Read Garhwali 2 कुरिन्थियों 8 Bible Online

2 कुरिन्थियों 8 - Garhwali bible

2 कुरिन्थियों 8

¹अब हे विश्वासी भयों, मि तुम लुखुं तैं वीं दया का बारा मा बतांण चांणु छो, जै तैं पिता परमेश्वर ल मकिदुनिया प्रान्त की मण्डलियों तैं द्ये।

²जब बिज्यां मुशीबतों बट्टी ऊं की अजमैश हवे, त उ भौत खुश हवीनि अर जबकि उ भौत गरीब छा फिर भि ऊंल दुसरा विश्वासियों की मदद कनु कु भौत उदारता ल धन द्ये।

³अर ऊंका बारा मा मेरी य गव्है च, कि ऊंल अपड़ी सामर्थ से भि बड़ी के अपड़ा मन से दान द्ये।

⁴ऊंल त हम बट्टी भौत बिनती कैरी के मि बट्टी अनुमति मांगी कि ऊं तैं भि यरूशलेम शहर का विश्वासियों की मदद कनु कु सेवा कु काम कनु कु सौभाग्य मिलो।

⁵अर हम ल यांकि आस बिल्कुल भि नि कैरी छै, पर ऊंल अपड़ा आप तैं पैली प्रभु तैं अर फिर हम तैं दे दींनि, ठिक उन ही कै जन पिता परमेश्वर चांदु छो कि उ कैरा।

⁶इलै हम ल तीतुस तैं समझै, कि जन ऊंल पैली शुरू कैरी छो, उन ही तुम्हरा बीच मा यु दान का काम तैं पूरो भि कैरो।

⁷पर जन हर बात मा मतलब विश्वास, शिक्षा दींणै की क्षमता, ज्ञान अर सब ढंग की कोशिश मा, अर वे प्रेम मा, जु हम बट्टी रखदां, बढ़दी जणदां, उन ही गरीब विश्वासियों कु दान का काम मा भि बढ़दी जावा।

⁸मि आज्ञा की रीति पर त न, पर दुसरों का उत्साह बट्टी तुम्हरा प्रेम की सचै तैं परखणु कु बुल्णु छो।

⁹तुम हमारा प्रभु यीशु मसीह की दया तैं जंणदा छा, कि उ धनी हवे के भि तुम कु कंगाल बंणि गै कि मसीह का कंगाल हूंण ल तुम सभि धनी हवे जावा।

¹⁰अर पिछला साल तुम ल भस दींण मा ही न बल्कि इन कनै की इच्छा रखण मा भि पैला छा; यु बारा मा तुम कु सबसे अच्छो क्य च वेका बारा मा मेरी सलाह य च।

¹¹इलै अब जु तुम ल शुरू कैरी वे तैं पूरो कैर; शायद तुम भि यु तैं खत्म कनु कु उथग ही उत्सुक छा जथग कि तुम यु तैं शुरू कन मा छा।

¹²जु कै मा दान दींणै की इच्छा च त जु कुछ वेमा च, वेका ही आधार पर वेको दान स्वीकार होलो अर वेका आधार पर न, जु वेमा नि च।

¹³मि नि चांदु कि दूसरों का जीवन तैं आसान बनांण कु तुम्हरो अपड़ो जीवन कठिन हवे जौं; पर सभियूं मा बराबर हूंण चयणु च।

¹⁴पर बराबरी का विचार से यु बगत तुम्हरी बढ़ती ऊं की घटि मा काम औ, कि आंण वला बगत मा वेकी बढ़ती भि तुम्हरी घटि मा काम औ, कि बराबरी हवे जौं।

¹⁵जन कि परमेश्वर का वचन मा लिख्युं च, “जैल जादा जमा कैरी वेकु कुछ जादा नि निकली अर जैल थोड़ा जमा कैरी वेको कुछ कम नि निकली।”[20]

¹⁶पिता परमेश्वर कु धन्यवाद हो, जैल तुम कु उ ही चिंता तीतुस का मन मा डाली जु चिंता मि तैं तुम कु च।

¹⁷कि जब हम ल वे तैं तुम मा जांणु कु बोलि, त वेल हमारा निवेदन कु सम्मान कैरी बल्कि भौत खुश हवे के उ अपड़ी ही इच्छा ल तुम मा ऐ।

¹⁸अर हम ल वे दगड़ी हैंका विश्वासी भैय तैं भेजि जैको नौं शुभ सन्देश प्रचार कना का बारा मा सभि मण्डलि का विश्वासियों मा फैलयूं च;

¹⁹अर इथग ही न, पर उ मण्डलि का लुखुं का द्वारा ठैरे भि गै कि यु दान का काम कु हम दगड़ी जौं अर यरूशलेम शहर मा विश्वासियों कु लिए जांणा वला दान की सेवा इलै करदा, कि प्रभु की महिमा अर यु दिखांणु कु कि हम यरूशलेम शहर मा विश्वासियों की मदद कनु कु उत्सुक छा।

²⁰हम ईं बात मा चौकस रां, कि तीतुस का दगड़ी वे विश्वासी दगड़िया तैं भिजणा का द्वारा यु उदारता का काम का बारा मा जै की सेवा हम करदा, कुई हम पर भंगार नि लगौंण पौ।

²¹किलैकि जु बात भस प्रभु ही का नजीक न, पर मनिख्युं का भि नजीक अच्छी च हम ऊं कामों तैं अच्छा ढंग से कनु कु ध्यान दींदयां।

²²अर हम ल ऊं दगड़ी अपड़ा दुसरा भयों मा बट्टी भि कै तैं भिजणा छा, जै तैं हम ल बार-बार परखि के भौत सी बातों मा उत्साहित पै; पर अब तुम पर वे तैं भौत भरोसा च, इलै उ और भि जादा उत्साहित च।

²³जु कुई तीतुस का बारा मा पूछो, त उ मेरू दगड़िया च, अर तुम कु मेरू सहकर्मी प्रेरित च, अर जु हमारा विश्वासी भयों का बारा मा पूछो, जु उ मण्डलियों तैं भिज्यां छिनी अर ऊंको जीवन मसीह की महिमा कु च।

²⁴इलै अपड़ो प्रेम अर हमारो उ गर्व जु तुम्हरा बारा मा च मण्डलि का संमणी ऊं तैं साबित कैरी के दिखावा।