Read Garhwali प्रकाशित वाक्य 16 Bible Online

प्रकाशित वाक्य 16 - Garhwali bible

प्रकाशित वाक्य 16

¹वेका बाद मिल स्वर्गीय मन्दिर बट्टी एक तेज आवाज तैं सात स्वर्गदूतों बट्टी यु बुल्द सूंणि, “जावा दुनिया का लुखुं पर पिता परमेश्वर की तरपां बट्टी दण्ड तैं उण्डेली द्या जु ऊं दगड़ी सात कटोरों मा च।”

²इलै पैला स्वर्गदूत ल कटोरा की चीजों तैं धरती पर उण्डेल द्ये। ऊं लुखुं पर भयानक अर दर्दनाक फोड़ा दिखै दींनि, जौं पर जानवर ल अपड़ी छाप लगै छो, अर जौला ऊंकी मूर्ति की आराधना कैरी छै।[99]

³दुसरा स्वर्गदूत ल कटोरा की चीजों तैं समुद्र पर उण्डेल दींनि। पर समुद्र एक मुरयां आदिम का ल्वे का जन छो अर इलै, समुद्र मा रौंण वलो सभि कुछ मोरि गै।[100]

⁴तिसरा स्वर्गदूत ल कटोरा की चीजों तैं गाड अर पांणी का स्रोतों पर उण्डेल दींनि अर उ ल्वे बंणि गै।

⁵अर मिल वे स्वर्गदूत तैं जै तैं सैरा पांणी पर अधिकार च, पिता परमेश्वर बट्टी यु बुल्द सूंणि, “हे पवित्र, उ व ही पिता परमेश्वर च जु बगत की शुरुआत बट्टी लेकर अब तक अर कभी नि बदलद, यु दण्ड जु तू दुनिया पर भिजदी ठिक च।[101]

⁶किलैकि ऊंल तेरा लुखुं अर पिता परमेश्वर का तरपां बट्टी बुल्ण वलो तैं मार दींनि अर ऊंको ल्वे बुगै, इलै अब तू ऊं तैं ल्वे पींण कु दे। यु ऊंकु सै प्रतिफल च।”

⁷मिल दुबरा कै तैं वेदी बट्टी बुल्द सूंणि, “हाँ, हे सर्वशक्तिमान प्रभु परमेश्वर, यु सच च कि जन के तू लुखुं तैं दंड दींदी सै अर सच च।”[102]

⁸चौथा स्वर्गदूत ल कटोरा की चीजों तैं सूरज पर उण्डेल दींनि, अर सूरज तैं और जादा गर्म हूंणै की आज्ञा दींनि अर इलै लोग यांकि भयानक तपिश ल झुलसी गैनी।

⁹इलै मनिख पिता परमेश्वर तैं शाप दींनि, किलैकि उ ही छो जै मा वीं विपत्ति कु अधिकार छो। ऊंल अभि भि अपड़ा पापों बट्टी पश्चाताप नि कैरी छो, ऊंल अभि भि पिता परमेश्वर की महिमा कु अंगीकार स्वीकार नि कैरी छो अर बुरै करदींनि।

¹⁰पाँचु स्वर्गदूत ल कटोरा की चीजों तैं जानवर का सिंहासन पर उण्डेल दींनि अर यांका बाद, वेको पूरा राज्य अंधेरो हवे गै। लुखुं ल वे बड़ा दर्द का कारण जु ऊंल महसूस कैरी छो अपड़ी जीभ कटण बैठी गैनी।[103]

¹¹अर अपड़ी पिड़ाओं अर फोड़ों का कारण स्वर्ग का पिता परमेश्वर की निंदा कैरी; पर चाहे अब वेकी स्थिति इन छै, पर ऊंल निश्चित रूप से पश्चाताप नि कैरी अर न ऊं बुरा कामों तैं छोड़ी जु उ कना छा।

¹²छठो स्वर्गदूत ल कटोरा की चीज भौत बड़ी गाड फरात मा उण्डेल दींनि अर यांका बाद, गाड को पांणी सूखी गै अर यु कारण पूर्व दिशा का राजा अपड़ी सेना लेकर वीं गाड तैं पार कैरी साका।[104]

¹³यांका बाद मिल तीन दुष्टात्माओं तैं देखि जु दिख्योण मा मिंढ़खा का जन छा। एक अजगर का गिचा बट्टी भैर ऐ, एक पैला जानवर का गिचा बट्टी, अर एक दुसरा जानवर का गिचा बट्टी भैर ऐ, मतलब की जौनु झूठो संदेश द्ये छो।

¹⁴यूं दुष्टात्माओं मा झूठा चमत्कार कने की क्षमता छै अर ऊंल जै के ऊं लुखुं तैं कठ्ठा कैरी जु ईं दुनिया का सैरा देशों मा राज्य करदा छा कि उ सर्वशक्तिमान प्रभु परमेश्वर का महान दिन मा वेका विरुद्ध लड़ै लड़णु कु जां।

¹⁵दुष्टात्माओं का शासकों तैं अर ऊंकी सेनाओं तैं वीं जगह पर कठ्ठा कैरी जै तैं इब्रानी भाषा मा हर-मगिदोन बुल्दींनि। इलै प्रभु यीशु ल बोलि, “य बात सूंणा। मेरू आंण चोर का जन अचानक होलो। धन्य च उ आदिम जु मेरा आंण पर बिज्यूं हो, अर अपड़ा कपड़ोंं तैं तैयार रखो। तब उ नंगी नि होला अर कुछ भि ऊं तैं शर्मिंदा नि करलो चाहे उ भैर भौत स लुखुं का बीच मा भि किलै नि जौं।”

¹⁷अर सातु स्वर्गदूत ल कटोरा की चीज हवा मा उण्डेल दींनि, अर मिल सूंणि, उख उ छो जु स्वर्गीय मन्दिर का भितर बट्टी पिता परमेश्वर का सिंहासन बट्टी बुल्णु छो, “पूरो हवे गै।”

¹⁸अर वे बगत बिजलियां, अर गिड़गिड़ाहट अर बादल की गर्जन हूंण लगि गै छै अर एक इन खतरनाक भूकम्प ऐ, कि जब बट्टी मनिख दुनिया मा रौंणा हो, तब बट्टी इन विनाशकारी ढंग से भूकम्प कभी नि ऐ छो।[105]

¹⁹बाबेल को बड़ो शहर तीन हिस्सों मा बंटे गै, अर पूरी दुनिया का सैरा शहर नष्ट हवे गैनी। किलैकि पिता परमेश्वर ल उ पूरो कैरी जैको वेल बाबेल की जातियों का दण्ड का बारा मा वादा कैरी छो। यूं तैं पिता परमेश्वर की तरपां बट्टी कठोर दण्ड दिए जालो। यु इन होलो जन ऊंल बगैर पांणी मिल्युं दाखमधु तैं पियेले हो, जै तैं पिता परमेश्वर ल अफ ही वे प्याला मा उण्डेली हो जु वेका गुस्सा तैं बतांद।

²⁰वे बगत, समुद्र का सभि टापू अचानक डूबी के गायब हवे जाला।

²¹बड़ा-बड़ा ओलों आसमान मा बट्टी लुखुं पर गिरिनि, ज्यांमा हर एक ओला को वजन करीब 50 किलो छो। यांका बाद ऊंल, स्वर्ग का पिता परमेश्वर की बुरै कैरी।