Read Garhwali 2 तीमुथियुस 2 Bible Online

2 तीमुथियुस 2 - Garhwali bible

2 तीमुथियुस 2

¹इलै हे मेरा नौंना तीमुथियुस तु वीं कृपा से ज्वा त्वे तैं मसीह यीशु दींद, वां मा मजबूत बंणि जा।

²अर जु बात तिल भौत सैरा गवाहों का संमणी मि बट्टी सुंणिनि ऊं तैं विश्वास का लैख लुखुं मा सौंपी दे जु दुसरों तैं भि सिखौंण मा काबिल हूंनु।

³मसीह यीशु का अच्छा सिपै कि तरौं मि दगड़ी दुःख को सामना कैर।

⁴जब कुई सिपै लड़ै पर जांदु त फिर उ अफ तैं दुनिया का कामों का जंजाल मा नि फसौंदु इलै कि उ अपड़ा भरति कन वला अधिकारी तैं खुश कैरी साको।

⁵इन ही कै अखाड़ा मा लड़ै कन वलो पैलवान जु नियम का अनुसार नि लैड़ो त उ ईनाम नि पांदु।

⁶जु जिमदार मेहनत करदो, फसल को हिस्सा वे तैं पैली मिलण चयणु।

⁷जु मि बुल्ण छौं वे पर ध्यान दे, अर प्रभु त्वे तैं यूं सभि बातों तैं समझण मा मदद कैरो।

⁸हमेशा यीशु मसीह तैं याद रख, जु राजा दाऊद को वंश च, अर पिता परमेश्वर ल वे तैं मुर्दों मा बट्टी ज्यूँदो कैरी; अर यूं उ ही शुभ सन्देश च, जु मि लुखुं का बीच मा प्रचार करदु।

⁹किलैकि मि शुभ सन्देश कु प्रचार करदो, इलै मि एक कैदी जन जीवन ज्यूंणु छो; पर पिता परमेश्वर का शुभ संदेश तैं कुई भि फैलांण से रोकि नि सकद।

¹⁰इलै मि ऊं लुखुं का फैदा कु, दुःख सौणु छो, जौं तैं पिता परमेश्वर ल चुणि, कि उ भि यीशु मसीह पर विश्वास कैरा अर उद्धार का द्वारा बचै जै सैका, अर वीं महिमा तैं पां जु हमेशा बंणि रौ।

¹¹या बात सच च, कि जु हम वे दगड़ी मोरि ग्यां त वे दगड़ी ज्यूंदा भि रौला।

¹²जु हम सब्र रखि के दुःख सौंदयां त वे दगड़ी राज्य भि करला; अर जु हम वेको इन्कार करला त उ भि हम बट्टी इन्कार करलो।

¹³जु हम मसीह का प्रति विश्वासयोग्य नि छा, तभि उ हमारा प्रति विश्वासयोग्य रालो, किलैकि उ अपड़ा सचै पर चलणा का बरतौ का खिलाफ काम नि कैरी सकदो।[1]

¹⁴यूं बातों तैं, विश्वासियों तैं बार-बार सिखौ, अर प्रभु का संमणी ऊं तैं चितै दे, कि शब्दो पर तर्क-वितर्क नि कना रौनु, जौं बट्टी कुछ फैदा नि हूंद, बल्कि यु ऊं लुखुं का विश्वास तैं नुकसान पहूंचो दींनि जु यु तैं सुणदींनि।

¹⁵तु जथग जादा मेहनत कैरी सकदी उथग कैर, कि पिता परमेश्वर त्वे तैं एक इन सेवक का रूप मा पूरा ढंग ल स्वीकार कैर, जु अपड़ा कामों का कारण शर्मिंदा नि हूंद, अर जु सच्चा संदेश तैं ठिक ढंग से सिखांद।

¹⁶पर बेकार की बकवास कन से बच्युं रौ, किलैकि इन लोग और भि जादा अधर्मी हवे जाला अर पिता परमेश्वर बट्टी दूर हवे जाला।

¹⁷अर इन कै यु बात सड़यां घाव का जन फैली जालो, अर अंत मा ऊं लुखुं का विश्वास तैं नाश कैरी दयाला जु ऊं तैं सुणदींनि। ऊंमा बट्टी दुई हुमिनयुस अर फिलेतुस ऊं मदि छिनी

¹⁸ऊंल सचै पर विश्वास कन बंद कैरेले, उ बुल्दींनि कि पिता परमेश्वर ल पैली बट्टी ही मुरयां विश्वासियों तैं अनन्त जीवन कु ज्यून्दो कैरेले, जै कारण, उ कुछ विश्वासियों तैं मसीह की शिक्षाओं पर विश्वास कन से रुकणा छिनी।

¹⁹पिता परमेश्वर का लोग एक बुनियाद का जन छिनी, जु हिलदी नि च, यांका बारा मा “प्रभु जंणदु च कि वेका लोग कु छिनी” अर यु भि की “जु कुई पिता परमेश्वर की आराधना करद वे तैं बुरै कन बंद कैर दींण चयणु च।”[2]

²⁰कै भि बड़ा घौर मा न भस सोना-चाँदी का ही बल्कि काठ अर माटा का भांडा भि हूंदींनि कुई आदर अर कुई अनादर पांणु कु।[3]

²¹इन ही, जु विश्वासी अपड़ा आप तैं ऊं सभि बुरा कामों बट्टी अलग कैरी ल्यो, जैको जीवन शुद्ध होलो उ एक कीमती भांडा का जन च, जु खास मौकों कु इस्तेमाल किये जांद, अर इलै वेको मालिक वेको इस्तेमाल करद।

²²इलै, ऊं पापी इच्छाओं बट्टी बच जु जवान लुखुं तैं आकर्षित करदींनि, अर जु लोग शुद्ध मन से प्रभु को नौं लिंदिनि ऊं दगड़ी धार्मिकता विश्वास प्रेम अर शान्ति अर मेल मिलाप को पीछा कैर।

²³पर मूर्खता, अर अज्ञान का झगड़ो से बच्युं रौ; किलैकि तु जंणदी छै, कि यां बट्टी झगड़ा पैदा हूंदींनि।

²⁴प्रभु का सेवक तैं झगड़ा कन वलो नि हूंण चयणु च, वे तैं सभियूं का प्रति दयालु, अर पिता परमेश्वर का वचन तैं अच्छा ढंग ल सिखांण वलो हूंण चयणु च अर लुखुं दगड़ी धीरज रखण चयणु च।

²⁵उ विरोधियों तैं नम्रता से समझौ, क्य पता पिता परमेश्वर ऊं तैं पश्चताप कनु को मन द्यो, कि उ भि मसीह का बारा मा सचै तैं जनण को मौका दे।

²⁶कि उ अपड़ा होश मा ऐ जौं, अर शैतान की शक्ति बट्टी बची सको, जैल ऊं तैं धोखा द्ये के उ करवै जु उ चांदो च कि उ कैरा।