Read Garhwali 2 कुरिन्थियों 9 Bible Online

2 कुरिन्थियों 9 - Garhwali bible

2 कुरिन्थियों 9

¹अब यरूशलेम शहर मा विश्वासियों तैं दान दींण की सेवकाई का बारा मा जु पवित्र लुखुं कु किये जांद, मि तैं तुम तैं कुछ लिखणै की जरूरत नि च।

²किलैकि मि तुम्हरी मन की दींणै की इच्छा तैं जंणदु छो, जैका कारण मि तुम्हरा बारा मा मकिदुनिया प्रान्त का विश्वासियों का संमणी गर्व दिखांदु, कि अखाया प्रान्त का तुम लोग पिछला बरस बट्टी तैयार हुयां छा, अर तुम्हरा उत्साह ल और भौतों तैं भि उभारी।

³पर मि तीतुस अर द्वी हैंका विश्वासी भयों तैं तुम मा भिजणु छों कि जु गर्व मि तुमारा बारा करदु उ गर्व कन बेकार नि ठैरु; पर जन मिल बोलि, उन ही तुम यरूशलेम शहर मा विश्वासियों कु दान दींणु कु तैयार रावा।

⁴कखि इन नि हो, कि जु कुई मकिदुनिया प्रान्त बट्टी कुछ विश्वासी मि दगड़ी आं, अर तुम्हरो दान तैयार नि पौं, त इन हवे सकदो च कि हम तुम्हरा मथि अपड़ा भरोसा का कारण शर्मिंदा हों, पर तुम और भि जादा शर्मिंदा हवेला।

⁵इलै मिल विश्वासी भयों बट्टी इन बिनती कन जरूरी समझी कि उ पैली बट्टी तुम मा जां, अर तुमारा उदारता का फल ज्यांका बारा मा पैली बट्टी वचन दिये गै छो, तैयार कैरी के रखा, कि यु जोर-जबरदस्ती से न बल्कि उदारता की आशीष का जन तैयार हो।

⁶पर बात त या च, जु जरा सी बुतलो उ जरा सी ही कटलो; अर जु जादा कै बुतलो उ जादा कै आशीष का दगड़ी कटलो।

⁷हर कुई जन-जन अपड़ा मन मा ठांणी द्यो उ उन ही दान द्यो; न कि किच-किच कैरी कै, अर न जबरदस्ती से, किलैकि जु खुशी से दान दींदो वे बट्टी पिता परमेश्वर प्रेम रखदो।[21]

⁸पिता परमेश्वर सभि ढंग की दया तुम तैं जु भि तुम तैं जरूरत हो बहुतायत ल दे सकद। ज्यां बट्टी हर बात मा अर हर बगत, सब कुछ, जु तुम तैं जरूरी च, तुम मा रौ, तब तुम मा भला काम कनु कु जरूरत से जादा होलो।

⁹जन परमेश्वर का वचन मा लिख्युं च, “पिता परमेश्वर जरूरतमंदों तैं उदारता ल दींदो, वेकी धार्मिकता हमेशा बंणि राली।”

¹⁰किलैकि पिता परमेश्वर उ च जु किसान कु बीज अर फिर खांणु कु रुठी दींदो। उन ही, उ तुम्हरा स्रोतों तैं उपलब्ध करालो अर बढ़ालो अर फिर तुम मा उदारता की एक बड़ी फसल पैदा करालो।

¹¹तुम हर ढंग से आशीषित हवेला, अर इलै तुम हमेशा उदारता ल दींण का योग्य छा, अर जब हम तुम्हरा उदारता ल दियां दान तैं जरूरतमंद लुखुं तैं दीला, त उ लोग पिता परमेश्वर कु धन्यवाद करला।

¹²किलैकि यु सेवा तैं पूरो कन से, न भस पवित्र लुखुं की कमी पूरी हूंदी, पर लुखुं कि तरपां बट्टी पिता परमेश्वर कु भि भौत धन्यवाद हूंद।

¹³किलैकि दूसरों की मदद कनु कु दान दींणै की य सेवकाई प्रमाणित करली कि तुम सच्चा छा अर भौत लोग पिता परमेश्वर की महिमा प्रगट करदींनि, कि जब तुम ल बोलि कि मसीह कु शुभ सन्देश सचो छो अर तुम यु तैं मणला त तुम ल अफी अपड़ा शब्दों कु पालन कैरी, अर गरीब विश्वासियों की अर और विश्वासियों का दगड़ी ही सब विश्वासियों की मदद कन मा उदारता प्रगट कैरी।

¹⁴उ तुम कु पिता परमेश्वर बट्टी प्रार्थना करला। उ तुम बट्टी प्रेम करदींनि, किलैकि उ जंणदा छिनी कि पिता परमेश्वर ल तुम लुखुं पर बड़ी कृपा कैरी।

¹⁵आवा हम पिता परमेश्वर कु वेका नौंना कु धन्यवाद कैरा जैका बारा मा कुई भि पूरा ढंग से नि बतै सकद।