Read Garhwali यहूदा 1 Bible Online

यहूदा 1 - Garhwali bible

यहूदा 1

¹मि यहूदा, जु यीशु मसीह कु एक सेवक अर याकूब कु छुटो भैय तुम तैं य चिठ्ठी लिखणु छो, जै तैं पिता परमेश्वर ल अपड़ा मथि विश्वास कनु कु बुलै। हमारो पिता परमेश्वर तुम बट्टी प्रेम करद अर तुम यीशु मसीह का द्वारा सुरक्षित छा।

²मि प्रार्थना करदु कि पिता परमेश्वर तुम तैं दया, शान्ति अर प्रेम बहुतायत ल दयालो।

³हे विश्वासी भयों, मि तुम तैं वे नया जीवन का बारा मा लिखणु कु हर संभव कोशिश कनु छो जु यीशु मसीह का द्वारा पिता परमेश्वर की तरपां बट्टी आंद अर जै मा हम सभि शमिल छा। पर अब मि ईं चिठ्ठी मा वे उद्धार का बारा मा तुम तैं प्रोत्साहित कनु को दबाव महसूस कनु छो कि तुम मसीही विश्वास तैं पकड़ी के रौंणु कु और भि जादा कोशिश कैरा। पिता परमेश्वर ल अपड़ा लुखुं कु यु विश्वास एक ही बार मा हमेशा कु दे द्ये, अर यु तैं बदले नि जै सकद।

⁴मि तुम तैं लिखणु छो किलैकि कुछ ईश्वररहित लोग जु गलत सिद्धांत सिखौंदींनि, उ हमारी जानकारी का बगैर हमारा बीच मा छिपी के ऐ गैनी। यु उ लोग छिनी जौका बारा मा पिता परमेश्वर ल कई पीढ़ियों पैली अपड़ा वचन मा बोलि छो, कि उ ऊं तैं दण्ड दयालो। उ पिता परमेश्वर की दया का बारा मा हमारा संदेश तैं बिगड़दींनि, कि यौन सम्बन्धी दुष्ट बरतौ कनु को बहाना बणै साका। उ हमारा एकमात्र स्वामी अर प्रभु यीशु मसीह तैं भि अस्वीकार करदींनि।

⁵जु तुम सभि बातों तैं एक बार मा जांणि ग्यां, त मि भि तुम तैं ईं बात की सुधि दिलांण चांणु छो, कि प्रभु ल इस्राएलियों तैं गुलामी बट्टी बचै कै अर ऊं तैं मिस्र देश बट्टी भैर ले के ऐ, पर बाद मा वेल सभियूं तैं मारि दींनि, जौनु रेगिस्तान मा वे पर भरोसा नि कैरी।[1]

⁶याद कैरा कि प्रभु ल ऊं दुष्टदूतों तैं कन दण्ड द्ये, जौनु अपड़ा अधिकार तैं पूरो नि कैरी, बल्कि ऊंल अपड़ी नियत पदवियों अर जगहों तैं छोड़ी येले। प्रभु ल यूं दुष्टदूतों तैं अनन्त विनाश कु अंधेरा जगह मा रख्युं च, इन जंजीरों बट्टी बंधयूं च जौं तैं कुई नि तोड़ी सकद कि महान दिनों मा ऊंको न्याय हवे साक।

⁷इलै इस्राएलियों अर स्वर्गदूतों का जन, ऊं लुखुं तैं भि याद रखा जु सदोम अर अमोरा शहर अर ऊंका अमणी-संमणी का कस्बों मा रांदा छा कि ऊं दगड़ी क्य हवे छो। उ लोग व्यभिचारी हवे गैनी अर हर किस्म का यौन भ्रष्टता बट्टी भुरे गैनी। इलै पिता परमेश्वर ल ऊं तैं आग बट्टी नाश कैरी दींनि। ऊं दगड़ी जु हवे उ झूठा शिक्षकों कु एक चेतावनी बंणि गै कि ऊं तैं भि अनन्त आग बट्टी दण्ड दिये जौं।[2]

⁸यूं उदाहरणों का बारा मा जनणा का बाद भि, यु ईश्वररहित आदिम इन कै ही पाप करदींनि, यु बोलि के कि ऊंल दर्शन दिखिनि। उ अपड़ा देह तैं भ्रष्ट करदींनि, सभि पिता परमेश्वर का अधिकारो तैं अस्वीकार करदींनि अर महिमामय स्वर्गीय प्राणियों को अपमान करदींनि।

⁹इख तक की मीकाईल ल भि जु पिता परमेश्वर का मुख्य स्वर्गदूतों मा बट्टी एक छो, वेल अपमान नि कैरी जन यु अधर्मी लोग करदींनि। किलैकि जब वेल शैतान का दगड़ी विवाद कैरी अर पिता परमेश्वर का तरपां बट्टी बुल्ण वला मूसा की देह तैं लींणु कु अपड़ा अधिकार की चुनौती द्ये, त मीकाईल ल भि यु नि सोचि कि वेमा बुरी बात बोलि के शैतान पर जांच का द्वारा भंगार लगांण कु अधिकार च। बल्कि वेल बोलि, “प्रभु त्वे दगड़ी कड़ाई से बात कैरो।”

¹⁰पर उ ईश्वररहित लोग कै भि इन बात कु खण्डन कनु कु अपमान वली भाषा कु इस्तेमाल करदींनि जु ऊं तैं समझ मा नि आंदी; अर जब उ जंगली जानवरों का जन बरतौ करदींनि अर जौं कामों तैं उ जणदींनि ऊं तैं उ बगैर सोचि-समझी के करदींनि, त उ पिता परमेश्वर का तरपां बट्टी दण्ड भुगतला।

¹¹ऊं पर हाय! कि उ कैन का जन दुष्टता बट्टी अपड़ा जीवन तैं चलौंदींनि, जैल अपड़ा भैय की हत्या कैरी किलैकि उ वे बट्टी जलदो छो, किलैकि पिता परमेश्वर ल वेका भैय का बलिदान तैं स्वीकार कैरी छो पर वेका बलिदान तैं न। उ बिलाम का जन च, जैल पिता परमेश्वर का लुखुं तैं पाप कनु कु उकसांणै की कोशिश कैरी, कि उ धन तैं पै सैका जै की पेशकश वे तैं किये गै छै। उ कुयड़ा जन नाश हवे जाला, जैल वे अधिकार का विरुद्ध मा विद्रोह कैरी जु पिता परमेश्वर ल मूसा तैं द्ये छो।[3]

¹²जब यु लोग प्रभु का प्रेम तैं याद कैरी के तुम दगड़ी प्रीति भोज मा खांणु खंदींनि, त यु ऊं खतरनाक चट्टानों का जन छिनी जु समुद्र का मूड़ी छिपियां छिनी जु तुम्हरा डुबणों को कारण बंणि सकदींनि। उ ऊं बेशर्म चरवाहों का जन छिनी जु भस अपड़ी ही चिन्ता करदींनि। उ ऊं बादलों का जन छिनी जु धरती पर बरखा करयां बगैर भस गरजणा रौदींनि। उ ह्यूंद का मौसम का डाला जन छिनी जु द्वी तरपां बट्टी मुरयां हूंदींनि, किलैकि उ कुई फल नि दींदिनि अर जौड़ा बट्टी उखड़ जंदींनि।[4]

¹³जन समुन्द्र की प्रचण्ड लहर गन्दो झाग बंणौंदींनि, उन ही यु लोग शर्मनाक काम फैलांदींनि। उ कुछ गैणों का जन छिनी जु एक बणयां रस्ता पर नि चलदींनि, उ सै रस्ता नि दिखदींनि। प्रभु ऊं तैं एक जगह रखणु च जु पूरा ढंग से अंधेरी च जख ऊं तैं हमेशा कु रौंण पुड़लो।[5]

¹⁴अर हनोक जु आदम बट्टी (जु पैलो छो) सातवीं पीढ़ी मा पैदा हवे, यूं लुखुं का बारा मा भविष्यवाणी कैरी छै, जब वेल बोलि, देखा प्रभु निश्चित रूप बट्टी अपड़ा पवित्र स्वर्गदूतों की भौत बड़ी संख्या का दगड़ी आलो[6]

¹⁵कि सभि लुखुं को न्याय कनु कु अर सभि अधर्मी लुखुं पर ऊंका द्वारा किया अनैतिक अर बुरा कामों का कारण भंगार लगांणु कु अर ऊं सभि चोट पहुंचांण वली बातों का कारण जु पापी लुखुं ल ऊंका विरुद्ध मा नि बोलि।

¹⁶यु लोग जु पिता परमेश्वर की आराधना नि करदींनि अर ऊं बातों का विरुद्ध बुरा शब्दों को इस्तेमाल करदींनि जु ऊं तैं समझ मा नि आंदी; अर जब उ जंगली जानवरों का जन बरतौ करदींनि अर जौं कामों तैं उ जंणदा छिनी ऊं तैं उ बगैर सोच-समझी के करदींनि, त उ पिता परमेश्वर की तरपां बट्टी दण्ड भुगतला।

¹⁷पर हे विश्वासी भयों, तुम ऊं बातों तैं याद रखा; जु हमारा प्रभु यीशु मसीह का प्रेरित ल भौत पैली बतै छै।

¹⁸उ तुम बट्टी बुल्दा छा, “आखरी दिनों मा हमारा प्रभु यीशु का लौटण से पैली, इन लोग होला जु प्रभु अर वेका अपड़ा लुखुं को मजाक उड़ाला। यु ही उ लोग छिनी जौका जीवन पर ऊंकी अपड़ी वासनाओं कु वश च।”

¹⁹यु ही उ लोग छिनी जु तुम तैं अलग-अलग दलों मा बंटण को कारण बंणदींनि; ऊंकी बुरी स्वभाविक इच्छा ऊं तैं वश मा करदी, अर ऊंमा पवित्र आत्मा नि च।

²⁰पर हे विश्वासी भयों, तुम तैं एक-दुसरा की मदद करदी रौंण चयणु च कि ऊं पवित्र सच्चाईयों मा जौं पर तुम विश्वास करदा, एक दुसरा तैं बणै साका। तुम तैं पवित्र आत्मा की सामर्थ बट्टी मार्गदर्शन पै के प्रार्थना कन चयणी च।

²¹तुम तैं यु जांणि के जीवन जींण चयणु च कि पिता परमेश्वर तुम बट्टी प्रेम करद; जबकि तुम वे दिन को जग्वाल करदा, जब हमारो प्रभु, यीशु मसीह वापिस लौटलो कि तुम तैं अनन्त जीवन मिललो किलैकि वेल हम पर दया कैरी।

²²ऊं लुखुं का प्रति दयालु बणा जु नि जणदींनि कि कै पर विश्वास कैरा।

²³कुछ हैंका लोग जूं तैं तुम जंणदा छा अर उ नरक का तरपां जांणा छिनी, ऊं तैं वीं हमेशा की आग मा बट्टी तुरंत खैंचि के बचै ल्या। अर इन हैंका लोग छिनी जौका प्रति तुम तैं दयालु हूंण चयणु च, पर दगड़ा मा दया दिखांण बगत भौत चौकस भि रा। तुम तैं ऊंका कपड़ोंं बट्टी भि घींण कन चयणी च, जन कि ऊंकी पापमय वासनाओं ल ऊं कपड़ोंं तैं भ्रष्ट कैरेले।

²⁴एकमात्र पिता परमेश्वर ही च जु तुम तैं लमडण बट्टी बचै सकद, अर तुम तैं निर्दोष अर आनन्दित बणै सकद, जब पिता परमेश्वर तुम तैं अपड़ी महिमा मा अपड़ा संमणी खड़ो करद। वेल हम तैं हमारा उद्धारकर्ता प्रभु यीशु मसीह का द्वारा बचै। महिमा, गौरव, सामर्थ अर अधिकार बगत की शुरुआत बट्टी पैली ही वेको ही छो, अब भि वेको ही च, अर हमेशा कु वेको ही रालो। आमीन।