Read Garhwali 2 पतरस 1 Bible Online

2 पतरस 1 - Garhwali bible

2 पतरस 1

¹मि, शमौन पतरस, जु यीशु मसीह कु सेवक अर प्रेरित छो, मि तुम सभियूं कु लिखणु छो जु वे कीमती विश्वास तैं बंटदियां जु हम म च, उ विश्वास जु हमारा पिता परमेश्वर अर उद्धारकर्ता यीशु मसीह का द्वारा हम तैं दिये गै, जु हम तैं पिता परमेश्वर का दगड़ी सै ठैरांद, ऊं विश्वासी लुखुं का नौं जौनु हमारा पिता परमेश्वर अर उद्धारकर्ता यीशु मसीह की धार्मिकता ल हमारा जन कीमती विश्वास पै।

²मि प्रार्थना करदु की पिता परमेश्वर तुम तैं और जादा से जादा कृपा अर शान्ति दयालो जन-जन तुम पिता परमेश्वर अर हमारा प्रभु यीशु का ज्ञान मा बढ़दी जन्द्यां।

³पिता परमेश्वर ल अपड़ी सामर्थ का द्वारा हम तैं उ सब द्ये जु हम तैं एक ईश्वरीय जीवन जींणु कु चयणी च जु पिता परमेश्वर तैं खुश करदी। यु संभव च किलैकि हम पिता परमेश्वर तैं जंणदा छा अर उ, उन ही च जैल हम तैं अपड़ी महिमा अर नैतिक अच्छै का द्वारा अपड़ा लोग हूंणु कु बुलै।

⁴वे ही शक्तिशाली सामर्थ का द्वारा, पिता परमेश्वर ल हम तैं अपड़ा भौत सैरा अच्छा अर अद्भुत करार करिनी। कि यूं वरदानों को इस्तेमाल कैरी के हम दुनिया की ऊं बुरी इच्छाओं बट्टी बच सैका जु लुखुं तैं नाश करदी, अर पिता परमेश्वर का स्वभाव का भागि हवे साका।

⁵किलैकि तुम पिता परमेश्वर का स्वभाव मा सहभागी हूंणु कु बुलै ग्यां, तुम तैं भस मसीह पर विश्वास ही नि कन चयणु च, बल्कि तुम तैं हमेशा उ ही कनु को बड़ी कोशिश कन चयणी च जु दूसरों कु अच्छो च। अपड़ा विश्वास पर सद्गुण, अर सद्गुण पर समझ, तुम तैं न भस उ कन चयणु च जु अच्छो च, बल्कि तुम तैं इन लोग भि बनण चयणु च जु समझदारी ल बरतौ कन जंणदा छिनी।

⁶तुम तैं समझदारी ल कन कै बरतौ कन चयणु च, बल्कि तुम तैं अपड़ा आप तैं भि वश मा भि कन चयणु च, अर तुम तैं न भस अपड़ा आप तैं वश मा कन चयणु च, बल्कि तुम तैं मुसिबत मा भि धीरज भि रखण चयणु च, अर तुम तैं न भस धीरज रखण चयणु च, बल्कि तुम तैं इन ढंग से जीवन जींण चयणु च जु पिता परमेश्वर तैं खुश करद।

⁷तुम तैं न भस यु ढंग से जीवन जींण चयणु च जु पिता परमेश्वर तैं खुश करद, बल्कि तुम तैं एक-दुसरा विश्वासियों तैं अपड़ा खुद का परिवार का सदस्यों का जन प्रेम कन चयणु च, अर तुम तैं न भस एक दुसरा विश्वासियों का दगड़ी प्रेम कन चयणु च, बल्कि तुम तैं सभि लुखुं बट्टी प्रेम कन चयणु च।

⁸जु यु सब बात तुम मा छिनी अर बढ़दी जौं त यु तुम तैं हमारा प्रभु यीशु मसीह का ज्ञान मा उपयोगी अर फलदार हूंण मा मदद करली।

⁹पर जु कुई आदिम यु ढंग से अपड़ा जीवन तैं नि ज्यूँदो त उ एक इन आदिम का जन च जु ढंग से नि देख सकद या जु अंधो च। उ भूली गै की पिता परमेश्वर ल वे तैं ऊं पापों कु माफ कैरी जु वेल मसीह मा विश्वास कन से पैली कैरी छो।

¹⁰इलै हे विश्वासी भयों, अपड़ा आप तैं अर हैंका लुखुं तैं यु दिखांणु कु और भि अच्छो बरतौ कनु को बड़ी कोशिश कैरी कि पिता परमेश्वर ल तुम तैं हकीकत मा चुणयूं च अर तुम तैं अपड़ा लोग हूंणु कु बुलै। जु तुम इन करला त तुम निश्चित ढंग से पिता परमेश्वर बट्टी अलग नि होला।

¹¹अर यु कि पिता परमेश्वर तुम्हरा वे राज्य मा गर्मजोशी ल स्वागत करलो जख प्रभु यीशु मसीह च, जु हमारो स्वामी अर हमारो उद्धारकर्ता च, जु हमेशा कु राजा का रूप मा राज्य करलो।

¹²मि तुम तैं यूं बातों का बारा मा बार-बार याद दिलौंण चांणु छो, जबकि तुम पैली बट्टी ही ऊं तैं जंणदा छा अर मजबूती से आश्वस्त छा की उ सच छिनी।

¹³मि जंणदु छो कि जब मि अभि ज्यूँदो छो त यु ठिक च ऊंका बारा मा तुम बट्टी अक्सर बात कनु रौ, कि तुम ऊं तैं भूल नि जावा।

¹⁴किलैकि मि जंणदु छो कि मि जल्द ही मोरि जौलु, किलैकि हमारा प्रभु यीशु मसीह ल मि तैं स्पष्ट रूप मा यु बतै।

¹⁵इलै मि यूं बातों तैं अभि लिखणु छो कि मि भौत कड़ी मेहनत कनु छो, कि मेरी मौत का बाद तुम हर बगत ईं बात तैं हमेशा याद रखि साका।

¹⁶जब हम प्रेरितों ल तुम तैं हमारा प्रभु यीशु मसीह की सामर्थ अर वापिस आंणा का बारा मा प्रचार कैरी, त हम तुम तैं चालाकी ल कुछ बंणि बणै मिसाल नि बतांणा छा। बल्कि, हम ल मसीह का प्रताप तैं खुद भि देखि।

¹⁷हम वे पवित्र पोड पर वेका दगड़ा मा छा जब वे तैं पिता परमेश्वर का द्वारा सम्मान अर महिमा दिये गै छै। तुम ल वे बगत परम पिता परमेश्वर की तरपां बट्टी य आवाज सूंणि, “यु मेरू प्रिय नौंनो च, जै बट्टी मि खुश छो। हम ल अफ भि स्वर्ग बट्टी आंण वली ईं आवाज तैं सूंणि”

¹⁸

¹⁹हम भि जंणदा छा कि मसीह का बारा मा पिता परमेश्वर का तरपां बट्टी बुल्ण वलो ल जु वचन लिखीं छा, उ बिल्कुल सच छा, अर जु हम ल तुम तैं मसीह की वापसी का बारा मा सिखै छो उ वेकी पुष्टि करदींनि। तुम तैं ऊं वचनों तैं अच्छा ढंग से सुनण चयणु च, किलैकि जन कै अंधेरा मा दिवडो चमकद उन ही यु वचन लुखुं तैं सै रस्ता दिखांण मा मदद करद कि सचै क्य च। हमारा प्रभु यीशु मसीह का लौटि के आंण तक तुम तैं ऊं वचनों तैं अच्छा ढंग से सुनण चयणु च। मसीह को आंण नया दिन की सुबेर का जन रोशनी लांद, अर उ सुबेर का गैंणा का जन होलो। वे बगत मसीह कु प्रकाश तुम्हरा दिलों मा चमकलो अर तुम्हरा संमणी पिता परमेश्वर तैं स्पष्ट रूप मा प्रकट करलो।

²⁰पर यु भौत जरूरी च कि तुम ईं बात तैं समझा कि पिता परमेश्वर का तरपां बट्टी बुल्ण वलो का वचन जु तुम पढ़दा छा उ ऊंका अपड़ा विचार नि छिनी।

²¹किलैकि कुई भि पिता परमेश्वर का तरपां बट्टी वचन मा दिये गै कुई भि संदेश कभी भि आदिमों बट्टी पैदा नि हवे। पर पवित्र आत्मा ल लुखुं का मनों तैं उभारी जब ऊंल पिता परमेश्वर की तरपां बट्टी अयां संदेश तैं बोलि।