Read Garhwali प्रकाशित वाक्य 8 Bible Online

प्रकाशित वाक्य 8 - Garhwali bible

प्रकाशित वाक्य 8

¹जब चिनखा ल सातु मुहर खोलि, त उ सभि जु स्वर्ग मा छा अधा घण्टा कु शान्त हवे गैनी।

²अर मिल ऊं सातों स्वर्गदूतों तैं जु पिता परमेश्वर का संमणी खड़ा रौदींनि, दिखिनि, अर ऊं तैं सात तुरहियां दिये गै छै।

³उख बट्टी, एक और स्वर्गदूत ऐ अर धूप की वेदी का संमणी खड़ो हवे गै। वे स्वर्गदूत ल धूप जलांणु कु सोना से बणया कटोरा तैं लै अर वे तैं सभि लुखुं की प्रार्थनाओं का दगड़ी जलांणु कु भौत सी धूप द्ये गै। वेल धूप अर प्रार्थनाओं तैं वे सोना की धूप की वेदी का मथि जलै, जु पिता परमेश्वर का सिंहासन का संमणी छै।[56]

⁴अर स्वर्गदूत का द्वारा जलै धूप बट्टी निकलण वलो धुंआ पिता परमेश्वर बट्टी जुड़यां लुखुं की प्रार्थनाओं का दगड़ी स्वर्गदूत का हाथ बट्टी उठि के मथि पिता परमेश्वर का संमणी उठै।[57]

⁵तब स्वर्गदूत ल यु तैं वेदी का मथि बट्टी जल्यां अंगारों बट्टी भोरि दींनि, अर धरती पर डाली दींनि, अर बिजलियां अर गिडगिडांण की आवाज अर भूकम्प हूंण लगि गै।[58]

⁶अर उ सातों स्वर्गदूत जौं मा सात तुरहियां छै, ऊं तुरहियां तैं फुंकणु कु तैयार हवे।

⁷पैला स्वर्गदूत ल तुरै फूंकी, तब तुरंत ल्वे से मिली भौत सी बर्फीली बरखा अर आग धरती पर पोड़ी, इलै एक तिहाई धरती फुके गै, अर धरती को एक तिहाई हिस्सा फुके गै, अर डालों कु एक तिहाई फुके गै अर हैरी घास भि फुके गै।[59]

⁸दुसरा स्वर्गदूत ल तुरै फूंकी, त इन कुछ हवे जु एक बड़ा जगदा डांडा का जन दिख्योंदु छो, उ समुन्द्र मा लमडी गै; इलै समुद्र भि एक तिहाई ल्वे हवे गै। [60]

⁹अर समुद्र मा रौंण वला एक तिहाई ज्यून्दा प्राणी मोरि गैनी अर यांका ल्वे ल समुद्र का एक तिहाई जहाजों तैं भि नष्ट कैरी दींनि।

¹⁰तिसरा स्वर्गदूत ल तुरै फूंकी, अर एक बड़ो गैणो जु मशाल का समान फुकयोंदो छो, स्वर्ग बट्टी टुटी, इलै गाड़ो कु एक तिहाई पर, अर पांणी का पंदयरा पर ऐ पोड़ी।[61]

¹¹वे गैणों को नौं “कड़ो” च, यांका बाद भि सभि पांणी जख पोड़ी, कड़ो हवे गै, अर भौत लोग मोरि गैनी किलैकि पांणी कड़ो हवे गै छो, अर भौत सा मनिख वे पांणी का कड़ो हवे जांणा का कारण मोरि गैनी। [62]

¹²चौथा स्वर्गदूत ल तुरै फूंकी, अर सूरज की एक तिहाई, अर जून की एक तिहाई अर गैणों की एक तिहाई पर कुछ टकरै अर नाश हवे गै कि ऊंको एक तिहाई भाग अंधेरो हवे गै, ज्यांका कारण दिन का एक तिहाई बगत तक सूरज ल अपड़ो प्रकाश नि द्ये, अर जून अर गैणा रात का एक तिहाई बगत तक नि चमकीनि।[63]

¹³जब मिल फिर देखि, त मिल एक गरुड़ तैं आसमान मा ऊंचो उड़दि देखि अर ऊँचा शब्द बट्टी यु बुल्द सूंणि, “जब आखिरी तीन स्वर्गदूत ऊं तुरैहियों तैं फूंकदींनि जु ऊं तैं दिये गै, तब दुनिया का सब लुखुं पर आंण वली विपत्तियां भौत भयानक छिनी। धरती का रौंण वलो पर हाय, हाय, हाय!”