Read Garhwali 2 कुरिन्थियों 3 Bible Online

2 कुरिन्थियों 3 - Garhwali bible

2 कुरिन्थियों 3

¹क्य हम दुबरा अपड़ी बढ़ै कना रां? या कुछ अन्य आदमियों का जन सिफारिश की चिठ्ठी तुम मा लांण या तुम मा बट्टी लींण चयणी च? बिल्कुल भि न।

²तुम खुद ही एक चिठ्ठी का जन छा जु हम कु सिफारिश करद; जु हमारा दिल पर लिखीं च, अर हर कुई यु तैं पढ़ी सकद अर तुम्हरा बीच मा हमारा भला कामों तैं पैछाण सकद।

³यु प्रगट च, कि तुम मसीह की तरपां बट्टी एक चिठ्ठी का जन छा अर य चिठ्ठी हमारी सेवकाई कु सबूत च; जु स्याही ल न, या ढुंगा की पटियों पर न, पर ज्यून्दा पिता परमेश्वर का आत्मा का द्वारा मनिख्युं का दिल की पटियों पर लिखै गै।[3]

⁴हम यु इलै बुल्दियां किलैकि हम तैं मसीह का द्वारा पिता परमेश्वर पर विश्वास च।

⁵हम यु नि बुल्दियां कि हम मा खुद ही सब कुछ कने की क्षमता च; पर पिता परमेश्वर हम तैं यु क्षमता दींद।

⁶जैल हम तैं नई प्रतिज्ञा का सेवक हूंणै की क्षमता द्ये, मूसा की व्यवस्था का सेवक हूंणै की न पर पवित्र आत्मा की; किलैकि मूसा की व्यवस्था तैं नि मनणु कु नतीजा त मौत च, पर पवित्र आत्मा अनन्त जीवन दींद।[4]

⁷जब मूसा की व्यवस्था ज्वा ढुंगा की पठालों पर लिखीं छै, दिये गै, वे बगत पिता परमेश्वर की महिमा दिखै द्ये; इस्राएल का लोग लंबा बगत तक मूसा का मुक तैं नि देखि सकिनि किलैकि उ चमकणु छो, जबकि य चमक जादा लम्बा बगत तक नि रै; इलै जु मूसा की व्यवस्था पर जुड़ीं सेवकाई मौत का तरपां लिजांदी त, जै की य महिमा च त वेकी आत्मा सेवकाई की महिमा बट्टी और जादा होली।

⁹किलैकि जब भंगारी ठैरांण वली वाचा तेजोमय छै, जु अपड़ा लुखुं तैं पिता परमेश्वर का संमणी धर्मी बणांद और भि जादा महिमामय च अर व और भि तेजोमय किलै नि होली?

¹⁰अर व महिमा की चमक ज्वा मूसा की व्यवस्था का द्वारा छै, वेकी अब कुई चमक नि रै, किलैकि नई प्रतिज्ञा का अनुसार व जादा तेजोमय नि च।[5]

¹¹किलैकि मूसा की व्यवस्था एक इन चमक का दगड़ी दिए गै ज्वा लम्बा बगत तक नि रै; पर नई प्रतिज्ञा की महिमा भौत जादा च किलैकि य हमेशा तक बंणि राली।

¹²इलै इन आस रखि के हम हिम्मत का दगड़ी बोलि सकदा।

¹³अर हम मूसा का जन न, जैल अपड़ा मुक पर परदा डाली कि इस्राएल का लोग वेका पर कम हूंद चमक तैं गायब हूंण तक नि देख ल्यां।[6]

¹⁴पर इस्राएल का लुखुं का मन ढीट हवे गै छा, किलैकि आज तक पुरणी वाचा तैं पढ़दी बगत ऊंका मन पर उ ही परदा पुड़यूँ रौंद; पर जब उ मसीह पर विश्वास करदींनि, पर तब ही परदा हटद।

¹⁵अर आज तक जब कभी मूसा की व्यवस्था की किताब पढ़ै जांद, त ऊंका मनों मा परदा पुड़यूं रौंद अर इलै यु तैं पूरा ढंग से नि समझदींनि।

¹⁶पर जब कभी ऊंको मन प्रभु यीशु पर विश्वास करद, तब उ परदा उठि जांद।[7]

¹⁷प्रभु त आत्मा च; अर जख कखी प्रभु कु आत्मा च उख पुरणी प्रतिज्ञा बट्टी आजादी च।

¹⁸हम सब एक शीशा जन पिता परमेश्वर का महिमा का तेज तैं इन मुकूं बट्टी दर्शादा जै पर पर्दा नि पुड़यूँ, त पिता परमेश्वर हम तैं लगातार बढ़यां तेज मा जादा से जादा अफ जन बनांणु च। यु तेज प्रभु बट्टी ही मिल्दा, जु पवित्र आत्मा च।