Read Garhwali तीतुस 2 Bible Online

तीतुस 2 - Garhwali bible

तीतुस 2

¹पर तीतुस त्वे तैं, विश्वासियों तैं भस ऊई सिखांण चांणु च, जु यीशु मसीह का बारा मा सच्ची शिक्षाओं का अनुकूल हो।

²मण्डलि का दानों तैं अफ पर काबू रखण चयणु च, इन बरतौ कन चयणु च, कि लोग ऊंको सम्मान कैरा, अर समझदारी ल बरतौ कन चयणु च, ऊं तैं पिता परमेश्वर पर मजबूत विश्वास कन चयणु च, दुसरा लुखुं बट्टी सचै का दगड़ा प्रेम अर सहनशील हूंण चयणु च।

³इन ही कै दाना जननों तैं भि जीवन जींण चयणु च, जु पवित्र लुखुं का जन हो, उ कै पर भंगार लगौंण वली नि हूंनु अर दाखमधु पीण वला नि हूंनु; बल्कि अच्छी बात सिखौंण वली हूंनु।

⁴कि उ एक अच्छा उदाहरण दे सका, अर जवान जननों तैं सलाह दींण का लैक हो, कि अपड़ा आदिमों का अर बच्चों का प्रति प्रेम कन वला कन कै बनण चयणु च।

⁵अर संयमी, अर अपड़ा आदिम का प्रति ईमानदार हों, अर अपड़ा घौर की देखभाल कन वली, भलि अर अपड़ा-अपड़ा स्वामि का वश मा रौंण वली हूंनु कि परमेश्वर का वचन कि बुरै नि हो।

⁶इन ही जवान आदमियों तैं भि समझाया कैर कि उ धीरजवान हूंनु।

⁷सब बातों मा तु अफ तैं भला कामों को नमूना बंणौ; जब तू विश्वासियों का पिता परमेश्वर का बार मा सिखाैंदी छै, त त्वे तैं अच्छा उद्देश्यों का दगड़ी सिखांण चयणु च, अर इन जु आदर का योग्य हो,

⁸तेरी शिक्षा हमेशा सचै अर विरोध बट्टी मथि हूंण चयणी च कि उ जु तेरु अर यीशु मसीह कु तेरु कामों का विरोध करदींनि, शर्मिंदा हूंनु किलैकि उ हमारा बार मा कुछ भि बुरो नि बोलि सकला।

⁹विश्वासी जु दास छिनी, ऊं तैं सिखौ कि वे उ सब कैरा जु ऊंको मालिक ऊं तैं कनु कु बोलु, ऊं तैं बतौ कि उ हर बात मा अपड़ा मालिकों तैं खुश कनै की कोशिश कैरा अर ऊं दगड़ी वाद-विवाद नि करुनु।

¹⁰चोरी नि कैरा; पर पूरा ढंग ल अफ तैं साबित कैरा, कि उ विश्वास का योग्य छिनी, कि लोग ऊंका अच्छा बरतौ पर ध्यान द्या अर जु कुछ भि उ करदींनि उ लुखुं का द्वारा हमारा उद्धारकर्ता प्रभु परमेश्वर का बारा मा शुभ संदेश सुनौंण कु कारण बणौ।

¹¹पिता परमेश्वर ल हरेक का उद्धार कु कैरी कै दिख्यालै कि उ कथग दयालु च।

¹²अर ई दया बट्टी पिता परमेश्वर हम तैं सिखांद कि, हम तैं बुरो बरतौ कन बंद कन चयणु च, ज्यां बट्टी पिता परमेश्वर की इज्जत नि हूंदी, अर दुनिया की मोह-माया तैं छोड़ी द्या, अर वे ढंग से बरतौ कैरा की जु पिता परमेश्वर तैं खुश करद।

¹³हम इन बरतौ कैरा, जब हम आस का दगड़ी वे महान दिन का जुगाल करदां जब यीशु मसीह, जु हमारा महान पिता परमेश्वर अर उद्धारकर्ता च, अपड़ी सैरी महिमा का दगड़ी धरती पर वापिस आलो।

¹⁴यीशु मसीह हमारा फैदा कु मोरि गै, कि हम तैं सभि अधर्मों बट्टी छुड़ै द्यो अर हम तैं शुद्ध कैरी साको कि हम वेका खास लोग बंणि जा, जु भला-भला काम कनु कु हमेशा तैयार रौनु।[1]

¹⁵इलै, तीतुस मि चांणु छों कि तू क्रेते टापू का विश्वासियों तैं यूं बातों तैं सिखौ जु मिल त्वे तैं बतै, अपड़ा लुखुं तैं इन कनु कु प्रोत्साहित कैर; कुई भि तेरु अनादर नि कन पौ।