Read Garhwali 1 कुरिन्थियों 8 Bible Online

1 कुरिन्थियों 8 - Garhwali bible

1 कुरिन्थियों 8

¹तुम्हरी चिठ्ठी मा तुम ल मूर्तियों का संमणी चढ़यूं बलि कु खांणु का बारा मा पूछि छों, कि हम सभि यु बारा मा जंणदा छा; पर ज्ञान बड़ा मोन तैं पैदा करद, पर अगनैं बढ़ण मा हम एक-दुसरा की मदद प्रेम का दगड़ी करदां।

²जु तुम तैं लगद कि तुम कुछ जंणदा छा, त तुम हक्कीकत मा कुछ भि नि जणदां जन तुम तैं जनण चयणु च।

³पर जु कुई पिता परमेश्वर बट्टी प्रेम रखद, त पिता परमेश्वर वे आदिम तैं जंणदु च।

⁴त फिर, मि तैं मूर्तियों का संमणी चढ़यूं बलि का खांणु का बारा मा पुछयां सवालों कु जवाब दींण चयणु च; हम जंणदा छा कि भस एक ही ज्यूँदो पिता परमेश्वर च अर ईं दुनिया मा मूर्तियां बेजान छिनी।

⁵पर फिर भि, आकाश अर धरती पर मा भौत स लुखुं तैं परमेश्वर अर प्रभु बुल्दींनि; पर हमारो एक ही पिता परमेश्वर च जु स्वर्ग मा च, वेल सभि कुछ बणै, अर हम वेका द्वारा ही ज्यून्दा छा; उन ही कै, हमारो एक ही प्रभु च अर उ यीशु मसीह च।

⁷पर हमारा कुछ विश्वासी अभि तक भि नि जणदींनि कि मूर्तियों मा कुई शक्ति नि च, किलैकि उ पैली ऊं मूर्तियों की पूजा करदा छा, अब जब उ ऊं मूर्तियों तैं चढ़यूं बलि कु खांणु खंदींनि, उ गलत सुचदींनि कि उ अभि भि ऊं मूर्तियों की पूजा मा शामिल छिनी, अर उ यूं सोचि के परेशान हुन्दींनि कि जु उ मूर्तियों तैं चढ़यूं खांणु खंदींनि त ऊंल पाप कैरेले।

⁸पर खांणु हम तैं पिता परमेश्वर का नजीक नि लांद; अर खांणु खांण बट्टी मना कैरी कै भि हम पिता परमेश्वर तैं न खुश नि करदां, अर खांणु खांण अर नि खांण हमारा पिता परमेश्वर का नजर मा महत्व नि रखद।

⁹पर चौकस रावा, इन नि हो, कि तुम्हरी य आजादी कखी ऊं लुखुं कु जु विश्वास मा कमजोर छिनी ठोकर कु कारण बंणि जां।

¹⁰तुम जंणदा छा, कि यु मूर्तियां हक्कीकत मा परमेश्वर नि छिनी इलै तुम मूर्तियों का मन्दिर मा बलि कु खांणु भि खै सकदियां। पर जु कुई विश्वास मा कमजोर च उ तुम तैं जु उख खांणु खांण देखु त मूर्तियों तैं चढ़यूं मांस खांण कु प्रोत्साहित हूंद, जबकि उ सुचद कि इन कन गलत च।

¹¹इन कै तेरु ज्ञान का कारण जु विश्वासी भैय विश्वास मा कमजोर च उ मसीह मा विश्वास कन बन्द कैरी दयालो, जैकु यीशु मसीह ल अपड़ा आप तैं बलिदान कैरी।

¹²जु हमारा यु काम कन का कारण हमारा विश्वासी दगड़िया अफ तैं भंगारी महसूस करद, त हम वेका अर मसीह का खिलाफ मा भि पाप करदां।

¹³इलै, जु मेरा मूर्तियों का संमणी चढ़यूं खांणु बट्टी दुसरा विश्वासी भैय का विश्वास बट्टी पिछनै हटणों कु कारण बणद, त मि तैं उ खांणु कभी भि नि खांण चयणु च।