Read Garhwali प्रकाशित वाक्य 15 Bible Online

प्रकाशित वाक्य 15 - Garhwali bible

प्रकाशित वाक्य 15

¹यांका बाद जब उ खत्म हवे गै, त मिल आसमान मा एक और अलग चिन्ह देखि जु कि भौत अद्भुत अर भौत डरांण वलो छो। उ सात स्वर्गदूत छा जु सात अलग-अलग ढंग की विपत्तियों तैं लियां छा। उ विपत्तियां आखरी छै किलैकि जब उ खत्म हवे जाली तब पिता परमेश्वर का गुस्सा भि पूरो हवे जालो।

²तब मिल कुछ देखि जु समुद्र का जन दिख्यौन्दु छो अर कांच का जन चमकणु छो अर वेमा आग भि मिल गै छै। मिल ऊं लुखुं तैं भि देखि जु जानवर बट्टी नि हारी छा। ऊंल जानवर की अर वेकी मूर्ति की आराधना नि कैरी छै, अर ऊं पर जानवर का नौं की संख्या कु चिन्ह नि लगै गै छो। उख उ वे समुद्र का छाला पर खड़ा छा अर ऊं सभियूं की एक वीणा पकड़ी छै जु पिता परमेश्वर की ऊं तैं दीं छै।

³अर उ पिता परमेश्वर का दास मूसा को गीत गांणा छा जु कि चिनखो का बारा मा च, “हे सर्वशक्तिमान प्रभु परमेश्वर, जु कुछ तिल कैरी उ कीमती अर अद्भुत च, तू सभि देशों को स्वामी छै, तू जु भि करदी उ सच अर धर्म कु च।”[96]

⁴“हे प्रभु, सभि जातियों का लुखुं का द्वारा तेरु आदर किये जौं, अर उ सब तेरु नौं को सम्मान कैरा, किलैकि भस तू ही पवित्र परमेश्वर छै, हर एक राज्य का सभि लोग तैं मा औंदींनि, अर उ तेरी आराधना करदींनि, किलैकि तेरु धर्म का काम सभियूं तैं अच्छा ढंग से मालूम छिनी।”[97]

⁵यांका बाद मिल देखि, कि जौं लुखुं ल गीत गांण बंद कैरेले छो, तब मिल देखि कि स्वर्गीय मन्दिर खुला छो। जु कि मिलाप वला तम्बू का जन छो,

⁶अर फिर सात स्वर्गदूत जौं तैं आखरी सात विपत्तियों तैं लेकर जांण छो, वे स्वर्गीय मन्दिर बट्टी भैर निकलनी। उ चमकदार सफेद कपड़ा पैरयां छा अर ऊंकी छती का चौ तरपां सोना की पट्टियां भि छै। फिर चार ज्यून्दा प्राणियों मा बट्टी एक ल ऊं सात स्वर्गदूतों तैं पिता परमेश्वर की तरपां बट्टी जु हमेशा ही ज्यूँदो च, भयानक दण्ड बट्टी भुरयां एक-एक सोना को कटोरा द्ये।

⁸स्वर्गीय मन्दिर पिता परमेश्वर की महिमा अर सामर्थ बट्टी आंण वला धुवां बट्टी भुरे गै; तब तक कुई भि मन्दिर मा नि जै साकी जब तक कि उ सात विपत्तियां खत्म नि हवे गैनी जौं तैं सात स्वर्गदूत लै छा।[98]