Read Garifuna San Mateo 27 Bible Online

San Mateo 27 - Garifuna bible

San Mateo 27

¹Dan larúgadunbei, ába jadámuridagun sun jábutigu fádirigu jáma wügǘriña weírigutiña lídan jafíñen juríu aríja cába lan jadǘga lun lasíadirúniwa Jesúsu.

²Ába janǘgüni gürágu, ába jedéregeruni lun Póncio Piláto le gumádimati. Loúnwen Júdas

³Dan le laríjinbei Júdas, le alúgurubalin Jesúsu, luágu siádi jamáali lan Jesúsu lun loúnwen, ába laságürijan, ába láguyugüdüni darándi murúsun pláta ligía joun jábutigu fádirigu lúma joun wügǘriña weírigutiña,

⁴ába laríñagun joun. —Afígounjaadina láu nedéregerun ában wügǘri madúnrunti lun loúnwen. Ába jaríñagun lun. —¿Cámegi le warúma? ¡Bugúya lun baríjini líra!

⁵Ába lachágaruni Júdas seínsu ñi témpulurugu, ába lídin átigiragua lúngua.

⁶Ába jabúduni jábutigu fádirigu seínsu ligía, ába jaríñagun. —Siñáti wíchuguni seínsu le tídoun gáfu to lágei liseínsuna Búngiu ladǘga lebégi oúweni.

⁷Ába júaradun lun lagáñijoún lufúlasun ában wügǘri le adáagubei barámbi láu seínsu ligía lun jábunajoún teréncha ñi.

⁸Ligía Lufúlasun Jítaü lubeí líribei fulásu ligía chülǘ lúmoun dan le.

⁹Ítara líña lagúnfulirun lé meja laríñagubei proféta Jeremías. “Barǘ jamuti darándi murúsun pláta ligía, ebégi le jíchugubei Israelítagu luágu wügǘri ligía,

¹⁰ába jagáñijani lufúlasun ában wügǘri le adáagubei barámbi láu, quei laríñaguni Nabúreme nun.” Jesúsu ligíbugiñe Piláto

¹¹Barǘwati Jesúsu ligíbugiñoun gumádimati, le gíribei Piláto, le álügüdübalin. —¿Amǘrüsan Jarúeitebei Juríu? Ába laríñagun Jesúsu lun. —Ánja, áu quei baríñaguni.

¹²Dán buriti jíchugun jábutigu fádirigu jáma wügǘriña weírigutiña lidúnrun, moúnabuntija Jesúsu ni cáta.

¹³Ábati laríñagun Piláto lun. —¿Magáambun bumútisan le jaríñagubei buágu?

¹⁴Moúnabunti Jesúsu ni cáta, ábati laweíridun lanígi gumádimati. Lasiádirún Jesúsu lun loúnwen

¹⁵Gagáburi lumúti mejáti gumádimati lígiragüdǘn ában adaürǘti joun gürígia lídan fédu, furúmieguarügü adaürǘti le jamúriajan lúma.

¹⁶Ñíñeinti ában adaürǘti, díseti leíbaajan líri, gíriti Barabási,

¹⁷dánti le adámuriñujaña lan sun gürígia, ába lálügüdüniña Piláto. —¿Ca jabúseerubei nígiragüdün jun, Barabási, ódi Jesúsu le únbei laríñawagua Crístu?

¹⁸Líridubalin gíñe Jesúsu ladǘga subúdi láali lan luágu ladǘga lan jagímugan lun jedéregerei.

¹⁹Sun ñun lan Piláto luágu lála le lánina agúseruni, ába toúnajan lúmari aríñaga lun. “Madǘgabá ni cáta láu gürígia úaraguati le, ladǘga gewéneditina buga ában uwénedi wuríbati áriebu buga ladǘga gürígia le.”

²⁰Ába jádaruni jábutigu fádirigu jáma wügǘriña weírigutiña jádoun gürígia lun jamúriajan lun láfuridun Barabási, lun lafarún Jesúsu.

²¹Ábaya ladímurejan gumádimati joun sun gürígia jagía, ába laríñagun joun. —¿Ca jádaangiñe biángubei jabúseerubei lun nígiragüdüni jun? Ába jaríñagun. —Barabási.

²²Ába laríñagun Piláto joun. —¿Cábati nadǘga láu Jesúsu le únbei laríñawagúa Crístu? Ába joúnabun súngubei. —¡Dáguabeí luágu gurúwa!

²³Ába laríñagun Piláto joun. —¿Cáti wuríbati ladǘgübei? Ábatima jagúaragun. —¡Dáguabeí luágu gurúwa!

²⁴Dan le laríjinbalin Piláto luágu siñá lan ladǘgün ni cáta lueídügüya chagáguaü, ába lamúriajan dúna, ába lachíbuni lújabu jagíbugiñe gürígia, aríñageina. —Máma áu lúnbei naríjin láu loúnwen wügǘri madúnrunti le, jugúya lun jaríjini ñi.

²⁵Ába jaríñagun sun gürígia. —¡Wagía jáma warájüñü, wanǘgüba furúmieguarügü dúru wawoúguoun luágu loúnwen!

²⁶Ábati lígiragüdüni Piláto Barabási, ába loúnajan abeíchei Jesúsu, ába ledéregeruni lun ládarawagún luágu gurúwa.

²⁷Lárigiñe, ába janǘgüni lisúdaaranigu gumádimati Jesúsu tídoun lúban Piláto, ába joúndaraguagüdüniña sun súdaara geyégua láu.

²⁸Ába jarágachunun lanáangun, ába jíchugun ában anáanguni funátu luágu,

²⁹ába jíchugun ában rídi láuti jíyu lábulugu, lúma ában mabúru lújaburugu le loúnwenren. Ábati jájuduragun ligíbugiñe, ába jéjerajan láu, ába jaríñagun lun. —¡Gabágarilá Jarúeite Juríu!

³⁰Ába gíñe jásueraguni, janǘgeija mabúru ligía, jíchaaguei lábulugu.

³¹Lárigiñe jéjerajan láu ítara, ába jagídarunun anáanguni funátu lueí, ába jadáürünun lanáangun luágu. Ába janǘgüni lun ládarawagún luágu gurúwa. Ládarawagún Jesúsu luágu gurúwa

³²Dan le áfurideina jáña lan, ába jadúnragun lúma ában wügǘri Cirénena, gíriti Simón, ába jafósuruni lun lanǘgüni lugúruwan Jesúsu.

³³Ítara líña jachǘlürün lídoun ában fulásu gíriti Gólgota, líla líra, Lufúlasun Lábu Ichǘgü.

³⁴Ñi jíchiga diweín láu árani tídan lun Jesúsu lun látunun, joúcharügü lumútu, mátun lumútu.

³⁵Dan le dágua jamáali luágu gurúwa, ába jájurerun súdaara ubúnuruni lun jafánreinjanun lanáangun Jesúsu jádaangua. Ítara líña lagúnfulirun lé meja labǘrüjabei proféta. “Ájureratiña ubúnuruni lun jaríjin cába lan jádaangiñe erédera táu nanáangun.”

³⁶Ába jañúurun ñi lun joúnigiruni.

³⁷Ába jíchugun ában abǘrüjoúni loúgiñe lichǘgü le ñí lubei laríñaga ca lan lidúnrunbei. Abǘrüjoúni ligía ítara líña. “Jesúsu le, le jarúeitebei juríu.”

³⁸Dáwaguatiña gíñe bián jíwerutiña luágu gurúwa lúma, ában lueígiñe loúnwenren, ában lueígiñe lubaǘna.

³⁹Já buriti ásügürübaña ñígiñe, ába janábuni, ába jánjingichuni jachǘgü,

⁴⁰aríñageina. —Bugúya le gayáraabei bágurunun témpulu ábaya baráramagüdünun lídan ǘrüwa wéyu, sálbaguabá búngua. Ánjein Liraǘ bubei Búngiu, raríba lueígiñe gurúwa.

⁴¹Ítara líña gíñe jéjerajan jábutigu fádirigu jáma arúfudajatiña lilúrudun Moisés, fariséogu, jáma wügǘriña weírigutiña, láu, ábaja jaríñagun jámagua.

⁴²—Sálbati ámu, ánjein lúngua, siñáti lasálbaragun. Ánjein ligía lubeí Jarúeitebei Israelítagu, raríla lueígiñe gurúwa, afíñe wamámuga luágu.

⁴³Rúlaali lafíñen luágu Búngiu, sálbaleíti Búngiu guetó ánjein inárüni lubeí luágu jínsiñe lan lun, quei aríñagaali lan woun luágu Liraǘ lan Búngiu.

⁴⁴Anába jamúti gíñe jíwerutiña ja dáwaguñubaña luágu jagúruwan úara lúma. Loúnwen Jesúsu

⁴⁵Ábati labúrigadun sun fulásu lúmagiñe amídirugu darí ladaǘnrün ǘrüwa rábounwéyu.

⁴⁶Queí buri óra méme ligía, ába lagúaragun Jesúsu jére. —Elí, Elí, ¿láma sabáctani? —líla líra. Nubúngiute, Nubúngiute, ¿cásan uágu bígirana?

⁴⁷Ñíñanu agáambuti jádaangiñe ja ñíbaña, ába jaríñagun. —Lagúajaña wügǘri le lun proféta Elías.

⁴⁸Ába lídin ában jádaangiñe eíbaagueina anǘga ában mudúsi, lárigiñe ladǘdüragüdüni táu diweín garǘjütu ába líchuguni luágu ában wéwe, ába línchunun lun lun lachúrunun. Ába lachúrunun.

⁴⁹Ába jaríñagun ja jíbiri. —Ígirabeí, waríja ánjein ñǘbin Elías asálbarei.

⁵⁰Ábaya ladǘgün Jesúsu ában agúaraguni jéreti, ábati loúnwen.

⁵¹Lídan óra ligía, ába tajeíridagun tubélun témpulu lídan bián murúsun, íñugiñe lun ǘnabun. Ába ladágarun ában járabaganáli, ába láwarajan dǘbü.

⁵²Ába lánjunrenchúnga umúajaü, águyuguatiña sarágu jádaangiñe afíñetiña luágu Búngiu já meja jiláguaañábaña.

⁵³Ába jáfuridunga lídaangiñe jamúaja lárigiñe lásaarun Jesúsu lídaangiñe oúweni. Ába jebélurun lídoun ubúrugu Jerusalén le biníwabei, le ñí lubei jaríjaña sarágu gürígia.

⁵⁴Léti jábuti súdaara jáma súdaara ja oúnigirubalin Jesúsu, dan jasándirunbalin járabaganáli lúma dan jaríjinbaalin líbiri buri cátei le asúseredubei, ába janúfudedagun sarágu, ába jaríñagun. —Inárüni, Liraǘ Búngiu wügǘri le.

⁵⁵Ñíñanu sarágu würÍña aríagua dísegiñe, ja afálarubalin Jesúsu lúmagiñe Galiléagiñe íderagua jameí.

⁵⁶Ñíñoun María Magdaléna jádan, María to lúguchu Jacóbo lúma José, túma jáguchu lirájüñü Zebedéo. Labunúniwa Jesúsu

⁵⁷Dan le agúñedeina líña lubeí, ába liábin ában wügǘri rísiti gíriti José, lídaangiñeti fulásu le gíribei Arimatéa, jádaangiñeti gíñe ja afálarubalin Jesúsu.

⁵⁸Ábati lídin aríjei Piláto, ába lamúriajani lúgubu Jesúsu lúma. Ábati laríñagun Piláto lun líchugúniwa lun,

⁵⁹ába lanǘgüni José, ába loúburaguni tídan ában gamísa jarúmatu.

⁶⁰Ába líchuguni lídoun lumúaja iséri lé yebe lachígagüdübei lubárua luágu dǘbü. Lárigiñe ladáuruni umúajaü láu ában dǘbü weíriti luágu lubéneri, ába lídin.

⁶¹Ñíñounti María Magdaléna túma to ában María ñun ligíbugiñe umúajaü. Oúnigirutiña ligíbugiñe lumúaja Jesúsu

⁶²Larúgan, lárigiñe aráansejani lubá luwéyuri eméraaguni, ába joúdin jábutigu fádirigu jáma fariséogu aríjei Piláto,

⁶³ába jaríñagun lun. —Wábuti, jarítagua wamúti luágu aríñaga lán meja yéeti ligíra dán meja moúnwengili luágu lásaaruba lan luágu lǘrüwan wéyu lárigiñe loúnwen.

⁶⁴Oúnajagubeibá achoúrurei umúajaü daríme lǘrüwan wéyu, mayábin jamámuga láni disípulugu áriebu íwerujei lúgubu, ábame jaríñagun joun gürígia luágu saráali lan. Weíritimaajalímeti lagúmujoún iyéeni le sügǘ láu le furúmiñeti.

⁶⁵Ába laríñagun Piláto joun. —Barǘjuma fiú súdaara, jeíba choúru jumeí umúajaü le lubuídun-ágei juáraati.

⁶⁶Ábati joúdin, ába jachoúruruni dǘbü le luágubei umúajaü, ába jígiruniña súdaara lun joúnigiruni.