Read Garhwali 2 कुरिन्थियों 5 Bible Online

2 कुरिन्थियों 5 - Garhwali bible

2 कुरिन्थियों 5

¹किलैकि हम जंणदा छा, कि जु धरती पर कु हमारो यु अस्थायी देह नाश हवे जौं त हम तैं पिता परमेश्वर का तरपां बट्टी स्वर्ग मा एक इन देह मिललि, जु मनिख्युं का हथों बट्टी बंणि देह न पर चिरस्थाई च।[10]

²ईं देह मा त हम कणौदयां, अर बड़ी इच्छा रखदां; कि हम स्वर्गीय देह तैं धारण कैरा।

³कि जब हम तैं व स्वर्गीय देह मिललि, त हम नंगी नि रौला।

⁴अर हम यु देह मा रै के बोझ बट्टी दबयां रौंदियां; किलैकि हम यूं सांसारिक देहों तैं छुड़ण नि चदयां, पर हम चदयां, कि पिता परमेश्वर हम तैं स्वर्गीय देह द्यो, कि हमारी नई देह जु हमेशा बंणि राली, व यूं देहों तैं बदल दयालो जु मोरि जाली।

⁵अर जैल हमारा नई देहों तैं तैयार कैरी उ पिता परमेश्वर च, जैल हम तैं बयना मा पवित्र आत्मा भि द्ये जु यु पक्को करदा की पिता परमेश्वर वे तैं जरूर पूरो करलो।

⁶इलै हम हमेशा निश्चित रौंदियां अर यु जंणदा; कि जब तक हम देह मा छा, तब तक हम प्रभु बट्टी दूर छा, जु स्वर्ग मा च।

⁷जब हम अभि ईं दुनिया मा रौंणा छा, हम अपड़ा विश्वास का द्वारा प्रभु का पिछनै चलणा छा, न कि वे तैं देखि के।

⁸इलै हम निश्चित रौंदियां, अर जब हम मुरुला त प्रभु का दगड़ी रौंण और भि उत्तम समझदियां।

⁹इलै हमारी मन की मनसा य च, कि हम वे दगड़ी स्वर्ग मा रां, जब हम इख धरती पर रां तभि भि हम पिता परमेश्वर तैं खुश करदी रां।

¹⁰किलैकि जरूरी च, कि हम सभियूं कु मसीह का द्वारा न्याय आसण पर बैठण का द्वारा न्याय किये जौं, कि हर एक आदिम अपड़ा-अपड़ा भला बुरा कामों का बदला जु वेल देह का द्वारा कैरी हूंनु, पौ।[11]

¹¹इलै प्रभु की डौर मांणी के हम सत्य पर विश्वास कनु कु लुखुं बट्टी बिनती करदा अर पिता परमेश्वर हम तैं पूरा ढंग से जंणदु च; अर मेरी आस य च, कि तुम्हरो विवेक हम तैं अच्छा ढंग से जंणदु च।

¹²हम फिर भि अपड़ी बड़ै तुम्हरा संमणी नि करदा पर हम अपड़ा बारा मा तुम तैं घमण्ड कनु कु मौका दींदयां, कि तुम ऊं तैं जवाब दे साका, जु मन मा न, पर भैरा का दिखावा पर घमण्ड करदींनि।

¹³कुई बुल्द कि हम पागल छा, त पिता परमेश्वर कु; अर जु होश मा छा, त तुम्हरा भला कु ही छा।

¹⁴किलैकि मसीह कु प्रेम हम तैं चलौंद; इलै कि हम निश्चित छा, कि एक आदिम सभि लुखुं कु मोरि गै, इलै सभि लोग मोरि गैनी।

¹⁵अर इलै मसीह सभियूं कु मोरि, कि जु ज्यूँदो च, उ अगनैं बट्टी अफ तैं खुश कनु कु न जियो पर ऊं तैं मसीह कु जींण चयणु च। मसीह ऊंकु मोरि अर पिता परमेश्वर ल वे तैं ज्यूँदो कैरी।

¹⁶इलै अब बट्टी हम कै तैं भि सांसारिक नजरिया का ढंग पर न्याय नि कैरा, अर जु हम ल मसीह तैं भि देह का अनुसार जांणि छो, त अब बट्टी वे तैं इन नि जंणुला।

¹⁷इलै, जु कुई मसीह पर विश्वास करद त वेको एक नयो अस्तित्व च; पुरणो स्वभाव बीत गै; देखा, उ सभि नयो हवे गै।[12]

¹⁸अर सभि बात पिता परमेश्वर की तरपां बट्टी छिनी, जैल मसीह का द्वारा अफ दगड़ी हम तैं अफ मा मेल किये, अर लुखुं कु परमेश्वर का दगड़ी मेल मिलाप कनु कु काम दिये गै।

¹⁹मतलब कि पिता परमेश्वर सभि लुखुं कु एक इन रस्ता बनांणु च कि जु कुछ भि मसीह ल दुनिया मा हम कु कैरी वेका द्वारा परमेश्वर का दगड़ी मेल मिलाप कैर साका, अर लुखुं का पापों कु भंगार ऊं पर नि लगै अर पिता परमेश्वर ल शान्ति का बारा मा वेका शुभ संदेश तैं बांटणो कु काम हम तैं सौंपी द्ये।

²⁰इलै हम मसीह का राजदूत छा; किलैकि पिता परमेश्वर शुभ संदेश तैं स्वीकार कनु कु हमारा द्वारा लुखुं बट्टी निवेदन करद, अर वेका हम तैं दूसरों का बीच शान्ति बनांण कु काम दियुं च कि पिता परमेश्वर दगड़ी मेल कैरी ल्या। [13]

²¹मसीह पाप बट्टी अनजान छो, वे तैं ही पिता परमेश्वर ल हम कु पापी ठैरे[14], कि हम पिता परमेश्वर की नजर मा धर्मी बंणि जां किलैकि मसीह ल हमारा पापों कु दण्ड अपड़ा मथि लै।