Read Garhwali कुलुस्सियों 4 Bible Online

कुलुस्सियों 4 - Garhwali bible

कुलुस्सियों 4

¹हे स्वामियों, स्वर्ग मा तुमारो भि एक स्वामी च, इन समझै के, अपड़ा-अपड़ा सेवकों का दगड़ी न्याय अर एक समान बरतौ कैरा।

²चौकस हवे के प्रार्थना मा लगयां रावा अर हमेशा पिता परमेश्वर कु धन्यवाद करदी रावा।

³अर यांका दगड़ा-दगड़ी हम कु भि प्रार्थना करदी रावा, कि पिता परमेश्वर हम कु वचन सुणौणु कु इन मौका द्या, कि हम मसीह का वे भेद कु बखान कैरी साका, जै कु प्रचार मिल कैरी अर वे कारण मि कैद मा छौं।

⁴इलै प्रार्थना कना रा, कि मि मसीह का सन्देश तैं ठिक ढंग से बतै साको, कि जु यु तैं सूंणा हकीकत मा यु तैं समझा भि।

⁵हर एक मौका कु अच्छो इस्तेमाल कैरा, यु दिखणु कु कि तुम विश्वासी छा, अर जु लोग यीशु पर विश्वास नि करदींनि वे दगड़ी समझदारी दगड़ी बरतौ कैरा।

⁶तुम्हरी बात सदनी नम्र अर सुणन मा अच्छी हो, कि तुम तैं हरेक मनिख तैं जवाब दींण ऐ जौं कि तुम क्य विश्वास करद्यां।

⁷प्रिय विश्वासी भैय तुखिकुस, जु भरोसामन्द सेवक अर प्रभु मा हमारो दगड़िया च, उ ही तुम तैं मेरी सभि बात बतै दयालो।

⁸मिल वे तैं तुम मा इलै भेजि, कि तुम तैं पता चलि जौं कि हम कन छा अर उ तुम तैं विश्वास मा और मजबूत कैरो।

⁹वे दगड़ी उनेसिमुस तैं भि भेजि; जु भरोसा का लैख प्रिय विश्वासी भैय अर उ तुम्हरा ही नगर कु च, उ तुम तैं इखै कि सैरी बात बतै दयालो।

¹⁰अरिस्‍तर्खुस जु मि दगड़ी जेलखना मा कैद च, अर मरकुस जु बरनबास कु भंणजो लगदो तुम कु प्रणाम बुल्णु च। जैका बारा मा तुम तैं पैली बट्टी ही मालूम च, कि जु उ तुम मा औ त वे दगड़ी अच्छो बरतौ करयां।

¹¹अर यीशु जै कु लोग यूस्तुस बुल्दींनि, तुम कु प्रणाम बुल्णा छिन। यहूदी विश्वासियों जूंको खतना हुयुं च ऊंमा बट्टी भस यु तीन मनिख ही पिता परमेश्वर का राज्य कु मेरा दगड़िया अर मेरू प्रोत्साहन को कारण च।

¹²इपफ्रास जु तुम्हरी ही जगह कु च, अर मसीह यीशु कु सेवक च, उ तुम कु प्रणाम बुल्णु च, अर हमेशा तुम कु मन लगै के प्रार्थनाओं मा लग्युं रौंद, कि पिता परमेश्वर तुम तैं मजबूत अर सिद्ध कैरो अर तुम पूरा विश्वास का दगड़ी पिता परमेश्वर की इच्छा तैं पूरो कनु रौ।

¹³मि वेको गवाह छौं, कि उ तुम कु अर लौदीकिया अर हियरापुलिस शहर का लुखुं कु मन लगै के प्रार्थना कनु रौंदु।

¹⁴प्रिय वैद्य लूका अर देमास तुम कु प्रणाम बुल्णा छिनी।

¹⁵लौदीकिया शहर का विश्वासी भयों अर बैंणों अर नुमफास अर ऊं की घौर की मण्डलि कु प्रणाम बुल्यां।

¹⁶अर जब या चिट्ठी तुम्हरा इख पढ़ै जौं, त तब इन करयां कि लौदीकिया शहर की मण्डलि मा भि पढ़ै जौं, अर ज्वा चिट्ठी लौदीकिया शहर बट्टी औ वीं तुम मा भि पढ़ै जौ।

¹⁷फिर अरखिप्पुस मा बुल्यां कि, “ज्वा सेवा प्रभु मा त्वे तैं द्ये गै, वीं सेवा तैं सचेत हवे के पूरी कैरी।”

¹⁸मि पौलुस अपड़ा हथ ल प्रणाम लिखणु छौं। याद रखयां मि कैद मा छों अर मि कु प्रार्थना करयां की पिता परमेश्वर की कृपा तुम पर हूंणी रौ। आमीन।