Read Garhwali 2 कुरिन्थियों 13 Bible Online

2 कुरिन्थियों 13 - Garhwali bible

2 कुरिन्थियों 13

¹परमेश्वर का वचन मा लिख्युं च, “कि हर एक मामला तैं द्वी या तीन गवाहों की गव्है का द्वारा सुलझये जौं।” मिल पैली ही ऊं लुखुं तैं चितै यले जु मेरी दुसरी यात्रा पर उख छा अर पाप कना छा, अब मि फिर से ऊं तैं अर दुसरा सभियूं तैं चितै दींदु, जन कि मिल पैली ईं चिट्ठी मा द्ये छै। अब मि तुम मा तिसरी बार आंण वलो छो अर जु ऊंल अभि भि पाप कन बंद नि कैरी, त कुई भि सजा बट्टी बचि नि सकलो।

³मि यु बुल्णु छों किलैकि तुम सबूत मंगणा छा, कि मसीह मेरा द्वारा बुल्द, अर मसीह तुम तैं सुधरदो च; त यु साबित हूंद की उ कमजोर नि च; पर तुम्हरा बीच मा शक्तिशाली च।

⁴उ कमजोरी का कारण सूली पर चढ़ै त गै, फिर भि पिता परमेश्वर की सामर्थ बट्टी ज्यूँदो च, हम भि उन ही कमजोर छा जन मसीह छो; पर तुम अनुभव करला कि हम पिता परमेश्वर की सामर्थ का द्वारा मसीह का दगड़ी जीवित छा।

⁵अपड़ा आप तैं परखा, यु दिखणु कु कि क्य तुम्हरो विश्वास सचो च या न, कि तुम विश्वास मा छा या न; अपड़ा आप तैं जांचा, क्य तुम अपड़ा बारा मा यु जंणदा छा, कि यीशु मसीह तुम मा च? नथरी तुम निकम्मा छा।

⁶पर मेरी आस च, कि तुम जांणि ल्या, हम निकम्मा नि छा।

⁷अर हम अपड़ा पिता परमेश्वर बट्टी प्रार्थना करदा, कि तुम कुई बुरै नि कैरा; हम या प्रार्थना करदा, यु दिखांणु कु न कि तुम्हरा बीच मा हमारी सेवकाई सफल रौ, बल्कि इलै कि हम चांदा छा कि तुम ठिक काम कैरा चाहे हम खुद असफल ही हवे जां।

⁸किलैकि हम सचै का विरोध मा कुछ नि कैरी सकदा, पर सचै कु ही कैर सकदा।

⁹जब हम कमजोर छा, अर तुम विश्वास मा तागतबर छा, त हम खुश हूंदियां, अर य प्रार्थना भि करदा, कि तुम विश्वास मा सिद्ध हवे जावा।

¹⁰इलै मि तुम तैं य बात लिखणु छों यां से पैली कि मि तुम मा ओ कि तुम तैं दण्ड दे के मि तैं अपड़ो अधिकार कु इस्तेमाल नि कन पोडो जु प्रभु ल मि तैं द्ये; किलैकि मि अपड़ा अधिकार कु इस्तेमाल तुम्हरा विश्वास तैं मजबूत कनु कु कन चांणु च न कि नाश कनु कु।

¹¹हे विश्वासी भयों, खुश रावा; सिद्ध बणदी जावा; मेरी सलाह सूंणा; एक ही मन रावा; मेल से रावा, अर प्रेम अर शान्ति कु दाता पिता परमेश्वर तुम दगड़ी होलो।

¹²एक दुसरा तैं मसीही अभिवादन बट्टी प्रणाम कैरा।

¹³सभि यीशु मसीह का पवित्र लोग तुम तैं प्रणाम बुल्णा छिनी।

¹⁴प्रभु यीशु मसीह की कृपा अर पिता परमेश्वर कु प्रेम अर पवित्र आत्मा की सहभागिता तुम सभियूं का दगड़ी हूंदी रौ।