Read Garhwali इफिसियों 2 Bible Online

इफिसियों 2 - Garhwali bible

इफिसियों 2

¹पैली जब तुम ल मसीह पर विश्वास नि कैरी छों, त इन लगदु छों जन कि पैली बट्टी मोरि गै छा, हम मा उ जीवन नि छों जु पिता परमेश्वर कि तरपां बट्टी मिल्दु छों, किलैकि तुम ल पाप कैरी अर परमेश्वर कि आज्ञाओं तैं नि मांणि।

²वे बगत तुम यु दुनिया का ऊं लुखुं का तरीकों का अनुसरण करद जु परमेश्वर तैं नि जंणदा छा, अर शैतान कि आज्ञाओं कु पालन करदा छा मतलब वे प्रधान कु जु आकाश मा दुष्टात्मा पर शासन करदु च, जु अभि भि ऊं लुखुं तैं जकड़ कनै कि कोशिश करदो च जु परमेश्वर कि आज्ञा कु पालन नि करदो।

³इलै हम भि ऊंका जन बरतौ करदा, अर अपड़ा पापी स्वभाव कि इच्छा तैं पूरी करदा छा, अर देह कि लालसाओं तैं पूरी करदा, अर लुखुं का जन, हम भि स्वभाविक रूप बट्टी बुरा छा अर परमेश्वर का गुस्सा का अधीन छा।

⁴पर पिता परमेश्वर भौत दयालु च; अर अपड़ा वे बड़ा प्रेम का कारण ज्यां ल वेल हम बट्टी प्रेम कैरी,

⁵जब हम पापों मा छा जन कि पैली बट्टी ही मोरि गै छा, त वेल हम तैं मसीह मा ज्यूँदो कैरी; पिता परमेश्वर की दया बट्टी ही तुमारो बचाव अर उद्धार हुयुं च,

⁶किलैकि पिता परमेश्वर ल हम तैं यीशु मसीह का दगड़ी मुर्दों बट्टी ज्यूँदो कैरी, अर वेल मसीह का दगड़ी हमारा सम्बंध का कारण स्वर्ग मा हम तैं मसीह का दगड़ी जगह दीं च।

⁷पिता परमेश्वर ल इन इलै कैरी कि आंण वला दिनों मा उ दुनिया का लुखुं तैं मिसाल दिखै साको कि ऊंको अनुग्रह कथग महान च। जु कुछ वेल हम कु कैरी हम तैं या दया दिखै गै जु मसीह यीशु का दगड़ी एकता मा छा।

⁸किलैकि जब तुम ल विश्वास कैरी त पिता परमेश्वर ल अपड़ी दया ल तुम तैं बचैयेले, अर तुम ल अपड़ा आप तैं नि बचै, बल्कि यु पिता परमेश्वर कु दान च;

⁹अर यु हमारा द्वारा कैर गै कै भि अच्छा काम का कारण नि च अर हम मा घमंड कनु कु कुई भि कारण नि च।

¹⁰किलैकि हम तैं परमेश्वर ल बंणै गै; अर मसीह यीशु मा भला काम कनु कु हम तैं नया लुखुं का रूप मा बंणै जै तैं पिता परमेश्वर ल पैली ही बट्टी हम कु तैयार कैरी।

¹¹इलै याद कैरा, कि तुम जन्म बट्टी अन्यजाति छा अर यहूदी लुखुं यु बोलि के नीच जांणि कि तुम खतना नि करदां, पर ऊंकी या रीति भस ऊं देह पर ही किये जांद,

¹²तुम लोग वे बगत मसीह तैं नि जंणदा छा, अर परमेश्वर का चुणयां लोग इस्राएल का जन नागरिक का रूप मा भागिदार नि छा, अर तुम ऊं भलि चीजों का भि भागिदार नि छा जौंकु वादा पिता परमेश्वर ल यहूदीयों बट्टी कैरी छों अर आस हीन हवे कै अर पिता परमेश्वर तैं बगैर जणयां ईं दुनिया मा रौंदा छा।

¹³एक बगत छों जब तुम दूर छा, पर अब मसीह यीशु मा वेका ल्वे का द्वारा नजदीक ऐ ग्यां।

¹⁴मसीह ल अफ ही हमारा बीच शान्ति स्थापित कैरी। पिछला बगत मा उ इन छा, एक दीवार ल यहूदियों अर अन्यजातियों तैं अलग कैरी दये छों, उ एक दुसरा बट्टी नफरत करदा छा, पर मसीह ल वीं दीवार तैं गिरै द्यां अर द्वी झुण्ड तैं एक कैरी दये।

¹⁵सूली पर मसीह कि मृत्यु का कारण, वेल मूसा कि व्यवस्था की पूरी रीति तैं खत्म कैरी दींनि। इन कन मा मसीह कु लक्ष्य द्वी अलग-अलग झुण्ड बट्टी एक नयो झुण्ड बनांणु कु छों जु वे बट्टी जुड़यूं छों,

¹⁶अर सूली पर अपड़ा मृत्यु का द्वारा, मसीह ल द्वी झुण्ड तैं एक कैरी अर ऊंको मेल पिता परमेश्वर बट्टी करद्यां, इलै मसीह ल यहूदियों अर अन्यजातियों का बीच बैर तैं खत्म कैरी दये।

¹⁷अर मसीह ल ऐ के तुम अन्यजातियों तैं, जु पिता परमेश्वर बट्टी दूर छा, अर यहूदियों तैं जु नजदीक छा मेल मिलाप अर शान्ति कु शुभ सन्देश प्रचार सुंणै।

¹⁸मसीह ल हम कु जु कैरी वेका कारण अब हम सब उ एक पवित्र आत्मा का द्वारा पिता परमेश्वर का नजदीक ऐ सकदां छा।

¹⁹इलै तुम अन्यजाति अर परदेशी मुसाफिर नि रयां, पर पवित्र लुखुं का दगड़ी नागरिक छा अर परमेश्वर का कुटुम्ब का लोग छा।

²⁰प्रेरितों अर परमेश्वर कि तरपां बट्टी बुल्ण वलो कि बुनियाद पर हम एक इमारत का जन छा अर जैकु जरुरी ढुंगो यीशु मसीह च।

²¹मसीह ही उ च जु पूरी इमारत तैं एक दगड़ी जोड़ि रखणों कु कारण च। उ परमेश्वर कु एक पवित्र मंदिर बनांणु कु अपड़ा सभि लुखुं तैं एक दगड़ी जुड़दो।

²²हे अन्यजाति विश्वासियों, किलैकि तुम मसीह का दगड़ी एकजुट हो, इलै तुम तैं भि परमेश्वर का अन्य लुखुं का दगड़ी जुड़ै जांणु च, कि तुम एक इन घौर बंणि जावा जख परमेश्वर पवित्र आत्मा कि सामर्थ बट्टी रौंदो।