Read Garhwali 2 थिस्सलुनीकियों 1 Bible Online

2 थिस्सलुनीकियों 1 - Garhwali bible

2 थिस्सलुनीकियों 1

¹या चिट्ठी मि पौलुस, सिलवानुस अर तीमुथियुस की तरपां बट्टी च। जु थिस्सलुनीकियों शहर की विश्वासी मण्डलि का लुखुं कु हम लिखणां छा, जु पिता परमेश्वर अर प्रभु यीशु मसीह बट्टी जुड़यांं छिनी।

²हम प्रार्थना करदा कि, पिता परमेश्वर अर प्रभु यीशु मसीह कि तरपां बट्टी तुम तैं कृपा अर शान्ति मिलदी रौ।

³हे विश्वासी भयों, तुमारा बारा मा हम तैं हमेशा पिता परमेश्वर कु धन्यवाद कन चयणु च, अर इन कन हम कु ठिक भि च इलै की तुम प्रभु यीशु मसीह मा लगातार जादा से जादा विश्वास करदां अर तुम सभियूं कु प्रेम आपस मा भौत ही बढ़दी जांद।

⁴इलै हम पिता परमेश्वर कि मण्डलियों मा विश्वासियों का बारा मा घमण्ड करदां, कि जथग दुःख अर क्लेश तुम सिणा छा, फिर भि तुम यु तैं बड़ा धीरज का दगड़ी लगातार सहन करदां अर यीशु मसीह पर विश्वास पर विश्वास करदां।

⁵यु पिता परमेश्वर कु सच्चो न्याय को प्रमाण च; कि तुम पिता परमेश्वर का राज्य का लैख बणा, ज्यांकु तुम दुःख भि उठौंणा छा।

⁶किलैकि पिता परमेश्वर हमेशा धार्मिकता ल न्याय करद जु तुम तैं दुःख क्लेश दींदिनि पिता परमेश्वर ऊं तैं भि वांका बदला मा दुःख अर क्लेश दयालो।

⁷अर तुम तैं क्लेश की पिड़ा मा रौंण नि दयालो; यु तब होलो जबकि प्रभु यीशु अपड़ा सामर्थी स्वर्गदूतों का दगड़ा मा धधकीं आग मा घिरयूं स्वर्ग मा बट्टी प्रगट होलो।[1]

⁸अर जु पिता परमेश्वर तैं नि पछयंणदींनि, अर जु हमारा प्रभु यीशु का शुभ सन्देश तैं स्वीकार नि करदींनि ऊं तैं दंड दयालो।[2]

⁹उ हमेशा कु प्रभु बट्टी अलग हवे जाला अर ऊंकी महान महिमा की शक्ति मा भागिदार नि होलो अर पिता परमेश्वर ऊं तैं अनन्त विनाश का द्वारा दण्ड दयालो।[3]

¹⁰या बात तब होलि, जब प्रभु यीशु अपड़ा पवित्र लुखुं मा जु वे पर विश्वास करदींनि महिमा पांणु कु वापिस आलो जु प्रभु बट्टी जुड़यां छिनी; किलैकि तुम ल प्रभु पर विश्वास कैरी छो जैका बारा मा हम ल तुम तैं गव्है द्ये छै।[4]

¹¹इलै हम तुम कु सदनी प्रार्थना भि करदां, कि हमारो पिता परमेश्वर तुम तैं वे जीवन का लैक बणै द्यो जै तैं जींणु कु पिता परमेश्वर ल तुम तैं बुलै भि च। उ अपड़ी सामर्थ का द्वारा तुम्हरो मार्गदर्शन करो कि तुम्हरी सभि भली मनसा पूरी हों अर जु कुछ भि तुम विश्वास बट्टी करदां उ पूरो हो,

¹²हम यु प्रार्थना करदयां कि लोग तुम्हरा कारण प्रभु यीशु की महिमा कैरा अर तुम भि महिमा पां किलैकि तुम भि प्रभु बट्टी जुड़यांं छा अर यु सब पिता परमेश्वर अर प्रभु यीशु मसीह का दया बट्टी होलो।[5]