Read Garhwali प्रकाशित वाक्य 13 Bible Online

प्रकाशित वाक्य 13 - Garhwali bible

प्रकाशित वाक्य 13

¹मिल एक जानवर तैं समुद्र मा बट्टी निकलद देखि, येका सात मुंड छा अर दस सींग छा अर वेका हर एक सींग पर राजमुकुट छा, अर वेका हर एक मुंड पर एक नौं लिख्युं छो जु पिता परमेश्वर की एक बुरै (निंदा) छै।[85]

²जु जानवर मिल देखि, उ चीता का जन छो; अर वेका खुटा रिख का जन छा, अर मुक सिंह का जन छो। अर वे अजगर ल यु जानवर तैं अपड़ी सामर्थ दे दींनि अर वे तैं धरती पर राज्य कनु को अधिकार दिए गै।

³मिल वेका मुंड मा बट्टी एक पर इन भारी घाव लग्युं देखि, जन मांणा उ मुरण वलो हो; फिर वेको उ जान लींण वलो घाव खूब हवे गै, अर सैरी धरती का लोग वे जानवर का पिछनै भौचक हवे के चलण लगि गैनी।

⁴अर उ वे जानवर की आराधना कन लगि गैनी, अर बुल्ण लगि गैनी, “कु जानवर का क जन च? अर कु वे दगड़ी लड़ै कैर सकद? अर लुखुं ल वे अजगर की भि पूजा कन शुरू कैरी दींनि, किलैकि वेल यु जानवर तैं अपड़ो अधिकार दियेले छो।”

⁵पिता परमेश्वर ल जानवर तैं अपड़ा अधिकार का बारा मा शेखी बघारने की अनुमति दींनि कि इन कै उ पिता परमेश्वर की बुरै कैरा। पिता परमेश्वर ल वे तैं बयालीस मैना तक यु अधिकार रखणै की अनुमति द्ये।

⁶जानवर ल पिता परमेश्वर की बुरै कन शुरू कैरी, उ वेका नौं का विरुद्ध, अर वीं जगह का विरुद्ध मतलब कि स्वर्ग का विरुद्ध बुल्ण लगी गै जख पिता परमेश्वर रौंद, अर ऊं सभि लुखुं का विरुद्ध जु स्वर्ग मा रौदींनि।

⁷वे जानवर तैं यु अधिकार दिये गै, कि पवित्र लुखुं बट्टी लड़ो, अर ऊं तैं हरौ, अर वे तैं सभि लुखुं, कुलों, भाषाओं, अर जातियों पर अधिकार दिये गै।[86]

⁸अर सभि जु धरती पर रौन्दींनि उ जानवर की आराधना करला, मतलब कि, उ सभि लोग जु का नौं दुनिया की शुरुआत बट्टी चिनखा की जीवन की किताब (चाम्रपत्र) मा नि लिखै गैनी। चिनखो उ ही च जु मोरि गै छो।

⁹हर कुई जु मेरा संदेश तैं समझण चांद, वे तैं वीं बात तैं ध्यान से सुनण चयणु च।

¹⁰जु लुखुं तैं कैद किये जांण तय च, उ जरुर कैद किये जाला, अर जौं कु तय च कि उ तलवार बट्टी मरै जा उ निश्चित रूप मा तलवार से मरै जाला। इलै की जरूरी च कि पिता परमेश्वर का लोग ऊं मुसिबतों तैं सह जौको उ अनुभव करदींनि अर विश्वास कन मा मजबूत रा।[87]

¹¹फिर मिल एक और जानवर तैं धरती मा बट्टी निकलद देखि, येका द्वी सींग छा जन की चिनखा का हूंदींनि। पर जब येल बोलि त यु अजगर का जन बुल्ण लगि गै।

¹²वेल वीं शक्ति कु इस्तेमाल जु वे तैं वे जानवर का द्वारा द्ये गै छै जैको जान लींण वलो घाव खूब हवे गै छो वेल दुनिया का सभि लुखुं बट्टी जबरदस्ती वे पैला जानवर की आराधना कनु कु बोलि।

¹³यु दुसरो जानवर मा झूठा चमत्कार छा जु स्वर्ग मा देखि सकदु छो, इख तक कि असमान बट्टी आग तैं मूड़ी लौंदु छो कि धरती पर पोडो, जबकि लोग दिखणा छा।[88]

¹⁴दुसरा जानवर तैं पिता परमेश्वर के द्वारा पैला जानवर की मौजूदगी मा झूठा चमत्कार दिखांणु की मंजूरी द्ये गै। यूं चमत्कारों का द्वारा उ धरती का सभि लुखुं तैं भटकांण मा सफल छो। वेल वे तैं पैला जानवर की एक मूर्ति बनांणै की आज्ञा द्ये, जु तलवार का द्वारा घायल हवे गै छो, पर फिर से ज्यूँदो हवे गै छो।

¹⁵दुसरा जानवर तैं (पिता परमेश्वर का द्वारा) पैला जानवर की मूर्ति बणै के वे तैं ज्यूँदो कने की मंजूरी द्ये गै छै, कि जानवर की मूर्ति बोल भि साको अर ऊं लुखुं तैं मरवे द्यो जु वे जानवर की मूर्ति की आराधना नि करदींनि।[89]

¹⁶अर दुसरा जानवर ल महत्वपूर्ण अर महत्वहीन, साधारण अर विशेष, स्वामी या जु गुलाम छिनी मतलब सभि लुखुं तैं मजबूर कैरी कि उ पैला जानवर का नौं अपड़ा दैंणा हथ पर या अपड़ा माथा पर लिखा,

¹⁷भस उ ही जौं पर य छाप छै कुछ खरीद या बेचि सकदा छा। उ छाप पैला जानवर का नौं की छै अर संख्या तैं बतांण वली छै।

¹⁸यु चिन्हों की व्याख्या कनु कु तुम तैं बुद्धिमानी ल सुचण चयणु च पर जै तैं ज्ञान च, उ यु पता लगै सकद कि यु जानवर की संख्या को क्य मतलब च। किलैकि यु एक आदिम को नौं च अर या संख्या छह सौ छियासठ (666) च।