Read Garhwali इब्रानियों 5 Bible Online

इब्रानियों 5 - Garhwali bible

इब्रानियों 5

¹पिता परमेश्वर हर एक महायाजक तैं इस्राएल का लुखुं मा बट्टी चुणदो, अर उ लुखुं की भलै कु पिता परमेश्वर का काम कनु कु चुणै जयदींनि; कि पापों की माफ कु भेंट अर बलि चढ़ांण कि पिता परमेश्वर लुखुं का पापों तैं माफ कैरी द्यो।

²किलैकि उ अफ भि कमजोरियों का अधीन च, इलै उ न समझो अर भटक्यां लुखुं दगड़ी नम्र बरतौ करदो।

³अर इलै वे तैं चयणु च, कि एक महायाजक का रूप मा वेकु यु जरूरी च कि उ लुखुं का पापों तैं दूर कनु कु बलिदान चढ़ौ, अर अपड़ा पापों तैं भि दूर कनु कु भि बलिदान चढ़ौ।[25]

⁴कुई भि आदिम अफी महायाजक हूंण का पद तैं अपड़ा मथि नि ले सकद; जन कै पिता परमेश्वर ल हारुन तैं पैली महायाजक का रूप मा बुलै अर चुणि, उन ही उ दुसरा महायाजक तैं बुलांद अर चुणदो।[26]

⁵उन ही के, मसीह ल भि अफ तैं महायाजक बनण कु नियुक्त कैरी के अपड़ो अफी सम्मान नि कैरी; बल्कि, पिता परमेश्वर ल मसीह बट्टी यु बोलि के नियुक्त कैरी जु वेल कै दुसरा याजक बट्टी कभी नि बोलि, जु कि परमेश्वर का वचन मा भजनकार लिखद, “तू मेरू नौंनो छै, आज मि यु बुल्दो कि मि तेरु बुबा छों।”[27]

⁶एक हैंकी जगह मा भि, पिता परमेश्वर ल वेकु दुबारा बोलि, “उन ही के जन मलिकिसिदक ल एक याजक का रूप मा काम कैरी तू हमेशा कु एक याजक रैलि।”

⁷यीशु ल ईं धरती पर का जीवनकाल मा जु वे तैं मौत बट्टी बचै सकद छो, ऊँचा आवाज मा पुकारी कै अर रौवे के, पिता परमेश्वर बट्टी प्रार्थना अर बिनती कैरी अर बड़ा आदर का दगड़ी अपड़ा आप तैं परमेश्वर तैं सौंपणा का कारण पिता परमेश्वर ल यीशु की सूंणि।

⁸जबकि, यीशु पिता परमेश्वर कु नौंनो छो, वेल ऊं दुखों का कारण जु वेल सैनी उ कन सीखी जु पिता परमेश्वर चांदो छो।

⁹पिता परमेश्वर ल वे तैं एक महायाजक का रूप मा स्वीकार कैरी जु कि हर ढंग से सिद्ध छो; उ, ऊं सभि लुखुं कु उद्धार का द्वारा अनन्त जीवन दींणु कु बुनियाद का रूप मा खड़ो छो जु वेका वचन कु पालन करदींनि।[28]

¹⁰अर वे तैं पिता परमेश्वर का तरपां बट्टी महायाजक कु पद मिली जन मलिकिसिदक याजक तैं मिली छो।[29]

¹¹यांका का बारा मा बतौंणु कु भौत कुछ च, पर यांका बारा मा विस्तार से बतौंण भौत मुश्किल च; किलैकि तुम पिता परमेश्वर का वचन का बारा मा सिखण मा आलसी हवे ग्यां।

¹²तुम इथग लम्बा बगत बट्टी विश्वासी छा कि अब तुम तैं दूसरों तैं सिखांण चयणु च; यांका बजाय, तुम तैं कैकी जरूरत च जु तुम तैं पिता परमेश्वर का वचन की बुनियादी बात दुबरा बट्टी सिखौ; तुम ऊं बच्चों का जन छा जौं तैं दूध की जरूरत च अर उ कठोर खांणु नि खै सकदींनि।

¹³किलैकि दूध पींण वलो तैं त पिता परमेश्वर का वचन की पहचाण नि हूंदी, किलैकि उ त छुटा बच्चा छिन।

¹⁴ठोस खांणु त ऊं लुखुं कु च जु जवान अर मजबूत छिनी, जु अनुभव का द्वारा सै अर गलत की पछयांण कैरी सकदींनि।