Read Garhwali 2 कुरिन्थियों 1 Bible Online

2 कुरिन्थियों 1 - Garhwali bible

2 कुरिन्थियों 1

¹अध्याय 1 मि पौलुस, जु प्रभु यीशु मसीह कु प्रेरित हूंणु कु पिता परमेश्वर की इच्छा ल चुणयूं अर मि इख हमारा विश्वासी भैय तीमुथियुस का दगड़ी छों जु मेरी मदद करद। मि या चिठ्ठी कुरिन्थुस शहर मा विश्वासियों की मण्डलि तैं, अर अखाया प्रदेश का सैरा लुखुं तैं लिखणु छों;

²मि प्रार्थना करदु कि, हमारा पिता परमेश्वर अर प्रभु यीशु मसीह का तरपां बट्टी तुम तैं कृपा अर शान्ति मिलदी रौ।

³हमारा प्रभु यीशु मसीह कु अर पिता परमेश्वर कु धन्यवाद हो, जु हम पर दया दिखांद, अर हम तैं हमेशा उत्साहित कन वलो पिता परमेश्वर च।

⁴पिता परमेश्वर हमारी सब मुसिबतों मा हम तैं तसल्ली दींद; कि हम वे तसल्ली का कारण जु पिता परमेश्वर हम तैं दींद, ऊं तैं भि तसल्ली दे साक, जु हर ढंग की मुसिबत मा पुड़यां हूंनु।

⁵किलैकि जन मसीह का दुःख जन के हम पिड़ा सौंदयां उन ही के मसीह ल भि पिड़ा सै, उन ही हम शान्ति मा भि मसीह का द्वारा जादा हिस्सादार हून्दियां।

⁶जु हम पर मुसिबत आंदी, त य तुम्हरी शान्ति अर उद्धार कु च अर जु हम शान्ति पौंदयां, त यु तुम्हरी शान्ति कु च; जैका प्रभाव बट्टी तुम धीरज का दगड़ी ऊं दुःखों तैं सै लींदियां, जौं तैं हम ल भि सै।

⁷अर हमारी आस तुम्हरा बारा मा मजबूत च; हम जंणदा छा कि जन के तुम हमारा दु:खों मा सहभागी छा, उन ही के तुम हमारी शान्ति मा भि सहभागी होला जै तैं हम ल परमेश्वर बट्टी पै।

⁸हे विश्वासी भयों, मि चांदु छो कि तुम ऊं मुसिबतों का बारा मा जांणा जु एशिया प्रान्त मा हम पर पुड़ीनि, हम इन गरा बोझ बट्टी दबी गै छा, जु हमारी सामर्थ बट्टी भैर छै, इख तक कि हम ल जीणै की पूरी उम्मीद ही छोडे़ले छै।

⁹अर हम ल अपड़ा मन मा समझी येले छो, कि हम मरै जौला, यु इलै हवे कि हम अफ पर न, पर पिता परमेश्वर पर भरोसा रखा, जु मुर्दों तैं ज्यूँदो कैरी सकद।

¹⁰वेल ही हम तैं मौत का बड़ा जोखिम बट्टी बचै, अर वे पर ही हमारी आस च, कि उ अगनैं भि हम तैं बचालो।

¹¹जन तुम हम कु प्रार्थना कैरी के हमारी मदद करदा, उन ही भौत सैरा लुखुं की प्रार्थनाओं का द्वारा हम तैं पिता परमेश्वर की कृपा का द्वारा आशीष मिलीं छिनी, वेका कारण भौत लोग हमारी तरपां बट्टी पिता परमेश्वर कु धन्यवाद कैरा।

¹²किलैकि हम तैं गर्व च कि हमारो विवेक साफ च, कि दुनिया मा अर खास कैरी के तुम्हरा बीच हमारो चरित्र जु पिता परमेश्वर की तरपां बट्टी आंद इन पवित्रता अर सचै का दगड़ी च, हम ऊं विचारों का अनुसार नि ज्यूंदयां, जु ऊं लुखुं का द्वारा ज्ञानवान समझे जांद पर पिता परमेश्वर की कृपा का द्वारा छो।

¹³हम तुम कु भस उ ही लिखदयां जै तैं तुम पढ़ी अर समझी सकदियां। अर मि तैं आस च कि अन्त तक भि मणदी रैला। जबकि अब तुम हम तैं पूरा ढंग से नि समझदींनि, मि तैं आस च कि तुम हम तैं पूरा ढंग से समझी सकला, कि हमारा प्रभु यीशु का दुबरा आंण पर तुम हम पर उन ही गर्व करला जन हम तुम पर गर्व करदां।

¹⁵मि तैं विश्वास छो, कि तुम हम तैं समझदा छा अर इलै सबसे पैली तुम तैं मिलणै की योजना मिल बणै छै; इन कै तुम तैं हमारा द्वारा द्वी यात्राओं की आशीष मिलदी।

¹⁶अर मेरी योजना छै कि मि तुम मा बट्टी हवे के मकिदुनिया प्रान्त मा जौं, अर फिर मकिदुनिया प्रान्त बट्टी वापिस ऐ के तुम मा ओ कि मि तुम मा बट्टी यहूदिया प्रान्त की यात्रा कु मदद पौं।

¹⁷इलै जु मिल इन इच्छा रखि त क्य मिल कुछ चंचलता दिखै? या जु मि कन चांदु क्य दुनिया का लुखुं का जन कन चांदु, कि मि एक बगत मा हाँ अर बाद मा न बुल्दो?

¹⁸पिता परमेश्वर पर विश्वास किये जै सकद अर इलै तुम हम पर भि विश्वास कैरी सकदा, जबकि हम तुम मा आंणो कु वादा कना छा।

¹⁹किलैकि पिता परमेश्वर कु नौंनो यीशु मसीह जैको हमारा द्वारा मतलब कि मेरा अर सिलवानुस अर तीमुथियुस का द्वारा तुम्हरा बीच मा प्रचार हवे; जु एक बगत मा हाँ अर बाद मा न नि छै।

²⁰किलैकि पिता परमेश्वर का जथग प्रतिज्ञा छै, पिता परमेश्वर का उ सभि वादा मसीह मा पूरा हूंदींनि अर इलै हम “आमीन” बुल्दा, कि हमारा द्वारा पिता परमेश्वर की महिमा हो।

²¹पिता परमेश्वर ही च, जु तुम्हरा दगड़ी हम तैं मसीह मा मजबूत करद; पिता परमेश्वर ल हम पर अपड़ी मोहर लगै के बयान का रूप मा अपड़ा आत्मा हमारा हृदय मा रखि के हम तैं अफ कु चुणि।

²³पिता परमेश्वर मेरी ईं सचै कु गवाह च कि मि दुबारा कुरिन्थुस शहर इलै नि अयुं कि मेरा कारण तुम तैं कष्ट नि हो।

²⁴यु न, कि हम विश्वास का बारा मा तुम पर प्रभुता जतांण चदयां; पर तुम्हरा आनन्द मा मददगार छा किलैकि तुम विश्वास बट्टी ही मजबूत हूंणा छा।