Read Garhwali 2 थिस्सलुनीकियों 2 Bible Online

2 थिस्सलुनीकियों 2 - Garhwali bible

2 थिस्सलुनीकियों 2

¹हे विश्वासी भयों, अब हम अपड़ा प्रभु यीशु मसीह का फिर वापिस आंणा का अर वे बगत का बारा मा कुछ लिखणा छा, जब हम वे दगड़ी मिलुला।

²तुम अचानक अपड़ा विवेक तैं कै भविष्यवाणी, कै उपदेश अर कै इन चिट्टी ल नि हरचयां जै तैं हमारा द्वारा लिख्युं समझी जान्दु हो अर ज्यांमा बतै गै हो कि प्रभु को दिन ए गै, तुम अपड़ा मन मा नि घबरैयां।

³किलैकि प्रभु यीशु का वापिस औंण से पैली लोग पिता परमेश्वर कु विरोध करला अर उ दुष्ट अधर्मी आदिम जै तैं पिता परमेश्वर नरक मा नाश करलो, उ जरुर प्रकट करलो।

⁴उ परमेश्वर को अर ऊं सभि मूर्तियों को अर सभि चीजों को विरोध करलो ज्यांकी लोग आराधना करदींनि अर उ अपड़ा आप तैं यूं सभियूं बट्टी महान ठैरालो कि उ पिता परमेश्वर का यरूशलेम शहर का मन्दिर मा बैठ के अपड़ा आप तैं पिता परमेश्वर प्रगट करदो।[6]

⁵नि भूला कि मि हमेशा तुम तैं य बात बतौंदु छो, जब मि तुम दगड़ी छो।

⁶उ दुष्ट आदिम अभि तक प्रकट नि हवे, किलैकि कुछ इन च जु वे तैं रुकणु च, इलै जब उ बगत आलो जु पिता परमेश्वर कु ठहरयूं च, तब उ दुष्ट आदिम प्रकट होलो।

⁷वे दुष्ट शैतान की अधर्म का भेद की सामर्थ अभि भि ईं दुनिया मा गुप्त ढंग से काम कनी च, जु कुई वे तैं रोकि सकद; अर उ लगातार वे तैं रोकि के रखलो जब तक की वे तैं रस्ता बट्टी नि हटै द्यो।

⁸तब उ दुष्ट आदिम प्रकट हवे जालो, पर बाद मा, जब प्रभु यीशु आलो, त प्रभु अपड़ा मुक की फूंक से वे तैं मारि दयालो अर अपड़ा आंणा का तेज से वे तैं भस्म कैरी दयालो।[7]

⁹शैतान अफी वे दुष्ट आदिम तैं अपड़ी सामर्थ दयालो उ हर किस्मा का झूठा चमत्कार, चिन्ह अर बनि-बनि किस्मा का काम करलो ज्यां बट्टी लोग यु सुचण लगला कि यु पिता परमेश्वर कनु च।

¹⁰उ हर किस्मै की बुरै करलो अर ऊं लुखुं तैं धोखा दयालो जु पिता परमेश्वर का द्वारा नष्ट किये जाला; किलैकि उ ही सचै पर विश्वास कन से इंकार करदींनि जु ऊं तैं बचै सकद।

¹¹इलै पिता परमेश्वर ऊंका बीच मा बड़ों भ्रम डललो कि उ दुष्ट की बातों पर विश्वास कैरा, जु ऊं तैं सचै बट्टी दूर लीजांद।

¹²पिता परमेश्वर ऊं सभि लुखुं तैं भंगारी ठैरालो, जु सच्चा संदेश पर विश्वास नि करदींनि, अर दुष्ट चीजों बट्टी प्रेम करदींनि।

¹³हे विश्वासी भयों, अर हम तैं लगातार पिता परमेश्वर कु धन्यवाद कन चयणु च किलैकि प्रभु तुम बट्टी प्रेम करद। किलैकि पिता परमेश्वर ल दुनिया की सृष्टि से पैली ही तुम तैं चुणि कि तुम तैं बचै साको; उ पवित्र आत्मा का कामों का द्वारा जु तुम तैं पवित्र बणांद अर तुमारा द्वारा प्रभु यीशु मसीह का बारा मा सच्चा संदेश पर विश्वास कन से तुम तैं बचांद की तुम उद्धार पां।[8]

¹⁴पिता परमेश्वर ल वे शुभ सन्देश कु इस्तेमाल कैरी, जै तैं हम ल तुम तैं उद्धार दींण कु तुम्हरा बीच मा प्रचार कैरी, कि तुम हमारा प्रभु यीशु मसीह की महिमा मा भागिदार बंणि सका।

¹⁵इलै, हे विश्वासी भयों, ठिक राव़ा; ऊं बातों पर विश्वास करदी रावा जु हम ल तुम तैं सिखै छै जब हम तुम दगड़ी छा अर जब हम ल तुम कु चिठ्ठी भेजि छै।

¹⁶हम अफी हमारा प्रभु यीशु मसीह बट्टी अर हमारा पिता परमेश्वर बट्टी प्रार्थना करदा जु हम बट्टी प्रेम करदींनि अर जैल अपड़ी दया बट्टी हम तैं अनन्त प्रोत्साहन अर मजबूत आस द्ये।

¹⁷मि प्रार्थना करदु कि उ तुम्हरा मनों तैं साहस ल भोरि द्यो अर जु ठिक च वे तैं हमेशा तुम कु मजबूत कैरो।