Read Garhwali 1 यूहन्ना 5 Bible Online

1 यूहन्ना 5 - Garhwali bible

1 यूहन्ना 5

¹जै को यु विश्वास च, कि यीशु ही मसीह च, उ मनिख पिता परमेश्वर की सन्तान च अर जु कुई पिता परमेश्वर बट्टी प्रेम करदो, उ पिता परमेश्वर की सन्तान बट्टी भि प्रेम करद।

²जब हम पिता परमेश्वर बट्टी प्रेम करद्यां, अर वेकी आज्ञा तैं मणदा, त यां बट्टी ही हम जांणि लींदयां, कि हम पिता परमेश्वर की सन्तानोंं बट्टी प्रेम करद्यां।

³पिता परमेश्वर बट्टी प्रेम कनु कु चिन्ह यो च, कि हम वेकी आज्ञाओं को पालन कैरा; अर वेकी आज्ञा मनण कठिन नि छिनी।

⁴किलैकि जु कुई पिता परमेश्वर की सन्तान च, उ ईं दुनिया पर जीत हासिल करद, अर हमारा विश्वास बट्टी दुनिया पर जीत हासिल हूंदी।

⁵दुनिया पर जीत हासिल कन वलो को च? उ ही जु विश्वास करद, कि यीशु ही पिता परमेश्वर को नौंनो च।

⁶यु यीशु मसीह ही च, जै तैं पिता परमेश्वर का द्वारा ईं दुनिया मा भिजै गै, अर पांणी ल बपतिस्मा दिए गै छो, बल्कि जु ल्वे बुगै के सूली पर मोरि गै। पवित्र आत्मा बतांद कि यीशु मसीह पिता परमेश्वर बट्टी ऐ छो जु बतांद की उ सचो च।

⁷गव्है य च कि यीशु मसीह हमारा पापों कु बलिदान हवे, यु तीन चीज यांकि गव्है दींदिनि।

⁸पवित्र आत्मा, पांणी, अर ल्वे; अर तिन्युं की एक ही गव्है च।

⁹जब हम मनिख्युं की गव्है मांणी लींदियां, त पिता परमेश्वर की गव्है त यां बट्टी भि बढ़कर च; अर पिता परमेश्वर की गव्है या च, कि पिता परमेश्वर ल अपड़ा नौंना का बारा मा गव्है दये।

¹⁰जु पिता परमेश्वर का नौंना यीशु मसीह पर विश्वास करदो, उ अपड़ा मन मा ईं गव्है तैं रखदो; जैल पिता परमेश्वर पर विश्वास नि कैरी, वेल पिता परमेश्वर तैं झूठो ठैरे; किलैकि वेल वीं गव्है पर विश्वास नि कैरी, जु पिता परमेश्वर ल अपड़ा नौंना यीशु मसीह का बारा मा दये।

¹¹अर व गव्है या च, कि पिता परमेश्वर ल हम तैं अनन्त जीवन दियुं च अर उ पिता परमेश्वर का नौंना यीशु मसीह का द्वारा च।

¹²जु पिता परमेश्वर का नौंना यीशु मसीह तैं स्वीकार करदो, वेमा हमेशा कु जीवन च, अर जु पिता परमेश्वर का नौंना तैं स्वीकार नि करदो, वेमा हमेशा कु जीवन भि नि च।

¹³मि या चिट्टी तुम कु लिखणु छो, जु पिता परमेश्वर का नौंना यीशु मसीह का नौं पर विश्वास करदो, कि तुम तैं पक्को मालूम हवे जौ कि अनन्त जीवन तुमारो ही च।

¹⁴अर हम तैं पिता परमेश्वर का संमणी साहस हूंद, उ यु च; कि हम जु कुछ वेकी इच्छा अनुसार प्रार्थना मा मंगद्यां, त उ हमारी सुणदो च।

¹⁵अर हम जंणदा छा, कि जु कुछ हम पिता परमेश्वर बट्टी प्रार्थना मा मंगदा उ हमारी सुणदो, त यु भि हम जंणदा छा, कि जु कुछ हम ल पिता परमेश्वर बट्टी मांगि, उ हम तैं मिल्द च।

¹⁶जु कुई अपड़ा विश्वासी भैय तैं इन पाप करद देखो, जै को प्रतिफल मौत नि च, त उ पिता परमेश्वर बट्टी प्रार्थना कैरो, अर पिता परमेश्वर वे तैं जीवन दयालो। किलैकि पाप इन भि हूंदो जै को प्रतिफल मौत च यांका बारा मा मि पिता परमेश्वर बट्टी बिनती कनु कु नि बुल्दो।

¹⁷सब अधर्म त पाप च, पर इन पाप भि च, जै को प्रतिफल मौत नि च।

¹⁸हम जंणदा छा, कि जु कुई पिता परमेश्वर की सन्तान च, उ पाप मा नि बणयूँ रौंद; किलैकि जु कुई पिता परमेश्वर की सन्तान च, वे तैं उ बचै के रखद; अर उ दुष्ट शैतान वे तैं छू भि नि सकद।

¹⁹हम जंणदा छा, कि हम पिता परमेश्वर की सन्तान छा, अर सैरी दुनिया वे दुष्ट शैतान का वश मा च।

²⁰हम यु भि जंणदा छा, कि पिता परमेश्वर को नौंनो यीशु मसीह ईं दुनिया मा ऐ अर वेकी हम तैं समझ दीं च, कि हम वे सच्चा पिता परमेश्वर तैं पछयांणी साका, अर हम वे सच्चा पिता परमेश्वर मा छा, यानि वेका नौंना यीशु मसीह मा रौंदा। सचो पिता परमेश्वर अर अनन्त जीवन यु ही च।

²¹हे प्रिय नौंनो, अपड़ा आप तैं हर एक इन मूर्तियों बट्टी दूर रखा जु तुम्हरा दिल मा पिता परमेश्वर की जगह बणो।