Read Garifuna San Mateo 14 Bible Online

San Mateo 14 - Garifuna bible

San Mateo 14

¹Lídan dan ligía, ába lagáambun Heródes, le gumándan lídan fulásu le gíribei Galiléa, luágu Jesúsu,

²ába laríñagun joun ja lúmabaña. —Juan le abásteragüdajabei le, sará jádaangiñe jiláaña, ligía gabáfu lubeí lun ladáagun miláguru.

³Lé meja suséreelibei, daǘlumuti meja Heródes Juan, ába lagǘraguágüdüni láu güríngüri tueígiñe Heródias tó meja lúmari Felípe, le lamúlen.

⁴Aríñagaalí meja Juan lun Heródes luágu moun láni lagámaridunun lúmari lamúlen, madǘgünti Heródes gásu láu.

⁵Busénti yebéti Heródes láfaruni Juan jilágubei, ladǘga lanúfude jaweí gürígia, madǘgun lumúti ladǘga sun lan gürígia afíñetiña luágu proféta lan Juan.

⁶Dánti le efédujani luágu lagúnfulirun Heródes irúmu, ába tiábin tiraǘ Heródias, ába tabínajan jagíbugiñe amísurajoútiña, léti línsiñe tabínajan lun Heródes,

⁷ába laríñagun tun láu fiñún luágu líchugubei lan furúmieguarügü cátei le tamúriajan lúma tun.

⁸Ábati taríñagun túguchu tun lun tamúriajani lábulugu Juan le abáste jilágubei, ladǘga, lun jíchuguni tun lídan ában asíedu, ába tamúriajani lúma ítara.

⁹Ába lírudagun Heródes lueígiñe cátei le, quei aríñaga láali lan láu fiñún, agáamba jameí amísurajoútiña, ába laríñagun lun líchugúniwa tun.

¹⁰Ábati laríñagun lun ladǘrürǘniwa lábulugu Juan furísunrugu,

¹¹ába janǘgüni lídan ában asíedu, ába líchugúniwa tun irájü tugúya, ába tíchuguni tun túguchu.

¹²Ábati jayábin l-íñagun tun láu fiñún luágu lanigu Juan, ába janǘgüni lúgubu, ába jábununi, lárigiñe, ába joúdin awísarei Jesúsu. Líchugun Jesúsu eígini joun seíngü mílu wügǘriña

¹³Dan lagáambuni Jesúsu cátei le, ába lídin ñígiñe jáurügü láni disípulugu tídan ában ugúnein lídoun ában fulásu mageírawati. Ába jasúbudiruni gürígia, ába jáfuridun lídaangiñé buri aǘdü, ába joúdin lárigi, eíbu.

¹⁴Dan larárirun Jesúsu tídaangiñe ugúnein, ába laríjin luágu sarágu jaña lan gürígia jagía, ába jagúdemedagun lun, ába lareídaguagüdüniña ja sándibaña jádan.

¹⁵Queíti agúñedeinaali lubeí, ába jaríñagun láni Jesúsu disípulugu lun. —Dárüjalitia áni úatiña gürígia aganoútiña lídan fulásu le. Oúnaja báña gürígia ja, ñǘdün jamámuga lídoun buri lirájüñü fulásu yaráfa agáñija eígini lun jeígin.

¹⁶Ába laríñagun Jesúsu joun. —Mídinbaña, rújuma eígini joun.

¹⁷Ába jaríñagun lun. —Seíngü rügǘñoun fein wáma ya, jáma bián úduraü.

¹⁸Ába laríñagun Jesúsu joun. —Barǘjumoun nun ñájoun.

¹⁹Ába laríñagun joun gürígia lun jañúurun luágu jíduru. Ába lanǘgünun seíngü fein jáma bián úduraü jagía lújaburugu, ába laríjin siélun, ába leteíngiruni Búngiu tuágu. Ábati lagúbachagunun fein, ába líchugunun joun láni irun Jesúsu tídaangiñe ugúneidisípulugu, ába jafánreinjanun jádan gürígia.

²⁰Sun jagía joútiña quimúle, lárigiñe, ába jabuínchagüdün dúusu faníñe táu to ígiragutu.

²¹Seíngüñanu mílu wügǘriña eígitiña, mabájüdünga würíña jáma irájüñü. Leíbugun Jesúsu ligíbuagu dúna

²²Ába loúnajaniña Jesúsu láni disípulugu lubá tídan ugúnein tugúya lun jánjiñuragun loubáfurugun sun niján lan oúnajaña gürígia águyu.

²³Lásun loúnajaniña, ába laweínrun lábugua luágun wǘbü ayúmuragua lun Búngiu. Dan le lagúñedunbei, ñíñein Jesúsu lábugua,

²⁴sun núnguran tan ugúnein lamídan dúna. Ába láfarajan lugúdi barána tuágu ugúnein ladǘga tubárouñein lan garábali.

²⁵Ába liábin Jesúsu jawágun lubá larúgan, eíbugeina ligíbuagu dúna.

²⁶Dan jaríjini láni disípulugu eíbugeina ligíbuagu dúna, ába janúfudedagun, ába jagúaragun láu anúfudei. —¡Úfiaü!

²⁷Ába ladímurejan Jesúsu joun, ába laríñagun joun. —¡Ragǘjuma anígi, áu le, manúfudeda jumá!

²⁸Ába laríñagun Pédro lun. —Nabúreme, ánjein amǘrü lubeí, eíbugagüda bána gíñe ligíbuagu dúna chülǘ le ñí bubei.

²⁹Ába laríñagun Jesúsu lun. —Jigábuti. Ába larárirun Pédro tídaangiñe ugúnein, ába lagúmeserun eíbuga le ñíjin lubeí Jesúsu ligíbuagu dúna.

³⁰Dan le lasándiruni lére garábali ába lanúfudedagun, ába lagúmeserun abúlucha, ába lagúaragun. —¡Séfu bána Nabúreme!

³¹Ába lárügüdüni Jesúsu lújabu, ába laríñagun lun. —¡Loúguati gíñe bafíñen! ¿Ca uágu laloúguada bafíñen?

³²Dan jádinun tídoun ugúnein, ába lagálumadun garábali.

³³Játi buga tídaanbaña ugúnein, ába jájuduragun ligíbugiñe Jesúsu, ába jaríñagun. —Inárüni luágu Liraǘ ban Búngiu. Lareídaguagüdüniña Jesúsu sánditiña Genésaret

³⁴Ába jánjiñuraguni dúna, ába jachǘlürün Genésaret.

³⁵Dan le jíchugunbei lílana fulásu fe luágu Jesúsu lan, ába jabúruchaguagüdüni lídan sun fulásu ligía, ába janǘgüniña sun sánditiña le ñíjin lubeí.

³⁶Ába jayúmuragun lun lun lígirun lúnrügü jagúuruni táru lanáangun, sun ja agúurubarun, areídaguátiña.