Read Garhwali 2 थिस्सलुनीकियों 3 Bible Online

2 थिस्सलुनीकियों 3 - Garhwali bible

2 थिस्सलुनीकियों 3

¹आखिर मा, हे विश्वासी भयों, हम कु प्रार्थना कना रावा, कि हम जल्द ही हर जगह मा प्रभु यीशु मसीह का बारा मा संदेश तैं फैला सैका अर लोग यु पर उन ही विश्वास कैरा जन तुम ल कैरी छो।

²यु भि प्रार्थना कैरा कि पिता परमेश्वर हम तैं दुष्ट अर बुरा लुखुं बट्टी नुकसान पौछांण से बचौ, किलैकि भौत स लोग जु शुभ संदेश सुणदींनि उ यु पर विश्वास नि करदींनि।

³पर तुम पिता परमेश्वर पर पूरा ढंग से भरोसो कैरी सकदियां, उ तुम तैं आत्मिक रूप से मजबूत करलो अर तुम तैं दुष्ट शैतान बट्टी बचालो।

⁴अर हम तैं प्रभु मा तुम पर भरोसो च, कि जु-जु हम ल तुम तैं कनु कु बोलि, ऊं तैं तुम मंणदां छ्यां अर अगनैं भि मंणदि रैल्या।

⁵हम प्रार्थना करदा कि प्रभु यीशु मसीह तुम तैं यु समझण का लैक बणौ कि पिता परमेश्वर तुम तैं कथग प्रेम करद अर जब लोग तुम तैं सतौंदींनि त कन कै ठिक रावा उन ही जन प्रभु भि टिकयूं रै।

⁶हे विश्वासी भयों, हम तुम तैं वे अधिकार ल जु प्रभु यीशु मसीह ल हम तैं द्ये; कि तुम हरेक इन्दारया भैय से अलग रावा जु ठिक से जीवन बसर नि करदो हो, जु ऊं आदेशों कु पालन नि करद जु हम ल तुम तैं सिखै छो।

⁷किलैकि तुम अफी जंणदा छ्यां कि कनके हमारी सी तरौं जीवन बसर कन चयणु च जन हम बसर करदा छा; जब हम तुम्हरा बीच मा रौंदा छा, त हम अलकसी नि छा, पर काम करदा छा।

⁸अर कैकी रुटि मुफ्त मा नि खै; पर कष्ट उठै के मेहनत ल रात-दिन कामकाज करदां छा, कि हम तैं अपड़ी जरूरतों कु तुम मा बट्टी कै पर भि निर्भर हूंण नि पोड़ो।

⁹इन नि च कि तुम बट्टी मदद लींण हमारो अधिकार नि च, कि तुम हम जन जीवन बसर कैरी सक्यां।

¹⁰किलैकि जब हम तुमारा इख छा तभि यु आज्ञा तुम तैं दींदां छा कि जु कुई काम नि कन चौ त खांणु भि नि खौ।

¹¹हम सुणदा छा, कि कथग लोग तुम्हरा बीच मा अलकस ल ज्यूदींनि; अर कुछ काम नि करदींनि, उ हमेशा दुसरा लुखुं का काम मा दखलंदाज करदींनि।

¹²इन्दारया लुखुं तैं हम अधिकार ल जु हम तैं प्रभु यीशु मसीह बट्टी मिली आज्ञा दींणा अर समझौंणा छा, कि उ चुपचाप रै के अपड़ा कामकाज कैरी कै अर अपड़ी कमै कि रुटि खयां कैरा।

¹³हे विश्वासी भयों, तुम भलै का काम कन मा कभी भि निराश नि व।

¹⁴जु कुई हमारी ईं चिट्ठी का संदेश तैं नि मांणो, त वे तैं पहचनणै की कोशिश कैरा; सचेत रावा अर वेको दगड़ो नि कैरा, ज्यां ल उ शर्मिंदा हो।

¹⁵तौ भि वे दगड़ी इन बरतौ नि कैरा जन कि उ तुम्हरो दुश्मन हो, पर भैय समझी के समझावा बुझावा।

¹⁶मि प्रार्थना करदु कि प्रभु, जु शान्ति कु स्रोत च उ अफी तुम तैं सदनी हरेक ढंग से शान्ति द्यो; प्रभु तुम सभियूं का दगड़ा मा हमेशा रौ।

¹⁷मि पौलुस अपड़ा हथ से प्रणाम लिखणु छौं। मि अपड़ी सभि चिठ्ठियूं का आखिर मा इन ही लिखदु, कि सभियूं तैं पता चलि जै कि य चिठ्ठी मेरी ही लिखीं च।

¹⁸मि प्रार्थना करदु कि हमारा प्रभु यीशु मसीह की कृपा तुम सभियूं पर हमेशा बंणि रौ।