Read Garhwali कुलुस्सियों 2 Bible Online

कुलुस्सियों 2 - Garhwali bible

कुलुस्सियों 2

¹मि इन चांणु छों कि तुम यु जांणि ल्यावा, कि मि तुम कु अर ऊंकु जु लौदीकिया शहर मा छिनी, अर ऊं सभियूं कु जौं तैं मि आज तक नि मिल, कन मेहनत करदु छों।

²मि इन इलै करदु कि मि ऊं तैं तुम्हरा विश्वास मा मजबूत कन चांणु छों, अर एक दुसरा का प्रति तुम्हरो प्रेम तुम तैं कठ्ठा करलो, मि चांदु छों कि ऊं तैं पूरी हिम्मत हो किलैकि ऊं तैं पिता परमेश्वर की गुप्त योजना की पूरी समझ च, जु खुद मसीह ही च।

³उ ऊई च जु पिता परमेश्वर की बुद्धि अर ज्ञान की पहचाण कराद जु कि वे खजाना जन च जु छिपायूं च।

⁴यु मि इलै बुल्ण छौं, कि कुई मनिख तुम तैं ऊं की झूठी शिक्षाओं पर विश्वास कनु कु राजी कैरी के धोखा नि द्यो।

⁵किलैकि मि तुम से दूर छौं, तब भि आत्मिक रूप बट्टी तुमारा नजदीक छौं, अर मि खुश छों कि तुम कठ्ठा छा अर तुम अपड़ा विश्वास मा जु यीशु मसीह मा जीवन जींणा छा।

⁶इलै जन तुम ल मसीह यीशु तैं प्रभु मांणी के अपणे, उन ही वे दगड़ी चलदी रावा

⁷जन एक डालो धरती मा जड़ पखड़दो अर एक घौर बुनियाद पर मजबूत रौंदो उन ही तुम अपड़ा विश्वास मा मजबूत हूंदी जावा, अर हमेशा वेमा बढ़दी जावा, जन तुम तैं सिखै छो अर जादा से जादा धन्यवाद करदी रावा।

⁸सचेत रावा की कुई तुम तैं दुनिया का ज्ञान अर बेकार की बातों बट्टी धोखा का द्वारा फंसै नि द्यो, जु बात मनिख्युं कि रीतियों अर दुनिया की शिक्षा का अनुसार त च पर मसीह का अनुसार नि च।

⁹यूं लुखुं तैं अफ तैं धोखा नि दींण द्या, किलैकि मसीह का मनिख देह मा वेमा पिता परमेश्वर कु पूर्ण स्वभाव छो।

¹⁰मसीह हरेक शक्ति अर अधिकार मा प्रधान च। इलै जु तुम मसीह मा छा, त तुम तैं कै भि बात की घटि नि च।

¹¹जब तुम ल मसीह पर विश्वास कैरी, त तुम्हरो खतना मनिख्युं द्वारा नि किये गै जन यहूदी करदींनि पर उ खतना हवे जु मसीह का द्वारा किये गै, जु कि तुम्हरो पापमय स्वभाव तैं काटि कै दूर करद।

¹²अर वेका ही दगड़ा मा तुम्हरो बपतिस्मा हवे के तुम वे दगड़ी दफनये ग्यां जन मसीह दफनये गै अर वे ही दगड़ी ज्यून्दा भि करे ग्यां, किलैकि तुम ल पिता परमेश्वर कि वीं सामर्थ पर विश्वास कैरी जैल मसीह तैं मुर्दों मा बट्टी ज्यूँदो कैरी।

¹³अर वेल तुम तैं भि, जु अपड़ा पापों, अर खतना का जन तुम्हरो बुरो स्वभाव कटै नि गै छो, पिता परमेश्वर ल तुम तैं मसीह का दगड़ी ज्यून्दो कैरी अर हमारा सब पापों तैं माफ कैरी।

¹⁴यु इन छो जन पिता परमेश्वर ल हमारा पापों का दोषपत्र तैं मिटै येले, ज्यांमा हमारा खिलाफ भंगार लिख्यां छा, जब मसीह सूली पर चढ़ै गै तब वेल वे दोषपत्र तैं पूरो हटै दींनि।

¹⁵अर पिता परमेश्वर ल मसीह का सूली पर मुरण का कारण दुनिया की प्रधानताओं अर अधिकारों तैं हरै के ऊं तैं सभि का संमणी बेजती कैरी, अर ऊं पर जीत हासिल कैरी कै खुशी मणै।

¹⁶इलै कुई तुम तैं धोखा नि द्यो अर खांण-पींण का बारा मा या त्योहार का बारा मा या नई जून का बारा मा या यहूदियों का विश्राम का दिन जु परमेश्वर कु पवित्र दिन च कुई तुमारो फैसला नि कैरो।

¹⁷किलैकि यु सभि बात त आंण वलि बातों कु छैल च पर भली चीज त मसीह की ही छिनी।

¹⁸कुई भि मनिख झूठी दीनता, अर स्वर्गदूतों की आराधना कैरी कै, तुम तैं तुम्हरी दौड़ कु प्रतिफल ल्योंणु कु भरमै नि द्यो, कखि तुम अपड़ा फल नि पै सैका। किलैकि इन मनिख दिखीं बातों मा लग्युं रौंदो अर अपड़ी शारीरिक समझ पर बेकार मा बड़ो मोन करदो।

¹⁹उ मसीह से जुड़यूं नि रौंदो जु कि सैरी देह कु मुंड च, अर जै बट्टी सैरी देह जोड़ी रांदि अर पट्ठों का द्वारा खुराक पै के अर दगड़ी जुड़ी कै पिता परमेश्वर कि तरपां बट्टी बढ़दी जांद।

²⁰किलैकि तुम्हरो पापमय स्वभाव मसीह का दगड़ा मोरि गै, इलै अब तुम तैं ईं दुनिया का ज्ञान अर बेकार की बातों तैं मनणै की जरूरत नि च। त फिर तुम किलै अभि भि यूं शिक्षाओं कु पालन करदा, जन कि अभि भि दुनिया तुम तैं नियंत्रित कनी हो?

²¹उ इन शिक्षाओं तैं बंणौंदींनि कि यु नि छुयां वीं चीज नि चख्यां अर वे पर हथ नि लगयां।

²²किलैकि यु सभि शिक्षाओं तैं काम मा लौंद-लौंद खराब हवे जालि, किलैकि यु मनिख्युं का आज्ञा का अर शिक्षा का अनुसार छिनी।

²³यूं शिक्षाओं मा अपड़ी इच्छा का अनुसार बणै आराधना का रिवाज, अर झूठी दीनता, अर अपड़ा देह का दगड़ी कठोर बरतौ कन ही एक ज्ञानी हूंण को ढोंग करद, पर हकीकत मा यु शिक्षा लुखुं तैं ऊंकी बुरी इच्छाओं तैं नियंत्रित कन मा मदद नि करदी।