Read Garhwali 1 कुरिन्थियों 16 Bible Online

1 कुरिन्थियों 16 - Garhwali bible

1 कुरिन्थियों 16

¹अब यरूशलेम शहर मा पिता परमेश्वर का पवित्र लुखुं कु कठ्ठा करे जांणवला धन का बारा मा, जन आज्ञा मिल गलातिया प्रदेश की मण्डलियों तैं द्ये, उन ही तुम भि कैरा।

²हफ्ता का पैला दिन तुम मा बट्टी हर आदिम अपड़ी तनखा का अनुसार कुछ अफ मा रखा कैरा, कि मेरा आंण पर तुम तैं चन्दा कठ्ठा नि कन पोडो।

³फिर, जब मि उख रौलु त मि ऊं लुखुं तैं भिजलु, जौं तैं तुम ल विश्वासयोग्य आदिमों का रूप मा चुणि छो, कि उ धन तैं यरूशलेम शहर कु ली जां; मि ऊं दगड़ी एक चिठ्ठी भि भेजि दयुलु, कि उख का विश्वासियों बट्टी ऊंको परिचय किये साको।

⁴जु तुम तैं लगद कि मि तैं जांण चयणु च, त उ मि दगड़ी चला।

⁵मकिदुनिया प्रान्त मा जांणा का बाद, मि तुम तैं मिलणु कु औलु, किलैकि मि तैं मकिदुनिया प्रान्त हवे कै जांण ही पुड़लो।

⁶पर हवे सकद कि मि तुम दगड़ी जादा बगत कु रौ, या हवे सकद कि ह्यूंद तक, अर फिर जख भि मि जौलु, तुम मि तैं मेरी यात्रा पर भेजि सकदां।

⁷जु यु पिता परमेश्वर की इच्छा हो, पर मि तैं आस च कि मि अभि भस एक छुटी सी मुलाकात कु रुकणा का बजाय बाद मा जादा बगत तक रौंणु कु औलु।

⁸पर मि पिन्तेकुस्त का त्यौहार तक इफिसुस शहर मा रौलु।

⁹किलैकि अब भि इख भौत स लोग छिनी, जु पिता परमेश्वर कु वचन सुनण चयदींनि, अर मेरू इख रौंण भौत अच्छो च, जब की इख मेरा भौत सी दुश्मन छिनी।

¹⁰जु तीमुथियुस तुम मा कुरिन्थुस शहर ओ, त वेको अपड़ा बीच मा स्वागत करयां; किलैकि उ मि जन प्रभु कु काम करद।

¹¹इलै कुई भि ऊंको अपमान नि कैरो, पर वे तैं सभि कुछ शान्ति दगड़ी द्या, जु वेकी यात्रा कु जरुरी च, कि उ मि मा ए जौं; किलैकि मि वेको इन्तेजार कनु छों, कि उ विश्वासी भयों का दगड़ी औ।

¹²अर विश्वासी भयों, अपुल्लोस बट्टी मिल भौत बिनती कैरी, कि हैंका विश्वासियों का दगड़ी जु तुम बट्टी मिलणु कु औ; पर वेल वे बगत जांण ठिक नि समझी, पर ठिक बगत आंण पर ए जालो।

¹³चौकस रावा, अर लगातार विश्वास मा भि बणयां रावा, हिम्मतवला बणा, अर पिता परमेश्वर का दगड़ी अपड़ा रिश्ता तैं मजबूत रखा।

¹⁴तुम सभि कुछ प्रेम से कैरा।

¹⁵हे विश्वासी भयों, तुम स्तिफनुस अर वेका परिवार तैं जंणदा छा, कि उ अखाया प्रान्त बट्टी पैला छा, जौं ल मसीह पर विश्वास कैरी, अर पिता परमेश्वर का पवित्र लुखुं की मदद कनु कु तैयार रौंदींनि।

¹⁶इलै मि तुम बट्टी बिनती करदु, कि इन अगुवों की आज्ञाओं तैं मांणा कैरा बल्कि हर एक की जु इन सच्ची भक्ति का दगड़ी सेवा करदींनि।

¹⁷अर मि स्तिफनुस अर फूरतूनातुस अर अखइकुस का औंण से खुश छों, किलैकि उ मेरी मदद कना छिनी, जु तुम नि कैरी सकणा छा।

¹⁸अर ऊंल मि तैं प्रोत्साहित कैरी, जन उ तुम कु भि करला, जब उ तुम मा वापिस आला, इलै तुम तैं ऊंका जन लुखुं कु सामना कन चयणु च।

¹⁹एशिया प्रान्त की मंडलियों का विश्वासी लुखुं तुम तैं प्रणाम; अक्विला अर वेकी जनन प्रिस्किल्ला अर मण्डलि ज्वा ऊंका घौर मा कठ्ठा हूंदी ऊंका तरपां बट्टी भि तुम तैं प्रभु मा प्रणाम।

²⁰इख का सभि विश्वासी लोग तुम तैं प्रणाम बुल्णा छिनी तुम तैं एक दुसरा तैं पवित्र चुम्बन का रूप मा प्रणाम कन चयणु च, कि तुम एक दुसरा बट्टी प्रेम करद्यां।

²¹मि, पौलुस यह प्रणाम अपड़ी चिठ्ठी मा अपड़ा हाथ ल लिखणु छों;

²²जु कुई प्रभु बट्टी प्रेम नि रखो, त उ श्रापित च, हे हमारा प्रभु, औ।

²³मि प्रार्थना करदु कि प्रभु यीशु मसीह की कृपा तुम पर हूंदी रौ।

²⁴मि तुम सभियूं बट्टी प्रेम करदु जौको यीशु मसीह का दगड़ी मजबूत रिश्ता च; आमीन।