Read Garhwali 2 तीमुथियुस 4 Bible Online

2 तीमुथियुस 4 - Garhwali bible

2 तीमुथियुस 4

¹जब प्रभु यीशु राजा का समान राज्य मा आलो, त उ ज्यून्दो को अर मुर्दों को न्याय करलो, अर पिता परमेश्वर, यीशु मसीह तैं गवाह जांणि कै वेका राज्य कि सुद दिलै के मि त्वे तैं आज्ञा दींणु छौं,

²कि तू पिता परमेश्वर का वचन को प्रचार कु तैयार रौ, जब लोग त्वे बट्टी सुनण चदींनि अर जब लोग त्वे बट्टी नि भि सुनण च तब भि, जब तु देखि की लोग बुरै कना छिनी, अर पाप मा लगयां छिनी, पर त्वे तैं ऊं तैं बड़ा सब्र रखि के शिक्षा दे के झिड़क अर समझौण चयणु च।

³किलैकि इन बगत आलो, जब लोग खरा उपदेश तैं स्वीकार नि करला पर अपड़ी लालसाओं का अनुसार अफ कु भौत सी धर्म-गुरुओं तैं कट्ठा करला जु ऊं तैं ऊंकी पसंद कि बात सुंणौनु।

⁴अर सचै तैं सुनण नि चाला पर झूठी अर बनि-बणै मिसाल-कहानियों तैं सुनण चाला।

⁵पर तू सभि बातों मा अफ तैं नियंत्रित रख अर सचेत रौ चाहे दुःख भि उठौ पोडो, शुभ सन्देश का प्रचार कु कठोर मेहनत कनु रौ, अर पिता परमेश्वर का एक सेवक का रूप मा अपड़ी सेवा तैं पूरी कैर जै कु तु चुणै गै।

⁶मि त्वे तैं आज्ञा दींणु छो किलैकि पिता परमेश्वर कु मेरु जीवन अर सेवा बलि का रूप मा खत्म हूंण वली च, किलैकि मि जंणदु छो की अब मिल जल्द ही मोरि जांण।

⁷जन एक अच्छो योद्धा लड़ै मा हार नि मणद उन ही मि भि प्रभु कु बड़ी मेहनत कन नि छुड़द। मिल मसीह को दियूं काम पूरो कैरी, मि प्रभु मा आखिर तक विश्वासयोग्य रों।

⁸प्रभु मि तैं एक ताज दयालो जु धार्मिकता को ताज च, यु ईनाम मि तैं वे दिन मिललो जब उ सचै का दगड़ी न्याय कनु कु वापिस आलो, अर यु भस मि तैं ही न बल्कि ऊं सभियूं तैं भि यु दयालो जु वेकी वापिस आंणै की चाह करदींनि।

⁹तिमुथियुस, तू मि मा जल्दी आंणै कि पूरी कोशिश कैर।

¹⁰किलैकि देमास दुनिया कि मोह माया मा फंसिके मि तैं छोड़ी के थिस्सलुनीके शहर कु चलि गै। क्रेंसकेस भैय त गलातिया प्रदेश कु अर तीतुस भैय दलमतिया प्रदेश कु चलि गै।

¹¹भस लूका मि दगड़ी च, अर जब तु औ त अफ दगड़ी मरकुस तैं भि ले के ऐ, किलैकि सेवा का काम मा उ मेरू भौत मददगार च।

¹²तुखिकुस तैं मेरू इफिसुस नगर मा भिज्युं च।

¹³जब तू ऐलि, त मेरू चोला ले के ऐ, जु मेरू त्रोआस नगर मा करपुस का घौर मा छोड़्युं च, अर मेरी चिठ्ठियूं तैं भि खास कैरी कै चाम्रपत्र (जु चमड़ा का खलड़ो ल बंणि छिनी) तैं भि ले के ऐइ।

¹⁴तांबा का भांडा बंणौण वला सिकन्दर टम्टा ल मि तैं भौत ढंग से दुःख दींनि, प्रभु वे तैं वेका बुरा कामों का अनुसार बदला द्यो।[6]

¹⁵तू भि वे बट्टी अफ तैं बचै के रख, किलैकि वेल प्रभु यीशु की शिक्षा दींण का कारण हमारो भौत विरोध कैरी।

¹⁶रोम शहर का न्यायलय मा मेरी पैली पेशी कि बात-चित का बगत मा, कैल भि मेरू दगड़ी नि कैरी बल्कि सभियूं ल मि तैं छोड़ेलि छो, मि प्रार्थना करदु कि पिता परमेश्वर ऊं तैं मि तैं छोड़णु कु माफ कैरी द्यो।

¹⁷पर प्रभु ल मेरू दगड़ो दींनि, अर मि तैं सामर्थ दींनि; कि मेरा द्वारा यीशु मसीह का शुभ संदेश को पूरो प्रचार हो, अर सब अन्य-जाति का लोग सूंणि ल्योनु, अर मि तैं मौत बट्टी बचै जन कि शेर का गिच्चा बट्टी छुड़ाये हो।

¹⁸अर प्रभु मि तैं हरेक बुरा काम बट्टी बचालो, अर अपड़ा स्वर्ग का राज्य मा मि तैं सुरक्षित लिजालो, वेकी महिमा जुग-जुग तक हूंणी रौ। आमीन।

¹⁹प्रिस्किल्ला अर वीं का आदिम अक्विला तैं, अर उनेसिफुरुस का कुटुम्ब तैं मेरू प्रणाम।

²⁰इरास्तुस त कुरिन्थुस शहर मा रै गै, अर त्रुफिमुस तैं मि मीलेतुस शहर मा, छोड़ी के ऐ ग्यों, किलैकि उ बिमार छो।

²¹ह्यूंद से पैली-पैली आंणै पूरी-पूरी कोशिश कैरी; यूबूलुस, अर पूंदेस, लीनुस अर क्लौदिया, का सब विश्वासी भैय त्वे कु प्रणाम बुल्णा छिन।

²²मि प्रार्थना करदु की पिता परमेश्वर त्वे दगड़ी हो, अर वेकी कृपा भि त्वे पर हूंणी रौ।