Read Garhwali इब्रानियों 4 Bible Online

इब्रानियों 4 - Garhwali bible

इब्रानियों 4

¹पिता परमेश्वर ल हम बट्टी वादा कैरी कि हम विश्राम की जगह मा जौला, इलै विश्राम की जगह मा प्रवेश कनु कु वादा अब भि च। त हम तैं भौत चौकस रौंण चयणु च; अर तुम म बट्टी कै तैं भि वे विश्राम की जगह पर जांण कु मौका नि छुड़ण चयणु च।

²किलैकि जन हम ल यीशु मसीह का बारा मा शुभ सन्देश प्रचार सूंणि, उन ही इस्राएल का लुखुं ल भि विश्राम की जगह मा प्रवेश कनु कु शुभ सन्देश प्रचार सूंणि; पर ऊंल यु पर विश्वास नि कैरी; इलै, उ संदेश ऊंकु बेकार छो।

³अर इलै हम लोग जु वीं बातों पर विश्वास करदां जु पिता परमेश्वर ल बोलि, विश्राम की जगह मा प्रवेश करुला; अर दूसरों का बारा मा, पिता परमेश्वर ल बोलि, “मिल अपड़ा गुस्सा मा सौं खै, कि उ मेरा विश्राम की जगह मा प्रवेश नि कैरी सकला।” फिर भि हम जंणदा छा कि य विश्राम की जगह जु अब उख च, उ दुनिया की रचना का बगत बट्टी ही छो।

⁴किलैकि सातवां दिन का बारा मा पिता परमेश्वर ल अपड़ा वचन मा इन बोलि, “पिता परमेश्वर ल सातवां दिन अपड़ा सभि कामों तैं खत्म कैरी के विश्राम कैरी।”

⁵अर फिर यु बुल्द, “उ मेरा विश्राम की जगह मा प्रवेश नि कैर सकला।”

⁶इस्राएल का उ लोग, जैका बीच पैली बार शुभ सन्देश प्रचार सुणये गै, उ प्रवेश कन मा असफल हवे गैनी, किलैकि ऊंल पिता परमेश्वर की आज्ञा नि मांणी; पर लुखुं का प्रवेश कनु कु पिता परमेश्वर का विश्राम की जगह मा जांणो कु मौका अब भि च।

⁷इलै पिता परमेश्वर ल अपड़ा विश्राम की जगह मा प्रवेश कनु कु एक और बगत तय कैरी, अर उ आज च; हमारा पुरणों का विरोध का लम्बा बगत का कई सालों बाद, वेल राजा दाऊद बट्टी यूं वचनों तैं बुलवै, जु पैली बट्टी बुलवै गै छा, “जु तुम आज पिता परमेश्वर की आवाज तैं सूंणा” “त अपड़ा मनों तैं ढीट नि बणा।”[20]

⁸हम यु भि जणदां कि पिता परमेश्वर ल जीं विश्राम की जगह कु वादा कैरी, उ कनान देश नि च, ज्यांमा जांणु कु यहोशू ल हमारा पुरणों की अगवै कैरी; किलैकि जु यु कनान देश हूंद त पिता परमेश्वर का बाद मा यु नि बुल्द कि यांको एक अलग ही बगत च।[21]

⁹इलै पिता परमेश्वर का लुखुं कु यु सब भि हवे सकद कि उ उन के ही विश्राम कैर साका जन पिता परमेश्वर ल दुनिया की रचना शुरू कना का बाद सातवां दिन विश्राम कैरी छो।

¹⁰किलैकि जु कुई आदिम विश्राम की जगह पर जांद, त उ अपड़ो काम पूरो कना का बाद विश्राम करलो, जन पिता परमेश्वर ल अपड़ो काम पूरो कना का बाद विश्राम कैरी छो।[22]

¹¹इलै हम वे विश्राम की जगह मा प्रवेश कने की कोशिश कैरा, इन नि हो, कि कै भि आदिम तैं उ लुखुं का उदाहरण की नकल नि कन चयणी च जैल पिता परमेश्वर की आज्ञा तैं मनणु से मना कैरी दींनि; तब हम वीं विश्राम की जगह मा प्रवेश करुला।[23]

¹²किलैकि पिता परमेश्वर कु वचन जीवन, सशक्त अर कै भि द्वी धार वली तलवार बट्टी भि जादा तेज च। व प्राण अर आत्मा तैं, मतलब की ग्रंथियों अर मज्जा का विच्छेद तक पहुचद अर हमारा मन का विचारों तैं परखद।[24]

¹³पिता परमेश्वर का नजरों मा ईं दुनिया का कुई भि आदिम छिपियां नि छिनी, हम तैं पिता परमेश्वर तैं वे हर काम कु हिसाब दींण पुड़लो, किलैकि पिता परमेश्वर का संमणी सभि बात खुलीं अर प्रगट छिनी।

¹⁴इलै, यीशु जु स्वर्ग मा गै, उ पिता परमेश्वर कु नौंनो च; उ हम सभियूं कु बड़ो महायाजक च; इलै आवा हम वे विश्वास तैं बगैर छुड़यां मजबूत बंणि के रां जै तैं हम सभियूं ल स्वीकार कैरी छो।

¹⁵किलैकि यु महायाजक, जु यीशु मसीह च, हमारी हर एक कमजोरी तैं समझदु; पर शैतान ल हमारी हर बात मा अजमैश कैरी; फिर भि प्रभु यीशु बगैर कै पाप कु च।

¹⁶इलै आवा हम साहस का दगड़ी पिता परमेश्वर का संमणी आं, जु दयालु च, कि हम पर कृपा हो अर हम वीं कृपा तैं पां, जु जरूरत का बगत मा हमारी मदद करदी।