऊना कैरी सकदु, पर दूसरों बट्टी प्रेम नि रखु, त मेरी कुई कीमत ही नि च।

³अर जु मि अपड़ी सब धन-दौलत कंगालों तैं खिलांण मा खर्च कैरी द्यों, या यख तक की जु मि ऊं तैं मेरी देह तैं जलांणु कु दे द्या, अर दुसरो बट्टी प्रेम नि रखु त मि कु कुछ भि फैदा नि च।

⁴जु लोग दुसरा बट्टी प्रेम करदींनि, उ धीरज ल अर दया का दगड़ी काम करदींनि, प्रेम जलन नि करद, अपड़ी बड़ै नि करद।

⁵उ दुसरों का दगड़ी बुरो बरतौ नि करदींनि, प्रेम मतलबी नि हूंद, यु बल्कि खुद तैं खुश कना का बारा मा नि सुचदींनि, उ जल्दी गुस्सा नि हूंदींनि।

⁶कुकर्म बट्टी आनन्दित नि हुंदा, पर सचै बट्टी आनन्दित हूंद।

⁷उ सभि कुछ सै सकदींनि, प्रेम हम तैं हर हालत मा विश्वास रखणा का योग्य बणद, यु हम तैं पिता परमेश्वर मा अपड़ी आस बणै रखण मा लैक बणद, यु मुसिबतों अर पिड़ा का चलद भि धीरज रखण सिखांद।

⁸उ बगत आलो जब लोग पिता परमेश्वर का शुभ संदेश कु प्रचार अजांण भाषाओं मा नि करला, अर पिता परमेश्वर का बारा मा गहरा ज्ञान की तब जरुरत नि होली, बल्कि प्रेम हमेशा कु बणयूं रालो।

⁹किलैकि हमारो ज्ञान अधुरो च, अर हमारी भविष्यवाणी अधूरी।

¹⁰पर जब सर्वसिद्ध आलो, त अधुरा भि पूरो हवे जालो।

¹¹यु मनिख का विकास का जन च; जब मि एक छुटो नौंनो छो, त मि एक छुटा बच्चों का जन बात करदु छों, सुचद छो अर विचार करदु छों। पर जब मि बड़ो हवे ग्यों त मिल अपड़ा बचपना बंद कैरी करदींनि।

¹²यु जीवन मा हम सब कुछ पूरा ढंग से नि समझदां। यु कै चीज तैं अप्रत्यक्ष रूप मा शीशा मा दिखण जन च। पर जब हम स्वर्ग मा जौला, त हम सब कुछ स्पष्ट रूप मा समझुला। यु कै बट्टी अमणी-संमणी बात कन जन होलो। अब हम सब कुछ जंणदा छा जु पिता परमेश्वर हम तैं सिखांण चांद। तब हम सब कुछ पूरा ढंग से जांणि जौला, जन पिता परमेश्वर हम तैं पूरा ढंग से जंणदु च।

¹³इलै, अब यु तीन काम छिनी जु हम तैं कन चयणु च; पिता परमेश्वर पर विश्वास कन, पिता परमेश्वर का वादों मा आस रखण, अर दूसरों बट्टी प्रेम कन; पर यु तिन्युं मा, एक-दूसरों बट्टी अर परमेश्वर बट्टी प्रेम कन बढ़ि के च।