Read Garhwali 1 यूहन्ना 4 Bible Online

1 यूहन्ना 4 - Garhwali bible

1 यूहन्ना 4

¹हे प्रियों, हरेक जु पिता परमेश्वर की पवित्र आत्मा बट्टी बुल्णो को दावा करदींनि; ऊंमा बट्टी हरेक पर विश्वास नि करयां, पर आत्माओं तैं परखा, कि उ आत्मा पिता परमेश्वर की तरपां बट्टी च कि न; किलैकि भौत सारा झूठा संदेश दींणवला छिनी जु बुल्दींनि की हम पिता परमेश्वर कि तरपां बट्टी बुल्दियां दुनिया मा ऐ गैनी।

²पिता परमेश्वर का आत्मा तैं तुम इन ही कै पछांण सकदियां, कि जु कुई आदिम मणी लींद, कि यीशु मसीह मनिख बंणि के ऐ, उ पिता परमेश्वर की तरपां बट्टी ऐ।

³अर जु कुई आदिम यीशु तैं नि मंणदु, उ पिता परमेश्वर की तरपां बट्टी नि च; यु ही मसीह का बैरी की आत्मा च; जैका बारा मा तुम ल सूंणि येले, कि उ औंण वलो च अर अब भि दुनिया मा च।

⁴हे प्रिय नौंनो, तुम पिता परमेश्वर का लोग छा अर तुम ल ऊं झूठा लुखुं पर जीत पयले; किलैकि जु पवित्र आत्मा तुम मा च, उ शैतान बट्टी भि बड़ो च, जु ईं दुनिया का लुखुं पर राज्य करदो।

⁵उ झूठा संदेश दींणवला दुनिया का छिनी, उ दुनिया की बातों तैं बुल्दींनि, अर दुनिया का लोग वेकी सुणदींनि।

⁶हम पिता परमेश्वर का तरपां बट्टी छा। जु पिता परमेश्वर तैं जंणदु च, उ हमारी सुणदो; जु पिता परमेश्वर तैं नि जंणदु उ हमारी नि सुणदो; इन्ही के हम सच की आत्मा तैं अर झूठ की आत्मा तैं पछांण सकदा छा।

⁷हे प्रियों, हम आपस मा प्रेम रखा; किलैकि प्रेम पिता परमेश्वर की तरपां बट्टी च अर जु कुई दूसरों बट्टी प्रेम करदो, उ पिता परमेश्वर की सन्तान च अर पिता परमेश्वर तैं जंणदु च।

⁸जु दूसरों बट्टी प्रेम नि करदो उ पिता परमेश्वर तैं नि जंणदु, किलैकि पिता परमेश्वर प्रेम च।

⁹जु प्रेम पिता परमेश्वर हम बट्टी करदु, उ यां बट्टी प्रकट हवे कि पिता परमेश्वर ल अपड़ा इकलौता नौंना यीशु मसीह तैं दुनिया मा भेजि कि हम वेका द्वारा अनन्त जीवन पां।

¹⁰सचै यां मा नि च, कि हम ल पिता परमेश्वर बट्टी प्रेम कैरी, पर यांमा च कि पिता परमेश्वर ल हम बट्टी प्रेम कैरी, अर हमारा पापों का प्रायश्चित बलिदान का कारण अपड़ा नौंना तैं भेजि।

¹¹हे प्रियों, जब पिता परमेश्वर ल हम बट्टी इन प्रेम कैरी, त हम तैं भि एक दुसरा बट्टी प्रेम रखण चयणु च।

¹²पिता परमेश्वर तैं कभि कैल नि देखि; जु हम आपस मा प्रेम कैरा, त पिता परमेश्वर हम मा बणयूँ रौंद; अर पिता परमेश्वर को प्रेम हम मा सिद्ध होलो।

¹³यां बट्टी ही हम जंणदा, कि पिता परमेश्वर हम मा, अर हम पिता परमेश्वर मा रौंदयां, किलैकि पिता परमेश्वर ल हम तैं अपड़ी पवित्र आत्मा मा बट्टी हम तैं दियूं च।

¹⁴अर हम ल यीशु मसीह तैं देखि अर वेकी गव्है दींणा छा कि पिता परमेश्वर ल अपड़ो नौंना यीशु मसीह तैं दुनिया का लुखुं कु उद्धारकर्ता हूंणु कु भेजि।

¹⁵जु कुई यु मणी लींद, कि यीशु पिता परमेश्वर को नौंनो च त पिता परमेश्वर वेमा रौंदो, अर उ पिता परमेश्वर मा रौंदो।

¹⁶अर हम अच्छा ढंग ल जांणि ग्यां अर हम विश्वास भि करदां कि पिता परमेश्वर हम बट्टी प्रेम करदो। पिता परमेश्वर प्रेम च अर जु कुई प्रेम मा रौंदो उ पिता परमेश्वर मा रौंदो अर पिता परमेश्वर वेमा रौंद।

¹⁷यां बट्टी ही प्रेम हम मा पूरा हवे कि, न्याय का दिन हम तैं हिम्मत मिलो की उ हम तैं दंड नि द्यो, किलैकि मसीह का जन हम दूसरों बट्टी प्रेम करदां अर ईं दुनिया मा मसीह ही जन रौंदयां।

¹⁸प्रेम मा डौर नि हूंद, नथरी सच्चा प्रेम डौर तैं दूर कैरी दींद, किलैकि जु डरदु च उ दंड बट्टी ही डरदु, जु डरदु च, उ प्रेम मा सिद्ध नि हवे।

¹⁹पिता परमेश्वर ल हम बट्टी प्रेम कैरी इलै हम पिता परमेश्वर अर एक दूसरों बट्टी प्रेम करद्यां।

²⁰जु कुई बोलु, मि पिता परमेश्वर बट्टी प्रेम करदु छो, पर अपड़ा विश्वासी भैय बट्टी बैर रखो; त उ झूठो च; किलैकि जब उ अपड़ा ही विश्वासी भैय बट्टी, जै तैं वेल दिखयूं च, प्रेम नि करदो, त उ पिता परमेश्वर बट्टी जै तैं वेल नि देखि प्रेम नि कैरी सकद।

²¹अर मसीह बट्टी हम तैं य आज्ञा मिली च, कि जु कुई अपड़ा पिता परमेश्वर बट्टी प्रेम करद, उ अपड़ा विश्वासी भैय बट्टी भि प्रेम कैरो।