Read Garhwali गलातियों 6 Bible Online

गलातियों 6 - Garhwali bible

गलातियों 6

¹हे विश्वासी भयों, जु कुई मनिख कै पाप मा पकड़े जौं त तुम जु पवित्र आत्मा मा आत्मिक छा, त तुम मयळदु हवे के वे तैं धर्म का रस्ता मा वापिस लांण मा वेकी मदद कैरा अर अफ भि सचेत रावा कखि तुम भि अजमैश मा नि पोड़ी जावा।

²अजमैश का बगत एक-हैंका की मदद कना रावा अर इन कै तुम यीशु मसीह की शिक्षाओं (व्यवस्था) तैं मणदियां अर वे तैं पूरो करदा।

³जु कुई सुचद कि उ एक महान आदिम च, जबकि हक्कीकत मा उ छैं नि च, त उ अपड़ा आप तैं धोखा दींणु च।

⁴तुम मा बट्टी हर एक तैं अपड़ा कामों की जाँच कन चयणी च। जु यु अच्छो च त जु कुछ तुम ल कैरी वे पर तुम बड़ो मोन कैरी सकदियां, पर कै और दगड़ी अपड़ा काम की तुलना नि कैरा।

⁵किलैकि हम मा बट्टी हर एक आदिम अपड़ा कामों कु जिम्मेदार अफी च।

⁶यु जरूरी च कि जु लोग पिता परमेश्वर का वचन तैं सिखांदींनि, ऊं तैं सिखण वला लुखुं बट्टी भौतिक मदद मिलण चयणी च।

⁷अपड़ा आप तैं धोखा नि द्या, किलैकि कुई भि आदिम पिता परमेश्वर तैं धोखा नि द्ये सकद, किलैकि मनिख जु कुछ भि बुतद, ऊई कटद।

⁸जु कुई आदिम अपड़ी बुरी इच्छाओं तैं पूरो करद त उ अनन्त मौत तैं पालो अर जु पवित्र आत्मा का अनुसार अपड़ो जीवन जांदु त उ अनन्त जीवन पालो।

⁹हम भला कामों तैं कन मा निराश नि हों, किलैकि जु हम कभी हार नि मांणा, त पिता परमेश्वर का अपड़ा बगत पर हम ईनाम पौला।

¹⁰इलै जख तक मौका मिलो, हम सभि लुखुं दगड़ी भलै कैरा; खास कैरी कै मसीह विश्वासी का भयों का दगड़ी।

¹¹ध्यान द्या कि कन बड़ा-बड़ा अक्षरों मा मिल तुम तैं अपड़ा हथों ल या चिठ्ठी लिखीं।

¹²यहूदियों तैं खुश नि कैरा कि उ तुम तैं स्वीकार कैरा, उ ही लोग तुम तैं खतना कनु कु लाचार करदींनि भस इलै कि उ यीशु मसीह कि सूली का कारण सतै नि जौंन।

¹³इख तक की यहूदी विश्वासी भि मूसा की सैरी व्यवस्था तैं नि मणदींनि, पर उ चदींनि कि तुम्हरो खतना किये जौ कि उ दुसरा यहूदियों का जन बड़ो मोन कैरी के यु बतै सका कि तुम्हरा खतना ऊंका कारण हवे।

¹⁴मि सूली पर हमारा प्रभु यीशु मसीह की मौत का अलावा कभी भि कै हैंकी बात पर बड़ो मोन नि कन चांदु। अर ईं दुनिया की कै भि चीज कु मि तैं कुई लालच नि च, अर मि मा अब दुनिया का कामों तैं कने की कुई इच्छा नि च।

¹⁵किलैकि खतना करौंण अर खतना नि करौंण जरूरी नि च, पर पिता परमेश्वर का पवित्र आत्मा का कामों का द्वारा एक नयो जीवन ज्यूंण जरूरी च।

¹⁶इलै जु लोग पिता परमेश्वर की आज्ञा तैं मणदींनि, पिता परमेश्वर ऊं सभि लुखुं पर दया कैरो अर ऊं तैं शान्ति द्यो, ऊं तैं जु पिता परमेश्वर का द्वारा चुणयां लोग छिनी अर ऊं जौं तैं उ इस्राएल बुल्द।

¹⁷अगनैं कु कुई मि तैं दुःख नि द्यो, किलैकि मेरी देह पर जु दाग छिनी उ दिखदींनि कि मि यीशु मसीह कु एक प्रेरित छों।

¹⁸हे विश्वासी भयों, मि प्रार्थना करदु कि हमारा प्रभु यीशु मसीह की कृपा तुम पर हमेशा हूंणी रौ। आमीन।