Read Garifuna San Marcos 11 Bible Online

San Marcos 11 - Garifuna bible

San Marcos 11

¹Dan le yaráfaaña lubeí lun Jerusalén, ába jachǘlürün ligíbugiñe fulásu buri le Betfajé lúma Betánia, le ǘnabubei libíti wǘbü le Olívos, ába laríñagun Jesúsu joun biáma jádaangiñe láni disípulugu.

²—Jeíba lídan liraǘraü fulásu le wagíbugiñebei, dánme le jachǘlürün ñi, jadáriruba ában burígü güráñu le maweinjoúngili ni ában weíyaasu. Jafáragadeíme, ábame janǘgüni ñájoun.

³Ánjaün álügüdǘwa ca lan uágu jadǘgei le, jaríñagame lun luágu busén láni Jesúsu, luágu láguyugüdübei lan furése.

⁴Ába joúdin, ába jadáriruni burígü ligía güráñu lubádu ában béna, boúgudi lídan ǘma, ába jafáragaduni.

⁵Ába jaríñagun jádaangiñe ja ñíbaña ǘmadarugu joun. —¿Ca jadǘgübei? ¿Cáme jafáragadei burígü le?

⁶Ába joúnabuniña quei laríñaguni Jesúsu joun, ába jígiruniña lun joúdin láu.

⁷Ába janǘgüni burígü lun Jesúsu, ába jíchugunun jabíte luágu burígü ligía, ába laweínruni Jesúsu.

⁸Sarágu jáña átulerutu jabíte luágu ǘma, jíbiri, ába jánchuajan tilímun wéwe, ába jachágajani luágu ǘma lubá lásügürün Jesúsu ligíbuagugiñe.

⁹Ja ubáraübaña jáma ja árigibaña, ába jagúmeserun agúaraja.¡Glória! ¡Biníwati wügǘri le ñǘbinbei lídan líri Wabúreme Búngiu!

¹⁰Biníwati arúeijani le ñǘbinbei, le lúnbei ítara lan queísi meja larúeijan wáguchi Davíd.¡Uweíriguni lun Búngiu lídan líñun-ágei siélu!

¹¹Lárigiñe, ába lebélurun Jesúsu Jerusaléoun, belú ligía témpulurugun, lárigiñe laríjini sun cátei, ába lídin Betánia jáu dúusu disípulugu ladǘga dárüjali lan. Líñaraguni Jesúsu tídibu ígo to míinboun

¹²Larúgan, dan le jáfuridunbei Betániagiñe, ába lalámachun Jesúsu.

¹³Dísegiñe, ába laríjin ában tídibu ígo gabánatu. Ába lídin aríja ánjein gin tubeí, ubánaü rügǘñein ladárira tuágu ladǘga mámagili lan tidáani ígo.

¹⁴Ábati laríñagun Jesúsu lun tídibu ígo ligía. —Magíindadügüyabá. Ába jagáambuni láni disípulugu. Larúmadagüdünun Jesúsu témpulu

¹⁵Lárigiñe, ába jachǘlürün Jerusaléoun, ába lebélurun Jesúsu témpulurugun, ába laságajaniña ja alúgurajabaña jáma ja agáñijabaña ñi. Ába lagárabajani jadábulan ja asáansijabaña seínsu joun gürígia lúma jála ja alúgurajabaña únjun.

¹⁶Mígirun lumútu témpulu lun ǘmame.

¹⁷Ába laríñagun lídan larúfudajan joun. —Laríñajare Búngiu tídan líburu to Lerérun. “Núban, fulásu le ñí lubei gayára lan jayúmuragun sun gürígia nun, ánjein jugúya, barǘ jumaaru quei jában jíwerutiña.”

¹⁸Ába jagáambun jábutigu fádirigu jáma arúfudajatiña lilúrudun Moisés luágu le laríñagubei, ába jagúmeserun áluaja ída lúba lan jáfaruni jilágubei, ladǘga janúfudetiña lueí, quei sun lan gürígia weíriti janígi luágu le larúfudajabei.

¹⁹Dan le lagúñedunbei, ába láfuridun Jesúsu fulásurugugiñe. Tídibu ígo to ásaürüboun

²⁰Larúgan bináafin, sügǘti Jesúsu jáma láni dúusu disípulugu lueígiñe méme ǘma ligía, ába jaríjinun tídibu ígo saǘja lúmagiñe tílagüle.

²¹Ába larítaguni Pédro, ába laríñagun lun Jesúsu. —Maésturu, ¡aríjabá tun tídibu ígo to bíñaraguboun gúñaarü, saǘja!

²²Ába laríñagun Jesúsu joun súngubei. —Afíñe jumá luágu Búngiu.

²³Ninárün jáu luágu furúmieguarügü lan le aríñaguti lun wǘbü le. “Gidába yágiñe, dabúba baránajoun”, ánjein úa lubeí liloúguan afíñeni tídan lanígi áni afíñe ligía luágu lagúnfuliruba lan le laríñagubei, ítara lúba.

²⁴Ligía naríñagunbei jun luágu sun lan le jamúriajan lúma Búngiu, ánjein afíñe jubeí luágu resíbi jumáali lan, ítara lúba.

²⁵Dan le jayúmuraguña lan lun Búngiu, ánjein níjein lubeí ladǘga ában gürígia jun le mísiñeti jun, ferúduna jumeí lun gíñe ferúduna lánün Júguchi Búngiu le siélubei.

²⁶Ánjein úa ferúduna jumá, úabei gíñe ferúduna láani Júguchi Búngiu le siélubei jifígoun. Lugúmadin Jesúsu

²⁷Ába jagíribudun Jerusaléoun. Dan le eíbugeina lubeí Jesúsu témpulurugu, ába jayábin jábutigu fádirigu, arúfudajatiña lilúrudun Moisés, jáma ámu wügǘriña ja weírigutiña lídan jafíñen juríu,

²⁸ába jálügüdüni. —¿Cáteisan biríchabei lun bádaragun búngua lídoun cátei le tánina témpulu? ¿Ca íchugubalin ubáfu le bun?

²⁹Ába loúnabuniña Jesúsu, aríñageina ligía joun. —Nálügüdaadün gíñe ában cátei, ánjana joúnaba, naríñagubei jun ca lan áu gumádi nadǘgei buri cátei le.

³⁰¿Ca oúnajabalin Juan abásteragüdaja? ¿Búngiu, ódi wügǘriña?

³¹Ába jagúmeserun adímureja jámagua, ába jaríñagun. —Ánjawa aríñaga luágu Búngiu lan oúnajabalin, laríñaguba woun ca lan uágu mafíñerun wabeí lun Juan.

³²¿Ódi waríñaguba funági luágu joúnajan lan wügǘriña? Lun jamúga joúnabun ítara, janúfudetiña jaweí gürígia, ladǘga subúdi jamáni sun gürígia luágu proféta lán Juan.

³³Ábati jaríñagun lun Jesúsu. —Ibídiñeti woun. Ábati gíñe laríñagun Jesúsu. —Maríñagun nubeí gíñe jun ca lan áu gumádi nadǘgei cátei le.