Read Garhwali फिलिप्पियों 2 Bible Online

फिलिप्पियों 2 - Garhwali bible

फिलिप्पियों 2

¹तुम तैं हर्ष हो कि तुम मसीह बट्टी जुड़यां छा अर तुम तैं मसीही का प्रेम बट्टी तसल्ली मिलीं च, अर पवित्र आत्मा कु दगड़ो, अर किलैकि मसीह तुम कु दयालु अर मयलदु च,

²त फिर मेरा यु आनन्द तैं इन कै पूरो कैरा कि एक मन रावा अर एक ही प्रेम अर एक ही मनसा रखा।

³घमण्ड या अहंकार कु कुछ नि कैरा पर दीनता से एक हैंका तैं अफ से अच्छो समझा।

⁴हर एक अपड़ी ही भलै की न पर दुसरों कि भलै कि भि चिंता कैर।

⁵जन मसीह यीशु कु बरतौ छो उन ही तुमारो बरतौ भि हो;

⁶उ हर ढंग से पिता परमेश्वर का जन छो फिर भि मसीह ल परमेश्वर दगड़ी अपड़ी बराबरी तैं बणये रखण सै नि समझी।

⁷बल्कि वेल अपड़ो सभि कुछ ईश्वरीय अधिकार तैं भि छोड़ दींनि जन बुल्दींनि कि वेल सब कुछ पिछनै छोड़ी दींनि अर सेवक कु रूप धारण कैरी, अर उ मनिख बंणि गै।

⁸अर मनिख का रूप मा प्रगट हवे के अपड़ा आप तैं दीन कैरी, अर पिता परमेश्वर की आज्ञाकारिता मा उ सूली पर एक भंगारी का जन मौत भि सै।

⁹इलै पिता परमेश्वर ल वे तैं सबसे ऊँचा पद पर बैठै, अर वे तैं उ नौं दींनि जु सभि नौं मा बड़ो च।

¹⁰इलै जु स्वर्ग मा, अर धरती पर, अर जु धरती का मूड़ी छिन; उ सभि यीशु का सम्मान कु घुंडा टेकुनु,

¹¹अर पिता परमेश्वर कि बड़ै कु सभि लोग अंगीकार कैरो कि यीशु मसीह ही प्रभु च।

¹²जब मि तुम दगड़ी छो तब तुम ल हमेशा पिता परमेश्वर की आज्ञा कु पालन कैरी अब जब मि दूर हवे ग्यों, त तुम तैं और भि बात मनण चयणी च। पिता परमेश्वर डौर का दगड़ी तुम मा बट्टी हर एक तैं ऊं चीजों तैं कन चयणु च जूं ऊं लुखुं कु सै च जौं तैं पिता परमेश्वर ल उद्धार द्ये अर बचै।

¹³किलैकि परमेश्वर ही च, जु तुम्हरा भितर काम कनु च, अर तुम तैं उ कनै की इच्छाशक्ति दयूंणु च, ज्यां बट्टी वे तैं खुशी मिलदी।

¹⁴सब काम बगैर बबड़य्यां अर बगैर झगड़ा ल कैरा करा;

¹⁵किलैकि तुम निर्दोष अर सीधा हवे के टेढ़ा अर भ्रष्ट लुखुं का बीच मा पिता परमेश्वर कि निष्कलंक सन्तान बंणि के रै सक्यां, तुम ईं दुनिया का लुखुं का बीच मा आकाश का गैणों का जन चमका, जब तुम ऊं तैं उ वचन बतांद छा जु हमेशा कु जीवन दींदी,

¹⁶कि मसीह का फिर से औंणा का दिन मि तैं घमंड कनु कु कारण हो कि मेरी कोशिश अर मेरी मेहनत बेकार नि रौ।

¹⁷प्रभु पर तुम्हरो विश्वास अर वेका प्रति तुम्हरी सेवा परमेश्वर तैं चढै गै बलिदान का जन च। जु उ मि तैं मारि भि डलला, त मि वे दाखरस का जन होलो जै तैं याजक तुम्हरा बलिदान का मथि एक पीणै की भेंट कैरी के अखणांद कि बलिदान तैं पूरो कैरो।

¹⁸उन ही तुम भि खुश रावा, अर मि दगड़ी खुशी मंणावा।

¹⁹मि तैं प्रभु यीशु मसीह पर आस च कि मि तुम मा तीमुथियुस तैं तुरंत भिजलु, कि वे बट्टी तुमारी दशा सूंणि के मि तैं खुशी मिलो।

²⁰किलैकि मि मा इन बरतौ कु कुई और नि च, जु सच्चा मन बट्टी तुमारी चिंता कैरो।

²¹किलैकि सब अपड़ा स्वार्थ कि खोज मा रौदींनि, उ मसीह यीशु बट्टी जुड़ीं बातों का बारा मा परेशान नि छिनी।

²²पर तुम जंणदा छा कि तीमुथियुस ल कन कै दिखै की उ वफादार च कि जन नौंनो बुबा दगड़ी काम-काज करदो, उन ही वेल भि शुभ सन्देश का फैलांण मा मि दगड़ी मेहनत कैरी।

²³इलै मि तैं इन आस च कि जन मि तैं पता चललो कि मेरी क्य दशा होली, त उन ही मि वे तैं तुरंत भेजि दयुलु।

²⁴अर मि तैं प्रभु मा भरोसो च कि मि अफ भि जल्दी औलु।

²⁵मिल इपफ्रुदीतुस तैं तुम मा भिजण जरूरी समझी। उ मेरू भैय, अर ऊं शुभ संदेश कु विरोध कन वला लुखुं का विरुद्ध मा मि दगड़ी एक योद्धा का जन खड़ो छो जु तुम्हरो संदेश मि तैं पौछांण वलो एक प्रेरित च, अर जरूरी बातों मा मेरी सेवा कन वलो च

²⁶वेको ज्यू तुम सभियूं मा लग्युं छो, किलैकि तुम ल वेकी बिमारी कु हाल समाचार सूंणि, इलै उ तुमारी चिंता करदु।

²⁷सचमुच मा उ बिमार त हवे गै छो, इख तक कि मुरण पर छो, पर पिता परमेश्वर ल वे पर दया कैरी; अर वे पर ही न पर मि पर भि और भि बड़ो दुःख नि हूंण द्ये।

²⁸इलै मिल वे तैं भेजणै कि और भि जादा कोशिश कैरी कि तुम वे बट्टी मिली के खुश हवे जां अर मेरी भि चिंता कम हवे जौं।

²⁹इलै तुम प्रभु मा वे बट्टी भौत खुशी से मिल्यां, अर तुम वेको अर वेका जन लुखुं कु आदर कना रयां।

³⁰इलै की उ मसीह का कामों कु अपड़ा प्राण तैं भि खतरा मा डाली के मुरण कु तैयार हवे गै छो, कि उ, ऊं तरीकों ल मेरी मदद कैर साका, जु तुम नि कैरी सकणा छा किलैकि तुम भौत दूर छा।