Read Garhwali 1 कुरिन्थियों 14 Bible Online

1 कुरिन्थियों 14 - Garhwali bible

1 कुरिन्थियों 14

¹एक दुसरा बट्टी प्रेम कनै कि कोशिश किया कैरा, अर आत्मिक वरदानों तैं भि पाणै कि धुन मा रावा, खास कैरी कै यु कि भविष्यवाणी कैरा।

²किलैकि जु अन्य भाषा मा बात करदो; उ मनिख्युं बट्टी न, पर पिता परमेश्वर बट्टी बात करदो; इलै की वेकी बातों तैं कुई नि समझद; किलैकि उ पवित्र आत्मा की सामर्थ का द्वारा गुप्त बातों तैं बुल्द।

³पर जु भविष्यवाणी करद, उ (विश्वासियों) तैं विश्वास मा मजबूत कन मा मदद करदो, हिम्मत अर तसल्ली दींण कु मदद करद।

⁴जु अन्य भाषा मा बात करदो, उ भस अपड़ा ही विश्वास तैं मजबूत करदो; पर जु भविष्यवाणी करदो, उ मण्डलि का सभि विश्वासियों का विश्वास तैं मजबूत करदो।

⁵मि चांदु छों, कि तुम सब अन्य भाषाओं मा बात कैरा, पर ज्यादातर यु चांदु छों, कि भविष्यवाणी कैरा; किलैकि अन्य भाषा बुल्ण वलो मनिख ईं बातों कु अनुवाद नि करदु कि उ मण्डलि मा विश्वासियों का विश्वास तैं मजबूत कन कु क्य बुल्दो, त जु मनिख भविष्यवाणी करदो वे अन्य भाषा बुल्ण वला बट्टी, जु अनुवाद करयां बगैर अन्य भाषा मा बात करद, बढ़िया च किलैकि अनुवाद किये जांण पर ही मण्डलि की उन्नति सम्भव हवे सकद।

⁶इलै हे मेरा विश्वासी भयों, जु मि तुम मा ऐ के अन्य भाषा मा बात कैरू, त मि तैं तुम बट्टी क्य फैदा होलो? पर जु मि तुम कु उ वचन द्यो जु पिता परमेश्वर ल मि तैं द्ये, यु सचो ज्ञान, या भविष्यवाणी अर शिक्षा प्रदान कैरी, त मेरा बुल्ण से तुम तैं क्य फैदा होलो?

⁷इन ही कै जब तुम बंसुरी अर वींणा जन बाजों तैं बजंदयां, जु तुम धुन ठिक से नि बजंदयां, त दुसरों तैं पता नि चललो कि उ क्य धुन बजांणु च।

⁸अर जु तुरै कु शब्द साफ नि सुणै द्यो, त कु लड़ै कु तैयारी नि करलो।

⁹इन ही कै, जब तुम इन भाषा बुल्दा जु लोग समझ नि सकदींनि, त तुम बथौं मा बात कन वला ठैरिला अर जु तुम बुल्णा छा वेकी कुई कीमत नि होली।

¹⁰ईं दुनिया मा भौत सैरा अलग-अलग किस्मै की भाषा छिनी अर हर भाषा कु मतलब च।

¹¹जु हम वे भाषा तैं नि समझदा जु दुसरा बुल्णा छिनी, त उ इन होला माना कि उ हम कु विदेशी छिनी, अर हम ऊंकु विदेशी होला।

¹²इलै तुम भि जब आत्मिक वरदानों तैं पांणै की इच्छा रखदा, जु पवित्र आत्मा तुम तैं दींद, त ऊं वरदानों कु इस्तेमाल कनु कु इन कोशिश करदी रावा कि ऊं वरदानों का द्वारा विश्वासियों की मण्डलि पूरा ढंग से विश्वास मा मजबूत हवे जौ।

¹³इलै जु अन्य भाषा बुल्दींनि, त उ प्रार्थना कैरा, कि जु उ बुल्दो वेको मतलब समझण का लैके भि हो।

¹⁴जु मि अन्य भाषा मा प्रार्थना कनु छों, त मेरी आत्मा प्रार्थना करदी पर मेरी सोच मा यांको कु फैदा नि च, किलैकि मि यु तैं समझ नि सकदु।

¹⁵ईं वजह से, मि पवित्र आत्मा का अनुसार प्रार्थना कन चांणु छों; अर मि यु भि चांणु छों; कि जु मि बुल्णु छों, वे तैं दुसरा समझ साक। अर जब मि गीत गांदु, त मि चांणु कि मेरा गीत पवित्र आत्मा बट्टी प्रेरित हूंनु, पर यु भि जरुरी च कि मि जु गांणु छों कि दुसरा वे तैं समझी जौं।

¹⁶मांणा कि कुई सीधो आदिम तुम्हरी आराधना मा हो अर तुम अपड़ी आत्मा बट्टी परमेश्वर की आराधना कना हो। जु उ तुम्हरी बातों तैं नि समझो, त तुम्हरा परमेश्वर तैं धन्यवाद दींण का बाद, वे तैं कन कै पता चललो कि आमीन कब बोलु जैका बारा मा तुम ल बोलि।

¹⁷पिता परमेश्वर कु तुमारो धन्यवाद अद्भुत हवे सकद, पर यु दूसरों तैं विश्वास मा मजबूत हूंणु कु मदद नि करदो।

¹⁸मि हमारा पिता परमेश्वर कु धन्यवाद करदु, कि मि तुम बट्टी जादा अन्य भाषा मा बुल्दो छों।

¹⁹जु मि विश्वासियों कि मण्डलि मा छों, त मि कु पाँच शब्दों तैं बुल्ण ठिक च, जु समझ मा ऐ साका अर सिखै जा साका, बजाय हजार शब्दों की भाषा बुल्ण से जु समझ मा नि ऐ साक।

²⁰हे विश्वासी भयों, यूं बातों तैं समझण मा छुटा बच्चों का जन नि बणा; जब बुरै कि बात औंद त एक बच्चा का जन निर्दोष रावा, पर समझण मा सयांणा बणा।

²¹पिता परमेश्वर की व्यवस्था का वचनों मा लिख्युं च, कि प्रभु बुल्द, “मि परदेशियो का बीच मा बट्टी बात करुलु जु अन्य भाषा बुलला जु अलग भाषा बुलला, तभि भि उ मेरी बात नि सुणला।”

²²इलै, हम समझदियां, कि यु वरदान ऊं भाषाओं तैं बुल्णु कु जु पता ही नि च, उ पिता परमेश्वर दींद, कि अविश्वासियों तैं महसूस हवे जौं कि यु पिता परमेश्वर का तरपां बट्टी आंद। अर पिता परमेश्वर समझणु कु वरदान दींद उ यु इलै दींद, कि विश्वासियों तैं मजबूत किये जै साको।

²³त जु मण्डलि एक ही जगा कठ्ठा हो, अर सभि का सभि अन्य भाषा बोला, अर सीधा लोग या अविश्वासी लोग भितर ए जा त उ जरूर सुचला की तुम पागल छा।

²⁴पर जु सभि लोग पिता परमेश्वर का शुभ संदेश कु प्रचार कना छिनी, अर अविश्वासी या जु लोग यूं चीजों तैं नि समझदींनि, उ तुम्हरी सभा मा औंदींनि, त ऊं तैं एहसास होलो कि उ पापी छिनी, अर तुम जु बुल्दियां वेका कारण उ अपड़ा ढंग तैं बदलण चाला।

²⁵पिता परमेश्वर का शुभ संदेश का कारण वे तैं अपड़ी बुरी, गुप्त सोच कु एहसास होलो। अर वे तैं इन एहसास होलो कि उ पापी च अर उ पश्चाताप करलो, अर फिर उ घुंडों पर ऐ के पिता परमेश्वर की आराधना करलो अर मांणी ल्यालो, कि सच मा पिता परमेश्वर तुम्हरा बीच मा च।

²⁶हे विश्वासी भयों, सूंणा कि कामों तैं कन कै कन चयणु च, जब तुम पिता परमेश्वर की आराधना कु कठ्ठा हूंदा, त तुम मा बट्टी कुई त गीतों तैं गौ, कुई उपदेश द्यो, कुई प्रभु का द्वारा दियां ज्ञान तैं बांटो, जु कुई अन्य भाषा मा बात कैरो, त दुसरो आदिम वेको अनुवाद कैरो। यु सभि बातों कु उद्देश्य मण्डलि तैं विश्वास मा मजबूत हूंण कु मदद कन च।

²⁷जख तक अन्य भाषा मा बातों तैं कनु कु सवाल च, जादा से जादा द्वी या तीन आदिम ही एक-एक कैरी कै ही बोला अर कुई आदिम ऊं भाषाओं कु मतलब बतौंणु कु हूंण चयणु च।

²⁸पर जु अनुवाद कन वलो नि हो, त अन्य भाषा बुल्ण वलो मण्डलि मा चुप ही रौ, अर अफी मा पिता परमेश्वर का दगड़ी बात कैरो।

²⁹परमेश्वर की तरपां बट्टी बुल्ण वलो मा बट्टी द्वी या तीन ही बोला, अर यु जरुरी च कि हर कुई सुंणौ अर समझो अर जांचो कि जु बुलै गै उ पिता परमेश्वर का वचन का अनुसार सै च की न।

³⁰जु मण्डलि मा बैठयां कै आदिम तैं पिता परमेश्वर कु संदेश मिल्द, त जु बुल्णु च, त वे तैं रुकण चयणु च अर दुसरा आदिम तैं बुल्ण दींण चयणु च।

³¹तुम सभि पिता परमेश्वर का संदेश कु प्रचार कैरी सकदियां, पर एक का बाद एक कैरी कै, कि हर कुई सिखौ अर प्रोत्साहित हो।

³²एक परमेश्वर का तरपां बट्टी बुल्ण वलो अफ तैं काबू मा कैर सकद, उ अपड़ी इच्छा का अनुसार बुल्ण या बुल्ण बंद भि कैरी सकद।

³³किलैकि पिता परमेश्वर गड़बड़ी कु न, पर शान्ति दींण वलो पिता परमेश्वर च; यु उ नियम च, जु पिता परमेश्वर का लुखुं की मण्डलि मा मणैं जांद।

³⁴जननियों मण्डलि कि सभा मा चुप रावा, किलैकि ऊं तैं बात कनै कि अनुमति नि च, पर अधीन रौंणे कि आज्ञा च; जन मूसा की व्यवस्था मा भि लिख्युं च।

³⁵जु व कुछ अर सिखांण चांणि च, त घौर मा अपड़ा-अपड़ा स्वामी बट्टी पूछा, किलैकि जनन कु मण्डलि मा बात कन शर्म कि बात च।

³⁶इन किलै च कि तुम मा बट्टी कुछ यूं पैली बट्टी दियां कानूनों कु पालन नि कन चांणा छिनी? क्य तुम तैं लगदो कि पिता परमेश्वर कु वचन भस तुम तैं ही दियुं च?

³⁷जु कुई मनिख अपड़ा आप तैं पिता परमेश्वर का तरपां बट्टी बुल्ण वलो या इन आदिम समझो जै तैं पवित्र आत्मा ल वरदान द्ये हो, त यु जांणि ल्या, कि जु बातों तैं मि तुम कु लिखणु छों, यु प्रभु कि आज्ञा छिनी।

³⁸पर जु उ मेरा यूं शब्दों पर विश्वास नि करलो, ऊं पर विश्वास नि करयां।

³⁹इलै हे विश्वासी भयों, भविष्यवाणी कनै कि उत्सुकता बट्टी इच्छा कैरा अर अन्य भाषा बुल्ण से मना नि कैरा।

⁴⁰जु कुछ भि तुम मण्डलि मा करदा छा सभ्यता अर क्रमानुसार किये जौं।