Read Garhwali तीतुस 3 Bible Online

तीतुस 3 - Garhwali bible

तीतुस 3

¹विश्वासी लुखुं तैं ईं बात कि सुद दिलौ, कि शासकों अर अधिकारियों कु आदर कैरा, अर ऊंका आदेशों कु पालन कैरा, अर दूसरों कु हरेक अच्छा काम कनु कु तैयार रौनु,

²कै तैं बदनाम नि कैरा; झगड़ा कन वलो नि हो, पर दूसरों का प्रति कृपा दिखौ, अर सब लुखुं का दगड़ा मा नम्र बरतौ कैरा।

³किलैकि हम भि पैली बगत मा न समझ अर पिता परमेश्वर की आज्ञा नि मणन वला, अर भरम मा पोड़्य्यां छा, अर बनि-बनि किस्मै कि अभिलाषाओं मा अर सुख विलास कि गुलामी मा छा, अर हम घृणित लोग छा; हर कुई हम बट्टी घीणांदु छो अर हम एक दूसरों बट्टी बैर रखदा छा।

⁴पर फिर भि, हमारा उद्धारकर्ता परमेश्वर ल हमारा प्रति अपड़ी दया अर प्रेम दिखै,

⁵वेल हम तैं पापों का दण्ड बट्टी छुड़ै, अर यु ऊं धर्म का कामों का कारण न जु हम ल अफ करिनी, पर अपड़ी वीं दया का अनुसार, वेल अपड़ी पवित्र आत्मा दे के हम तैं बचै, जैल हमारा पापों तैं अपड़ा ल्वे का द्वारा धवे अर हम तैं एक नया जीवन अर बरतौ कनु कु एक नयो मौका दे।

⁶हमारा उद्धारकर्ता यीशु मसीह ल जु कैरी वेका द्वारा पिता परमेश्वर ल यु पवित्र आत्मा तैं हमारा भितर रौंणु कु दियेले अर बहुतायत ल भेजि, कि उ हम बट्टी सामर्थ का काम करवै साक।[2]

⁷ज्यां ल हम वे अनन्त जीवन तैं पांणै की आस रखि साका जु पिता परमेश्वर ल हम तैं अपड़ी संतान का रूप मा दींणै की सौं खै। अर यु बारा मा हम जांणि सकदां किलैकि पिता परमेश्वर ल अपड़ी दया का द्वारा हम तैं अफ दगड़ी सै ठैरे।

⁸या बात सच च जु मिल तुम तैं अभि लिखीं अर मि इन चांणु छौं, कि तु यूं बातों का बारा मा विश्वासियों तैं सिखांण बगत सख्तै से बोल, इलै कि जौं लुखुं ल परमेश्वर पर विश्वास कैरी उ भला-भला काम कनु को ध्यान रखुनु; किलैकि सभियूं कु या बात भलि अर मनिख्युं कि फैदा कि छिन।

⁹पर मूर्खतापूर्ण झगड़ों, वंशावलियों, मूसा की व्यवस्था का झगड़ों अर बखेड़ों से दूर रौ किलैकि उ फैदामन्द नि छिन बल्कि बेकार छिन।

¹⁰कै ढोंगि तैं एक द्वी बार समझै बुझै के वे बट्टी दूर रौ

¹¹तुम यु जांणि ल्या कि इन आदिम जु जांणिबूजी के बुरै का बट्टा पर चलणु च, त वेका खुद का बुरा काम साबित करदींनि कि उ भंगारी च।

¹²जब मि क्रेते द्वीप मा अरतिमास या तुखिकुस तैं त्वे मा भिजलु, त मि मा निकुपुलिस शहर औणे कि पूरी कोशिश कैरी; किलैकि मिल ठाणेलि कि मि ह्यूंद तक उखि रौं।

¹³जब जेनास नौं को वकील (व्यवस्था तैं सिखांण वलो) अर अपुल्लोस नौं को एक दुसरो आदिम अपड़ी यात्रा कु निकललो, त जु कुछ तु ऊंकी मदद कु कैरी सकदी छै तु कैरी, अर ध्यान दे कि ऊंमा अपड़ी यात्रा कु जु कुछ भि ऊं तैं जरूरत च, ऊंमा जरुर हो।

¹⁴भस इथग ही न, त्वे तैं विश्वासियों तैं सिखांदी रौंण चयणु च कि अच्छा कामों कु हमेशा मेहनत कना करा कि ऊं लुखुं की जरूरत पूरी कैर साक जै मा उ सब कुछ नि च, जै तैं यांकि जरूरत च। यु विश्वासियों की मदद करलो कि एक उद्देश्य का दगड़ी अपड़ो जीवन जी साका।

¹⁵मि दगड़ी इख का सभि विश्वासी जु विश्वास का कारण हम बट्टी प्रेम करदींनि त्वे तैं प्रणाम बुल्णा छिनी, मि प्रार्थना करदु की प्रभु तुम सभियूं पर कृपा कैरो।