Read Garhwali 1 तीमुथियुस 6 Bible Online

1 तीमुथियुस 6 - Garhwali bible

1 तीमुथियुस 6

¹जथग विश्वासी जु गुलाम छिन, उ अपड़ा-अपड़ा स्वामि कु बड़ो आदर कैरा, कि दुसरा लोग पिता परमेश्वर कु अर हमारी शिक्षाओं की बुरै नि कैरा।

²अर जौं का स्वामि विश्वासी छिन, ऊं तैं उ विश्वासी भैय समझी के सही सम्मान द्या; बल्कि ऊंकी और भि सेवा कैरा, किलैकि यां बट्टी फैदा उठांण वला विश्वासी अर मसीह मा भैय का रूप मा प्रेम करदींनि। यूं बातों कु पालन कनु कु सभियूं तैं उत्साहित कनु रौ।

³जु कुई झूठी शिक्षा दींद अर वे उपदेश तैं नि मंणदु जु हमारा प्रभु यीशु मसीह का भक्ति का अनुसार च,

⁴त उ भौत घमण्डी छिनी अर कुछ नि जंणदो, बल्कि वे तैं बहस कन कि अर शब्दों पर तर्क कने कि बिमारी च ज्यां ल जलन झगड़ा अर बुरै की बात अर बुरा-बुरा शक पैदा हूंदींनि

⁵अर ऊं लुखुं कु दिमाग शक की दुष्टता ल भुर्युं च, अर उ लगातार दूसरों दगड़ी झगड़ा करदींनि, अर उन ही जणदींनि की सचै क्य च अर जु इन समझदींनि उ सुचदींनि कि पिता परमेश्वर की सेवा कन अमीर बनणौ को एक ढंग च।

⁶पर हम कु यु ही बड़िया च, कि हम उ कैरा जु पिता परमेश्वर तैं खुश करद अर जु उ हम तैं दींद हम वां मा ही संतुष्ट रां।

⁷किलैकि जब हम पैदा हवे छा त न हम दुनिया मा कुछ लै छा, अर जब हम मुरुला त न कुछ लिजै सकदां। [11]

⁸जु हम मा खांणु कु अर पैहनु कु हो, त यूं पर ही सन्तोष कन चयणु।

⁹पर जु धनवान हूंण चंदींनि, उ सभि किस्मा का पाप कनु कु भौत आसानी ल अजमैश बट्टी धोखा खै जयदींनि, अर एक जानवर जन फन्दा मा फंसी जयदींनि। उ, ऊं चीजों तैं कन चयदींनिं जु ऊंकु मूर्खता अर खतरनाक च अर या इच्छा ऊं तैं बर्बाद अर नाश कैरी दींदि।[12]

¹⁰किलैकि धन कु लोभ प्रेम सभि किस्मै की बुरै की जौड़ च, कुछ लुखुं ल जरा-जरा कैरी कै मसीह का बार मा शिक्षाओं पर विश्वास कन बंद कैरेले किलैकि उ पैसों तैं बहुत प्रेम करदींनि, अर उ भौत किस्म से दुखी छिनी, एक इन आदिम जन जैल अफ तैं एक हथियार ल नुकसान पौंछै हो।

¹¹पर हे पिता परमेश्वर का जन तीमुथियुस, तु यूं बातों से दूर रौ, अर धर्म, भक्ति, विश्वास, प्रेम, सब्र अर नम्रता जु ठिक च, भस वे तैं कनु कु हर किस्म की कोशिश कैर।

¹²युद्ध मा एक अच्छा सिपै का जन, जु लड़ै मा कभी हार नि मणद, त्वे तैं भि, पिता परमेश्वर पर भरोसा कन अर वेकी आज्ञाओं तैं पालन कन नि छुड़ण चयणु च; अर वे अनन्त जीवन तैं मज़बूती ल पकड़ी ले ज्यांकु तु बुलै गै, अर जै को तिल मजबूत हवे के बोलि छो, कि तु मसीह पर भरोसो रखदि।

¹³मि त्वे तैं इन आज्ञा दींणु छौं, कि पिता परमेश्वर को गवाह बंणि कै, जु हरेक को जीवनदाता च, अर दगड़ा मा मसीह यीशु कु भि गवाह बंणि कै, जैल मजबूत हवे के सच बोलि जब वे तैं पुन्तियुस, पिलातुस का समणी मुकदमा कु लये गै

¹⁴कि तू हमारा प्रभु यीशु मसीह का दुबारा वापिस आंण तक ईं आज्ञा तैं निष्कलंक अर निर्दोष रख, कि कुई त्वे पर भंगार नि लगौ कि तु गलत कनि छै।

¹⁵पिता परमेश्वर, जु एकमात्र राजा च, जु तारीफ का काबिल च, राजाओं कु राजा अर प्रभुओं कु प्रभु च, उ ही मसीह तैं ठिक बगत पर प्रगट करलो,[13]

¹⁶भस उ ही एकमात्र च जु हमेशा कु ज्यूँदो च, अर उ इथग चमकदार रोशनी मा रौंदो च कि कुई भि वेका नजदीक नि ए सकद, अर न वे तैं कै मनिख ल देखि अर न ही कभि देखि सकदु। वेकी महिमा अर सामर्थ जुग-जुग तक राली। आमीन।[14]

¹⁷ईं दुनिया का अमीरों तैं आज्ञा दे कि उ घमण्डी नि हूंनु, अर धन पर भरोसो नि रखा जु कुछ ही देर कु ही च, पर पिता परमेश्वर पर ही आस रखुनु, जु भौताईत ल हम तैं सभि चिज्युं तैं दींद, जु आज हम म च।[15]

¹⁸ऊं तैं, अर भला कामों तैं कनु कु अमीर बणा, अर मदद कनु कु भि बोल,

¹⁹इन कैरी के उ अपड़ा अच्छा कामों तैं अफ कु एक खजाना जन जुड़दींनि जु भविष्य मा स्वर्ग मा ऊंकु एक मजबूत नींव जन च, अर उ सच्चा जीवन तैं प्राप्त करदींनि जु हमेशा कु होलो।

²⁰हे तीमुथियुस, तू बतौ कि जु पिता परमेश्वर ल त्वे तैं द्ये तू उ ही करदी, अर ऊं लुखुं की नि सुनण जु हमेशा बेकार की बात करदींनि, ज्यां बट्टी पिता परमेश्वर तैं आदर नि मिल्द, अर बेकार मा विरोध करदींनि अर बुल्दींनि कि यु ज्ञान च, पर सच मा यु नि च।

²¹कथग ही लुखुं ल यु झूठा ज्ञान तैं अपणैयले, अर उ विश्वास बट्टी भटकि गैनी, मि प्रार्थना करदु कि पिता परमेश्वर की कृपा तुम सब पर बंणि रौ।