Read Garhwali 1 कुरिन्थियों 3 Bible Online

1 कुरिन्थियों 3 - Garhwali bible

1 कुरिन्थियों 3

¹हे विश्वासी भयों, तुम ईं दुनिया का लुखुं का जन दिखावा कना छा, इलै मि तुम बट्टी आत्मिक लुखुं का जन बोलि नि सकदु, किलैकि मसीह का विश्वास मा तुम बच्चों का जन छा।

²वे बगत मिल तुम तैं परमेश्वर का वचन बट्टी भस बुनियादी शिक्षाओं का बारा मा सिखै, जु छुट्टा बच्चों तैं दूध पिलांण का जन च। मिल पिता परमेश्वर का वचन की गहरी सचै तैं नि सिखै, जु एक कठोर खांणु का जन च, किलै तुम यांको अभि तक तैयार नि छा।

³किलैकि तुम अब भि अपड़ा पापी स्वभाव का अनुसार ही अपड़ो जीवन जींणा छा; इलै जब तुम मा जलन अर लड़ै-झगड़ा हूंदींनि, त क्य यु साबित नि हूंद कि तुम अपड़ा पापी स्वभाव का कब्जा मा छा? क्य तुम ईं दुनिया का लुखुं का जन ही जीवन नि जींणा छा?

⁴इलै कि जब तुम मा बट्टी एक बुल्द कि, “मि पौलुस कु चेला छों” अर दूसरो, “मि अपुल्लोस कु चेला छों त क्य तुम ईं दुनिया का लुखुं का जन जीवन नि जींणा छा?”

⁵आखिर मा, मि पौलुस अर अपुल्लोस भस सेवक ही छा, जूंका द्वारा तुम लुखुं ल मसीह पर विश्वास कैरी, हम मा बट्टी हर एक ल उ ही काम कैरी जु पिता परमेश्वर ल हम तैं कनु कु द्ये।

⁶मि तुम तैं पिता परमेश्वर कु वचन बतांण वलो पैली आदिम छों, इलै मि एक इन आदिम जन छों जैल बीज लगै; वेका बाद, अपुल्लोस ल तुम तैं तुम्हरा विश्वास मा मजबूत बनण मा मदद कैरी, ठिक उन ही जन कि कुई दुसरो आदिम ऊं पौधों तैं पांणी डल्द जु अब बढण लगि गैनी। पर पिता परमेश्वर ल तुम तैं नयो जीवन दींनि अर इन कै तुम आत्मिकता मा बढ़णा छा, जन पिता परमेश्वर पौधों तैं बढांद।

⁷इलै न त बीज लगांण वलो कुछ च, अर न पौधों तैं पांणी दींण वलो कुछ च, पर पिता परमेश्वर ही सब कुछ च, जु बढांद।

⁸मिल तुम तैं शुभ संदेश सुणये अर परमेश्वर का वचन तैं सिखांण शुरू कैरी, अर अपुल्लोस तुम तैं लगातार सिखांणु ही रै, पर हम द्वीयूँ कु एक ही मकसद च, कि हर एक मनिख अपड़ी ही मेहनत का अनुसार पिता परमेश्वर बट्टी ईनाम पौ।

⁹किलैकि हम पिता परमेश्वर कु काम कन वला छा, अर कुरिन्थ का विश्वासियों तुम एक सगोड़ा अर एक घौर जन छा, जै तैं पिता परमेश्वर बणद अर उ वेको ही च।

¹⁰पिता परमेश्वर का वे वरदान का अनुसार, जु मि तैं दिए गै, मिल बुद्धिमान राजमिस्त्री का जन नींव डाली, अर अब कुई दूसरो वे घौर तैं बनांणु च। पर हर एक आदिम चौकनों रौ, कि उ वीं नींव पर वे घौर तैं कन कै बनांणु च।

¹¹जु यु घौर बणये जांणु च, यीशु मसीह ही वे घौर की नींव च; उ एकमात्र आधार च, यांको मतलब च, यीशु मसीह ही एकमात्र रस्ता च ज्यां बट्टी लोग पिता परमेश्वर तैं जांणि सकदींनि पर हर एक मनिख चौकस रौ, कि उ वीं बुनियाद पर वे घौर तैं कन के बनांणु च।[11]

¹²जु मसीह कु सेवक पिता परमेश्वर की सच शिक्षाओं तैं सिखांद, जु ऊं तैं पिता परमेश्वर की तरपां बट्टी मिली च, त उ वे घौर का बनांण वला मिस्त्री का जन च, जु घौर बनांण बगत नींव पर सोना, चांदी अर कीमती ढुंगों जन अच्छी चीजों कु इस्तेमाल करदींनि; पर जु उ झूठी शिक्षाओं तैं सिखांदींनि, त उ वे घौर बनांण वला मिस्त्री का जन च, जु घौर बनांण बगत नींव पर लखड़ा, भूसी अर घास जन खराब चीजों कु इस्तेमाल करद।

¹³पर जब पिता परमेश्वर सभियूं कु न्याय करलो, त आग हर एक आदिम का कामों तैं प्रगट कैरी द्याली; अर व आग हर एक का कामों तैं परखैलि कि कन छिनी।

¹⁴जैका काम वीं नींव पर जु वेल करीनि, जु उ फुकयो न, त उ ईनाम पालो।

¹⁵जु कैका काम फुके जा, त वे आदिम तैं उ ईनाम नि मिललो; फिर भि उ बची जालो अर उ आदिम वे अनन्त जीवन तैं नि खोलो जु पिता परमेश्वर ल वे तैं द्ये।

¹⁶सच मा तुम जंणदा छा, कि तुम पिता परमेश्वर कु मन्दिर छा, अर पिता परमेश्वर कु पवित्र आत्मा तुम मा रौंदो च।

¹⁷जु कुई आदिम तुम तैं, जु पिता परमेश्वर का मन्दिर का जन च, पिता परमेश्वर बट्टी अलग करद, त पिता परमेश्वर वे तैं नाश करद; किलैकि पिता परमेश्वर कु मन्दिर पवित्र च, अर उ मन्दिर तुम छा।

¹⁸जु तुम मा बट्टी कुई इन सोच कि तुम दुनिया का लुखुं मा भौत ज्ञानी छा, त तुम तैं ईं दुनिया का लुखुं मा मूर्ख बंणि जांण चयणु च, कि तुम पिता परमेश्वर की नजर मा अपड़ा आप तैं ज्ञानी बणै सका।

¹⁹किलैकि सच यु च, कि सांसारिक ज्ञान पिता परमेश्वर की नजर मा मूर्खता च, जन परमेश्वर का वचन मा लिख्युं च, “पिता परमेश्वर ही च, जु बुद्धिमानों तैं ऊं की चालाकी मा फंसै दींद।”

²⁰अर फिर परमेश्वर का वचन मा यु भि लिख्युं च, “प्रभु बुद्धिमानों का विचारों तैं जंणदु च, कि उ बेकार ही छिनी।”

²¹इलै एक अगुवा कु बुल्युं मनणु का बारा मा बड़ो मोन कन बंद कैरा, किलैकि पिता परमेश्वर ल तुम तैं सब कुछ तुम्हरी ही भलै कु दयूं च।

²²मि पौलुस, क्य अपुल्लोस, क्य पतरस (कैफा) क्य दुनिया, क्य ईं दुनिया की चीज, चाहे तुम ज्यून्दा रा या मोरि भि जावा, क्य वर्तमान, क्य भविष्य कु, सब कुछ तुम्हरी ही भलै कु च,

²³अर तुम मसीह का अधिकार का अधीन छा, अर मसीह पिता परमेश्वर का अधिकार का अधीन च।