Read Garhwali 1 यूहन्ना 1 Bible Online

1 यूहन्ना 1 - Garhwali bible

1 यूहन्ना 1

¹हम एक इन मनिख का बारा मा लिखणा छा, जु जीवन को वचन च, उ पैली बट्टी छो, जै तैं हम ल सूंणि, अर जै तैं अपड़ा आँखों ल देखि, बल्कि जै तैं हम ल ध्यान से देखि अर हथों ल भि छवे।

²यु मनिख जु जीवन दींद दुनिया मा ऐ, अर हम ल वे तैं देखि, अर वेकी गव्है दींण छा, अर तुम तैं वे अनन्त जीवन का बारा मा प्रचार बतौंदयां जु पिता परमेश्वर का दगड़ा मा छो अर हम पर प्रगट हवे।

³हम ल यीशु मसीह का बारा मा जु कुछ भि देखि अर सूंणि, वेकी गव्है हम तुम तैं भि प्रचार करद्यां इलै कि हम दगड़ी तुम्हरी भि संगति हो, अर हमारी या दगड़ी बुबा का दगड़ा, अर वेका नौंना यीशु मसीह का दगड़ी च।

⁴अर यूं बातों तैं हम इलै लिखणा छा, कि हमारी खुशी पूरी हवे जौ।[1]

⁵जु समाचार प्रचार हम ल यीशु बट्टी सूंणि, अर तुम तैं सुनौणा छा, उ यु च; कि पिता परमेश्वर उज्यला का जन अच्छो अर सचो च अर वेमा कुछ भि बुरै नि च।

⁶जु हम बुलला, कि पिता परमेश्वर का दगड़ा हमारी दगड़ी च, पर बुरै करद्यां, त हम झूठ बुल्दियां अर सचै का अनुसार नि ज्यूंदा।

⁷ऊई कैरा जु ठिक च जन पिता परमेश्वर सिद्ध रूप बट्टी ठिक च, उन ही हम भि उज्यला मा जियां, त एक-दुसरा बट्टी दगड़ी रखदा अर वेका नौंना यीशु मसीह को ल्वे हम तैं सभि पापों बट्टी शुद्ध करदो।

⁸जु हम बुल्दियां, कि हम ल कुछ भि पाप नि कैरी, त हम अपड़ा आप तैं धोखा दींदयां, अर हम वे पर विश्वास नि करद्यां कि पिता परमेश्वर जु बुल्दो उ सच च।

⁹जु हम अपड़ा पापों तैं पिता परमेश्वर का संमणी मणिल्या, त पिता परमेश्वर हमारा पापों तैं माफ कन, अर हम तैं सभि अधर्म बट्टी शुद्ध कन मा विश्वासयोग्य अर धर्मी च।

¹⁰जु हम बुलद्यां कि हम ल पाप नि कैरी, त हम झूठा छा, अर हम ल वेका वचन तैं जरा भि नि मांणी।