Read Garhwali 1 कुरिन्थियों 6 Bible Online

1 कुरिन्थियों 6 - Garhwali bible

1 कुरिन्थियों 6

¹जु तुम मा बट्टी कै एक कु कै हैंका विश्वासी दगड़ी झगड़ा हवे जांद, त तुम तैं जांच कु कै अधर्मी न्यायाधीश मा नि जांण चयणु च। तुम तैं अपड़ी मण्डलि मा हैंका विश्वासियों बट्टी अपड़ा मामलों कु फैसला कनु कु बुल्ण चयणु च कि तुम मा बट्टी कु जी ठिक च।

²तुम अच्छो के जंणदयां कि भविष्य मा पिता परमेश्वर का लोग ईं दुनिया मा लुखुं तैं जांच अर न्याय करला; इलै, जब तुम तैं ईं दुनिया का लुखुं कु फैसला कन त तुम तैं छुटा-छुटा मामलों कु फैसला कना का योग्य हूंण चयणु च।[15]

³तुम तैं पता च कि भविष्य मा हम ल दुष्टदूतों कु न्याय कन, कि पूरा ढंग ल हम यु जीवन की साधारण बातों कु न्याय कैर सका त यु जीवन का मामला खुद ही निपटे साका।

⁴जु इन मामला समणी औंदींनि, त तुम तैं ऊं मामलों तैं ऊं लुखुं का द्वारा जांच कैरी के नि निपटांण चयणु च जु मण्डलि मा लुखुं का द्वारा सम्मान का लैक नि समझै जयदींनि।

⁵मि तुम तैं शर्मिंदा कनु कु इन बुल्णु छौं। क्य तुम मा बट्टी एक भि बुद्धिमान नि मिल्दो, जु अपड़ा विश्वासी भैय कु जांच कु फैसला कैरी सैकु?

⁶तुम मा एक विश्वासी भैय कु हैंका विश्वासी भैय का दगड़ी ही जांच कु मुकदमा हूंदो अर उ भि अन्यजातियों का संमणी।

⁷सच मा जब तुम मा बट्टी एक विश्वासी आदिम अदालत मा जांद, त तुम विश्वासियों का रूप मा एक-हैंका का दगड़ी जांच मा रौंण मा हारी ग्यां; जु एक और मसीही आदिम ल तुम तैं धोखा द्ये कि तुम मा बट्टी कुछ छीनि ल्या, त वेका विरुद्ध कुछ नि कैरा।

⁸पर यांको ठिक उलटो तुम, अपड़ा दगड़िया विश्वासी का दगड़ी गलत करदां अर ऊं तैं धोखा दींणा छा।

⁹तुम त मालूम च, कि अन्य्यों कन वला लोग पिता परमेश्वर का राज्य मा वारिस नि होला; कुई भि तुम तैं धोखा द्ये के यु सुचण पर मजबूर नि कैरी द्यो, कि तुम बुरा कामों तैं भि करीला तौ भि पिता परमेश्वर का लुखुं मा एक बणयां रैल्या, न वेश्यागामी, न मूर्ति पुजण वला, न परस्त्रीगामी, न लुच्चा, न पुरुषगामी।

¹⁰न चोर, न लोभि, न पियक्कड़, न गल्ली दींणवला, न अंधेर कन वला पिता परमेश्वर का राज्य का वारिस होला।

¹¹पैली तुम मा बट्टी कुछ इन कै बरतौ करदा छा, पर तुम प्रभु यीशु मसीह का नौं से अर हमारा पिता परमेश्वर का आत्मा बट्टी तुम्हरा पाप धवे गैनी, अर तुम तैं पवित्र बणै अर धर्मी ठैरे।

¹²मि एक विश्वासी छों, इलै मि तैं सब कुछ कने की आजादी त च, पर सब कुछ लाभ कु नि च, जबकि सब कुछ कने की मि तैं आजादी त च, पर मि कै बात का भि अधीन नि छों।

¹³मि एक विश्वासी छों, इलै मि तैं सब कुछ खांणै की आजादी त च, खांणु हमारा देह कु, अर पुटगो खांणु कु, यु सच च पर पिता परमेश्वर हमारा पुटगा अर खांणु दुयूं तैं नष्ट कैरी दयालो, देह व्यभिचार कु नि, हम तैं अपड़ा देह कु इस्तेमाल ऊं कामों कु कन चयणु च जु प्रभु चांद, अर हमारी देह भि प्रभु कु ही च।

¹⁴यांका अलावा, हमारी देह बहुत खास छिनी, किलैकि जन कै पिता परमेश्वर ल प्रभु यीशु तैं मुर्दों मा बट्टी ज्यूँदो कनु कु अपड़ी सामर्थ कु इस्तेमाल कैरी छो, इलै उ हम तैं भि मुर्दों मा बट्टी ज्यूँदो करलो।

¹⁵तुम तैं मालूम च, कि तुम्हरी देह मसीह का अंग छिनी, क्य एक आदिम तैं अपड़ा देह तैं ले के, जु की मसीह कु च, क्य यु तैं वेश्या का दगड़ी जुड़ण चयणु च? न! बिल्कुल भि न।

¹⁶क्य तुम नि जणदां, कि पिता परमेश्वर का वचन मा लिख्युं च “उ द्वी एक देह होला” त तुम तैं पता हूंण चयणु च कि जु कुई भि वेश्या का दगड़ी जुड़द, उ वीं वेश्या का दगड़ी एक देह हवे जांद।[16]

¹⁷अर जु प्रभु की संगति मा हमेशा रौंद, त वेकी आत्मा अर प्रभु की पवित्र आत्मा एक हवे गै।

¹⁸व्यभिचार बट्टी बचयां रावा, मनिख्युं द्वारा किये ग्यां और पाप वेकी देह तैं उथग प्रभावित नि करद जथग यु करद, पर व्यभिचार कन वलो अपड़ी ही देह का विरुद्ध मा पाप करद।

¹⁹तुम जणदां छा, कि तुम्हरी देह पवित्र आत्मा कु मन्दिर च; जु तुम मा बसयूं च, अर तुम तैं पिता परमेश्वर का तरपां बट्टी मिल्द, अर अब तुम अपड़ा न पर पिता परमेश्वर का छा।

²⁰पिता परमेश्वर ल यीशु मसीह तैं भेजि के अर यीशु ल सूली पर अफ तैं बलिदान कैरी के, हम एक बड़ी कीमत चुकै के छुड़ै, इलै अपड़ी देह का द्वारा पिता परमेश्वर की महिमा कैरा।