Read Garhwali 3 यूहन्ना 1 Bible Online

3 यूहन्ना 1 - Garhwali bible

3 यूहन्ना 1

¹मि यूहन्ना मंडलि कु पुरणो अगुवा, या चिठ्ठी प्रिय दगड़िया गयुस त्वे कु लिखणु छो, मि त्वे बट्टी सचो प्रेम करदु छो।

²हे प्रिय दगड़िया, मेरी या प्रार्थना च; कि जन तेरु आत्मिक जीवन (आत्मा) उन्नति कनु च, उन ही तू सभि बातों मा उन्नति कैर, अर तेरी देह मजबूत रौ।

³किलैकि जब विश्वासी भयों ल ऐ के, मि तैं बतै की कनके तु विश्वासयोग्यता का दगड़ी सचै बट्टी जींणी छै, ज्यां पर तु सच मा चल्दी छै, त मि भौत ही खुश हुयुं।

⁴जब भि मि यु सुणदु छो कि उ लोग जु मेरा नौंना का जन छिनी, अर उ उन के जीवन ज्यूदींनि, जु सच मा पिता परमेश्वर ल हम तैं बतै, त यां बट्टी मि तैं और भि जादा खुशी मिलदी।

⁵हे प्रिय विश्वासी, तिल विश्वासयोग्यता का दगड़ी हमारा दगड़िया मसीहियों जु शुभ संदेश कु प्रचार कनु कु चौं तरपां यात्रा कना छिनी, ऊं की मदद कनु कु भौत काम करयूं च यख तक की तु ऊं लुखुं कि भि मदद करदी छै जौं तैं तु जंणदी भि नि छै।

⁶ऊंमा बट्टी कुछ लुखुं ल मण्डलि का विश्वासियों का दगड़ी तेरा प्रेम का बारा मा बतै जु तु अपड़ा विश्वासियों बट्टी करदी। अब मि त्वे कु बुल्णु छो, कि तु इन विश्वासी दगड़ियों कि मदद कैरी जु एक जगह बट्टी दुसरी जगह शुभ संदेश कु प्रचार कनु कु यात्रा करदा छिनी, किलैकि इन कन पिता परमेश्वर तैं अच्छो लगद।

⁷किलैकि उ वे नौं कु निकली छा, अर अविश्वासियों बट्टी कुछ भि मदद नि लींदा छा।

⁸इलै इन लुखुं को अपड़ा घौर मा आदर कन चयणु च, अर जु ऊंकी जरूरत च ऊं तैं द्या, ज्यां बट्टी हम भि हिस्सादार बणा।

⁹मिल पैली भि तुम्हरी मंडलि का विश्वासियों कु एक चिठ्ठी लिखीं छै, पर दियुत्रिफेस मेरा आज्ञाओं तैं मनणु बट्टी इंकार करदु च, किलैकि उ हमेशा बट्टी खुद ही मण्डलि का अगुवा बनण चांदु छो।

¹⁰इलै जु मि औलु, त मि मंडलि का लुखुं बट्टी खुलि के बुलुलु कि उ कि कनु च। मतलब हम पर बुरा काम कनु को झूठो भंगार लगान्दो; इथग ही न, शुभ संदेश प्रचार कन वला विश्वासी भयों को आदर भि नि करदो अर उ, ऊं तैं मण्डलियों मा बट्टी भि भैर निकली दींद।

¹¹हे प्रिय, ऊं लुखुं कि नकल नि कैरा जु बुरा काम करदींनि, बल्कि ऊं लुखुं को आज्ञा कु पालन कैरा जु कुई अच्छो कर्म करदो, त यु बतांद कि उ परमेश्वर कि सन्तान च। पर जब कुई बुरा काम करदु, त उ दर्शादों कि उ परमेश्वर तैं नि जंणदो।

¹²मंडलि मा हरेक बुल्दो कि दिमेत्रियुस एक अच्छो आदिम च किलैकि उ वेको बरतौ परमेश्वर का सच्चा संदेश का अनुसार च; अर हम यु बुल्दा कि उ एक अच्छो आदिम च, अर तू जणदि छै कि हमारी गव्है सच्ची च।

¹³मिल त्वे कु भौत कुछ लिखण त छो; जु मि तुम कु लिखण चांदो छो, पर मि ऊं तैं यु जन एक चिठ्ठी मा नि लिखण चांदु।

¹⁴मि तैं आस च कि मि तुम मा जल्दी ओलु अर तुम्हरा अमणी-संमणी बातचित करुलु।

¹⁵मि प्रार्थना करदु, की पिता परमेश्वर त्वे तैं शान्ति द्यो। उख का मसीही दगड़ियों कु व्यक्तिगत रूप मा प्रणाम बोलि दे।