Read Garhwali फिलेमोन 1 Bible Online

फिलेमोन 1 - Garhwali bible

फिलेमोन 1

¹मि, पौलुस ईं चिठ्ठी तैं लिखणु छो। मि यीशु मसीह की सेवा का कारण जेल मा बन्द छो। मि अर हमारा दगड़िया विश्वासी, तीमुथियुस तैं प्रणाम करदींनि। मि त्वे तैं, मतलब की हमारा प्रिय दगड़िया फिलेमोन कु लिखणु छों।

²अर मि अपड़ी विश्वासी बैंण अफफिया अर हमारा विश्वासी भैय अरखिप्पुस, जु एक योद्धा का समान पिता परमेश्वर की सेवा करदो अर वीं मण्डलि की ज्वा तुमारा घौर मा जमा हूंदी ऊंकु भि लिखणु छो।

³मि प्रार्थना करदु, कि हमारा पिता परमेश्वर अर प्रभु यीशु मसीह कि तरपां बट्टी तुम तैं कृपा अर शान्ति मिलदी रौ।

⁴मि जब भि त्वे कु प्रार्थना करदु, मि सदनी त्वे कु पिता परमेश्वर कु धन्यवाद करदु।

⁵मि प्रभु यीशु मा तेरु विश्वास अर पिता परमेश्वर का सभि लुखुं का प्रति तेरु प्रेम का बारा मा सुंणोदु।

⁶मि प्रार्थना करदु की विश्वासियों का दगड़ा मा तेरी जु प्रार्थना की संगति च, व बढ़दी जौं, तेरु उ सभि अच्छी चीजों तैं जनण का द्वारा जु पिता परमेश्वर ल हम तैं दीं च। यु सभि मसीह की बड़ै कु हो।

⁷किलैकि हे विश्वासी भैय, मि दूसरों का प्रति तेरु प्रेम तैं देखि के, मि तैं भौत खुशी अर शान्ति मिली, इलै की तेरु द्वारा पिता परमेश्वर का पवित्र लोग उत्साहित हवे गैनी।

⁸जबकि मि तैं मसीह मा तुम तैं आज्ञा दींण को अधिकार च कि तुमारो क्य कन ठिक च।

⁹मि बुजर्ग पौलुस, मसीह यीशु की सेवा कना का कारण बंधि छो, प्रेम बट्टी तुम कु यु बगत बिनती कनु छौं।

¹⁰मि उनेसिमुस का बारा मा त्वे बट्टी बिनती कनु छौं, जु मेरा नौंना जन च। जब मि कैद मा छौं तब उ मेरू नौंनो बंणि गै।

¹¹उ पैली त तेरु कुछ भि काम को नि छो, पर अब तेरु अर मेरा हम द्वीयूँ को बड़ा काम का लैक च।

¹²मि उनेसिमुस तैं त्वे मा वापिस भिजणु छौं, जै तैं मि पूरा मन बट्टी प्रेम करदु।

¹³मि वे तैं अफ दगड़ी रखण चांणु छों जबकि मि पिता परमेश्वर को शुभ सन्देश का प्रचार का बाना बंधि बंणि ग्यों। उ इख मेरी मदद कनु कु तेरी जगह ले सकदो, किलैकि मि जंणदु छों की तु मेरी मदद कन चाणी छै।

¹⁴पर मिल तेरी मनसा का बगैर कुछ भि कन नि चै, कि तेरी या भलै जबरदस्ती ल न बल्कि तेरी खुशी बट्टी हो।

¹⁵किलैकि हवे सकद कि उ त्वे बट्टी कुछ दिनों कु दूर भागि ग्यों कि उ पिता परमेश्वर पर विश्वास कैरी साको, ज्यां बट्टी ऊं तैं दगड़ी सदनी कु रै साको।

¹⁶पर तू वे तैं अपड़ो गुलाम ही नि समझी, बल्कि उ एक गुलाम बट्टी भि बढ़ि कै च, अब उ एक विश्वासी दगड़िया च जै तैं तु प्रेम कैरी सकद्यां।

¹⁷जब उनेसिमुस त्वे मा वापिस आलो तुम वे दगड़ी उन ही आनन्द कु बरतौ करयां जन कि तु मेरू स्वागत करिल्या।

¹⁸अर वेल तेरु कुछ नुकसान कैरी हो, या उ तेरी कैं भि चीज को कर्जदार हो, त वे सब तैं तु मेरा नौं पर लिखीं दे।

¹⁹मि पौलुस अपड़ा हथों ल लिखणु छौं, मि अफी वेको भुगतान कैरी दयुलु; जब की तु पैली बट्टी जणदी छै, कि जु मि तेरी मदद नि करदु, त तु खुद बट्टी नया जीवन तैं नि पै सकदी, इलै तु अपड़ा जीवन कु मेरू कर्जदार छै।

²⁰इलै हे मेरा दगड़िया, या खुशी प्रभु मसीह मा मि तैं तेरी तरपां बट्टी मिलो, जु एक विश्वासी दगड़िया का रूप मा इन कैरी के मि तैं उत्साहित कैरी।

²¹मि यु भरोसा रखि के लिखणु छौं, कि तु मेरू बुल्युं मणिलि अर मि इन भि जंणदु कि जु कुछ भि मि बुल्ण छौं तु वां बट्टी भि बढ़ि कै करली।

²²अर एक और बात या भि च कि मेरा ठैरुणु कु अपड़ा घौर मा एक कमरा तैयार कैर; किलैकि मि तैं उम्मीद च, कि पिता परमेश्वर तुम्हरी प्रार्थनाओं कु उत्तर दयालो अर मि तैं ऐ के तुम तैं दिखणु को मौका दयालो।

²³इपफ्रास, जु मि दगड़ा मा बंधि च, किलैकि उ यीशु मसीह की सेवा करद, उ तुम कु प्रणाम बुल्णु च।

²⁴अर मरकुस, अरिस्‍तर्खुस, देमास अर लूका मि दगड़ी प्रभु को काम करदींनि; यूं सभियूं कु मि प्रणाम बुल्णु छों।

²⁵मि प्रार्थना करदु कि, प्रभु यीशु मसीह कि कृपा तुम पर बंणि रौ। आमीन।